ފަލަސްޠީނު މެޗުގެ ޕްލެޓިނަމް ޓިކެޓް ނައިބު ރައީސް ބައްލަވައިގެންފި

ދިވެހިރާއްޖޭގެ 17 އަހަރުން ދަށުގެ ގައުމީ ފުޓުބޯޅަ ޓީމާއި ފަލަސްޠީނުގެ 17 އަހަރުން ދަށުގެ ޤައުމީ ޓީމު ކުޅޭ އެކުވެރިކަމުގެ މެޗުގެ ސްވެނިއަރ ޕްލެޓިނަމް ޓިކެޓު ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ބައްލަވައިގެންފިއެވެ.

ނައިބު ރައީސްއާއި މިޓިކެޓު ހަވާލުކޮށްދެއްވީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤެވެ.

އެފްއޭއެމް އިން ބުނީ ފަލަސްޠީނުގެ ރައްޔިތުންނަށްޓަކާ ފަސްޖެހުމެއްނެތި ކުރައްވާ ތާއީދާއި ބަހައްޓަވާ އޯގާތެރިކަމާއެކު ސްވެނިއަރ ޕްލެޓިނަމް ޓިކެޓު ނައިބު ރައީސް ބައްލަވައިގެންނެވި ކަމަށްޓަކައި އެމަނިކުފާނަށް އިހުލާސްތެރިކަމާއެކު ޝުކުރު ދަންނަވާ ކަމަށެވެ.

އަދި ޒުވާނުންނާއި ކުޅިވަރާއި އިންސާނިއްޔަތުކަމުގެ ދިފާއުގައި ހުންނެވީތީ އެކަމަށްޓަކައިވެސް ނައިބު ރައީސްއަށް ޝުކުރު ދަންނަވާ ކަމަށެވެ.

ނައިބު ރައީސްއަކީ ފަލަސްޠީނުގެ ރައްޔިތުންގެ ހައްޤުތައް ހޯދައިދިނުމަށް އަޑު އުފުއްލަވާ ބޭފުޅެކެވެ.

ރައީސުލްޖުމްހޫރިއްޔާގެ ހާއްސަ އިސްނެންގެވުމުގެ މަތިން ފަލަސްތީނުގެ 17 އަހަރުން ދަށުގެ ޓީމަށް ރާއްޖޭގައި ކޭމްޕް ކުރެވޭނެ މަގު ތަނަވަސް ކޮށްދެއްވާފައިވާއިރު މިރެއާއި ހޮނިހިރު ދުވަހުގެރޭ ގަލޮޅު ދަނޑުގައި އެކުވެރިކަމުގެ ދެ މެޗު ކުޅޭނެއެވެ.

‎މި ދެ މެޗުގެ ސްވެނިއަރ ޓިކެޓް ގަންނަން ބޭނުންވާ ފަރާތްތަކަށް އެފްއޭއެމްގެ މޯބައިލް ނަމްބަރު 7507006 އަށް ވައިބަރ ނުވަތަ ވަޓްސްއެޕްއިން މެސެޖުކޮށްގެންވެސް ޓިކެޓް ލިބޭނެ އިންތިޒާމު ހަމަޖެހޭނެއެވެ. އަދި ދަނޑުގެ ޓިކެޓް ކައުންޓަރުންވެސް ޓިކެޓް ގަނެވޭނެއެވެ.

މެޗުގެ ޓިކެޓް ވިއްކާ އަގަކީ ސްވެނިއަރ ޕްލެޓިނަމް ޓިކެޓެއް 1000 ރުފިޔާއަށް، އަދި ސްވެނިއަރ ގޯލްޑް ޓިކެޓެއް 500 ރުފިޔާއަށެވެ. ޖުމްލަ 50 ސްވެނިއަރ ޕްލެޓިނަމް ޓިކެޓް ވިއްކަން ހަމަޖެހިފައިވާއިރު މިއީ ވީއައިޕީ ރޮސްޓްރޮމްގެ ޓިކެޓެކެވެ. ޖުމްލަ 200 ސްވެނިއަރ ގޯލްޑް ޓިކެޓް ވިއްކަން ހަމަޖެހިފައިވާއިރު މިއީ ވީއައިޕީ ގޮނޑިބަރި ޓިކެޓެވެ.

މި މެޗުތަކުގެ ސްވެނިއަރ ޓިކެޓް ވިއްކައިގެން ލިބޭ ހުރިހާ ފައިސާއެއް ހަދިޔާ ކުރާނީ ހަނގުރާމައިގެ ހާލަތުގައި އޮތް ފަލަސްޠީނުގެ ފުޓުބޯޅަ އަލުން ދިރުވާ ތަރައްޤީކުރުމަށް ކުރާ މަސައްކަތަށް އެހީވުމުގެ ގޮތުން ފަލަސްޠީނު ފުޓުބޯޅަ އެސޯސިއޭޝަނަށް ކަމަށް އެފްއޭއެމްއިން ބުނެއެވެ.

މި ދެމެޗަށް ސްވެނިއަރ ޓިކެޓު ވިއްކި ނަމަވެސް ދެމެޗު ބަލަން ބޭނުންވާ ފަރާތްތަކަށް ހިލޭ ދަނޑުގެ ގޮނޑިބަރިއާއި ސިޑިބަރިއަށް ވަދެވޭނެ ކަމަށް އެފްއޭއެމްއިން ބުނެއެވެ.