ކާނާގެ ޔަޤީންކަން ކަށަވަރު ކުރުމުގެ މަޝްރޫޢު މިއަހަރު 4 ރަށެއްގައި ފެށޭނެ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ކާނާގެ ޔަޤީންކަން ކަށަވަރު ކުރުމަށް ކުރިއަށްގެންދާ މަޝްރޫޢުގެ މަސައްކަތް މިއަހަރު 4 ރަށެއްގައި ފެށޭނެ ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ވިދާޅުވެއްޖެއެވެ.

ރާއްޖެއަށް އެތެރެކުރާ ކާބޯތަކެތީގެ ނިސްބަތް މަދުކޮށް ކާނާގެ ޔަޤީންކަން ކަށަވަރު ކުރުމަށްޓަކައި އުތުރު ތިލަފަޅުގައި ދަނޑުވެރިކަމުގެ ބޮޑު މަޝްރޫޢެއް ފެއްޓެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޢިއުލާންކުރައްވާފައެވެ. މި މަޝްރޫޢާއެކު ރާއްޖެއަށް އެތެރެކުރާ ކާބޯތަކެތީގެ ނިސްބަތް މަދުކޮށް، އެކަމަށް ކުރާ ހޭދަ ކުޑަކުރެވޭނެ ކަމަށް ސަރުކާރުން ވިދާޅުވެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަ ދައްކަމުން ދަނޑުވެރިކަމާއި ބެހޭ ވުޒާރާގެ ޕާރމަނަންޓު ސެކެޓްރީ މުޙައްމަދު އަނީސް ވިދާޅުވީ، ފާއިތުވި 2 އަހަރު ކާނާގެ ޔަޤީންކަން ކަށަވަރު ކުރުމުގެ ގޮތުން ގިނަ މަސައްކަތްތަކެއް ކޮށްފައިވާ ކަމަށެވެ. އެގޮތުން ކާނާގެ ޔަޤީންކަން ކަށަވަރު ކުރުމުގެ ގޮތުން ރަށްތަކެއް ކަނޑައެޅިގެން މަސައްކަތް ކުރިއަށް ގެންގޮސްފައިވާ ކަމަށް އޭނާ ވިދާޅުވިއެވެ.

އަނީސް ވިދާޅުވީ، މީގެ ތެރޭގައި ރައީސް ވަޢުދުވެ ވަޑައިގެންފައިވާ ރަށްރަށްވެސް ހިމެނޭ ކަމަށެވެ. އެހެންކަމުން އެ ރަށްރަށަށް އިސްކަންދީގެން މަސައްކަތް ކުރަމުންދާ ކަމަށް ވިދާޅުވިއެވެ. އެގޮތުން ހދ. ނޮޅިވަރަމް، ކ. ކާށިދޫ، ހއ. ކެލާ އަދި ގއ. ކޮނޑޭ ހިމެނޭ ކަމަށް ވިދާޅުވިއެވެ. އަނީސް ވިދާޅުވީ، މިރަށްރަށުގައި ހިންގާ މަޝްރޫޢުގެ މަސައްކަތްތައް މިއަހަރު ނިމުމުގެ ކުރިން ފެށޭނެ ކަމަށެވެ.

"މި ރަށްތަކާއެކު އެގްރިމަންޓު ހަދައި، ކައުންސިލްތަކާއެކު ސޮއިކޮށް، މަސައްކަތް ފެށުމަށް ވަނީ ތައްޔާރުވެފައި. މިއަހަރު ނިމުމުގެ ކުރިން މި ރަށްރަށުގައި މަސައްކަތް ފެށޭނެ. މިހާރު ބިނާކުރަން ޖެހޭ އިމާރާތްތައް ކުރުމުގެ މަސައްކަތް ކުރިއަށް ދަނީ." އަނީސް ވިދާޅުވިއެވެ.

މުޙައްމަދު އަނީސް ވިދާޅުވީ، ދަނޑުވެރިކަން ސިންދަފާތު ކުރުމުގެ މަސައްކަތުގެ ދަށުން ކިނޮޅަހުގައި ކުކުޅު އާލާކުރުމުގެ މަޝްރޫޢެއް ކުރިޔަށް ގެންޔުމަށް ނިންމާފައިވާ ކަމަށެވެ. އަދި އެމަސައްކަތް ފެށުމަށް މިހާރު ތައްޔާރުވެފައިވާ ކަމަށް ވިދާޅުވިއެވެ. އަނީސް ވިދާޅުވީ، މިއީވެސް ކާނާގެ ޔަޤީންކަން ކަށަވަރު ކުރުމަށް ކުރި މުހިންމު މަސައްކަތެއް ކަމަށެވެ.

ދަނޑުވެރިކަމާއި ބެހޭ ވުޒާރާއިން ވިދާޅުވީ، ކާނާގެ ޔަޤީންކަން ކަށަވަރު ކުރުމުގެ ގޮތުން މަސައްކަތް ފަށައި 4 ރަށުގައި ޒަމާނީ ދަނޑުވެރިކަމުގެ މަޝްރޫޢުތައް ހިންގާނެ ކަމަށެވެ. އެގޮތުން ގްރީން ހައުސްއާއި ވާރޓިކަލް ފަރމިންގގެ އާލަތްތައް ބޭނުން ކޮށްގެން އެކި ބާވަތުގެ ތަރުކާރީއާއި، މޭވާ އަދި ސެލެޑް ފަތް ފަދަ ތަކެތި އުފައްދާނެ ކަމަށްވެސް އެ ވުޒާރާއިން ވިދާޅުވިއެވެ.

ދަނޑުވެރިކަމާއި ބެހޭ ވުޒާރާއިން ވިދާޅުވީ، މިޝްރޫޢުތަކުގެ ސަބަބުން ތިމާވެއްޓާއި ރައްޓެހި އަދި ދެމެހެއްޓެނިވި ޓެކްނޮލޮޖީތައް ބޭނުން ކޮށްގެން ރާއްޖޭގައި އުފައްދާ ކާބޯތަކެތީގެ މިންވަރު އިތުރު ކުރެވިގެންދާނެ ކަމަށެވެ.

ރަށު ފެންވަރުގައި ވަރުގަދަ ކާބޯތަކެތީގެ ނިޒާމުތަކެއް ޤާއިމުކޮށްގެން ބޭރުން އެތެރެކުރާ ކާބޯތަކެތީގެ މައްޗަށް ބަރޯސާވާ މިންވަރު މަދުކުރެވިގެންދާއިރު، ދަނޑުވެރިކަމުގެ ދާއިރާގެ ތަމްރީނާއި، ވަޒީފާ އަދި ވިޔަފާރީގެ ފުރުޞަތުތައް މެދުވެރިކޮށް އިޤްތިޞާދީ ގޮތުން އެންމެންގެ ބައިވެރިވުން އިތުރުކުރެވިގެން ދާނެކަމަށް އެ ވުޒާރާއިން ވިދާޅުވިއެވެ.

މީގެ އިތުރުން އަގުހެޔޮ، ޞިއްޙަތަށް ފައިދާހުރި އަދި ތާޒާ ކާބޯތަކެތި ލިބުމުގެ ފުރުޞަތު ފަހިކޮށްދީގެން ކެއުމުގެ ރައްކާތެރިކަން އިތުރު ކުރުމާއި އިޤްތިޞާދީ، އިޖުތިމާޢީ އަދި ކެއުމުގެ ރައްކާތެރިކަމުގެ ގޮތުން ރަށުގެ މުޖުތަމަޢަށް މިންކުރެވޭ ފައިދާތަކެއް ފޯރުކޮށްދިނުން މި މަޝްރޫއުގެ ތެރެއިން ކުރެވޭނެ ކަމަށް ދަނޑުވެރިކަމާއި ބެހޭ ވުޒާރާއިން ވިދާޅުވިއެވެ.

ދަނޑުވެރިކަން ވަކި ސިނާޢަތެއްގެ ގޮތުގައި ކުރިއެރުވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ ސިޔާސަތެކެވެ. އެގޮތުން ދަނޑުވެރިކަމުގެ ކަންކަމަށް ވަކި ޚާއްސަ ވުޒާރާއެއް އުފައްދަވާ، ދަނޑުވެރިންނަށް ބޭނުންވާ ތަމްރީނާއި، އާލާތްތަކާއި، އެހެނިހެން އެހީތެރިކަން ފޯރުކޮށްދިނުމަށް ސަރުކާރުން އަންނަނީ، މަސައްކަތް ކުރައްވަމުންނެވެ. މީގެ އިތުރުން ދަނޑުވެރިކަމުގެ އުފެއްދުންތައް މާކެޓް ކުރުމަށް ބޭނުންވާ ވަސީލަތްތައް ޤާއިމުކުރުމަށްވެސް ސަރުކާރުން އަންނަނީ، މަސައްކަތް ކުރައްވަމުންނެވެ.