އަބުރުރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނު ވުޖޫދަށް އައި ހިސާބުންވެސް އިދިކޮޅު ފަރާތްތަކުން ވަނީ މިޤާނޫނާ ދެކޮޅަށް ވާހަކަދައްކަވާފައެވެ. އެފަރާތްތަކުން މިޤާނޫނާގުޅިގެން މައިގަނޑުގޮތެއްގައި ކަންބޮޑުވުން ފާޅުކުރައްވާފައިވަނީ މިޤާނޫނު ޤާނޫނުވއަސާސީގެ 27 ވަނަ މާއްދާގައި ބަޔާންކުރާ ޚިޔާލުފާޅުކުރުމުގެ މިނިވަންކަންމުގެ ޙައްޤާ ފުށުއަރާކަމަށްބުނެއެވެ. އެހެންނަމަވެސް އަބުރު ރައްކާތެރިކުރުމުގެ ޤާނޫނު ކަށަވަރުކުރަނީ މުޖުތަމަޢުގެ ކޮންމެ ފަރުދެއްގެ އަބުރަކީ ރައްކާތެރިކުރެވިގެންވާ އެއްޗެއްކަމެވެ. އެހެންކަމުން މިޤާނޫނު މަނާކުރަނީ މީހަކަށް ރައްދުވާގޮތަށް ސާބިތު ނުހިފޭ ދޮގުވާހަކަދެއްކުމެވެ. ތެދުބަހުން ވާހަކަދައްކައި ތެދު މަޢުލޫމާތު ފެތުރުމަށް މިޤާނޫނުގައި އެއްވެސް ހުރަހެއްނެތެވެ.
މީހުންގެ އަބުރަކީ ރައްކާތެރިކުރެވިގެންވާ އެއްޗެއްކަމަށް ޤާނޫނު އަސާސީގައިވެސް ބަޔާންކޮށްފައިވާއިރު، ޚިޔާލުފާޅުކުރުމުގެ މިނިވަންކަމަކީ ޚުދޫދެއްނެތި ހުޅުވާލެވިފައިވާ މިނިވަންކަމެއް ނޫންކަން ޤާނޫނު އަސާސީގެ 67 ވަނަ މާއްދާގައި ބަޔާންކޮށްފައިވެއެވެ. ޕީ.އެސް.އެމަށް ދެއްވި އިންޓަރވިއުއެއްގައި ރައްޔިތުންގެ މަޖިލީހުގެ ނައިބުރައީސް މޫސާ މަނިކު ވިދާޅުވީ އަބުރުރައްކާތެރިކޮށްދިނުމާއި ޚިޔާލުފާޅުކުރުރުމުގެ މިނިވަންކަމުގެ ޤާނޫނަކީ ޤާނޫނުއަސާސީގައިވާ އަސާސީ ޙައްޤުތައް އިތުރަށް ކަށަވަރުކޮށްދޭ ޤާނޫނެއްކަމަށާއި، މިއީ ޤާނޫނު އަސާސީ ވުޖޫދަށް އައުމާއެކު އޭގައިވާ ކަންކަން ފުރިހަމައަށް ތަންފީޒުކުރުމަށްޓަކައި މާކުރިންވެސް ފާސްކުރަންވެފައިއޮތް ޤާނޫނެއްކަމަށެވެ.
img:http://s2.psmnews.mv/images/660x400/14720418606209.jpg|ރައްޔިތުންގެ މަޖިލީހުގެ ނައިބު ރައީސް އަދި ހުޅުހެންވޭރު ދާއިރާގެ މެމްބަރު މޫސާ މަނިކު / ފޮޓޯ: މަޖިލިސް އިދާރާ
މިޤާނޫނުގެ ސަބަބުން ޤާނޫނުއަސާސީގައި ބަޔާންކުރާ ޚިޔާލުފާޅުކުރުމުގެ މިނިވަންކަމާއި، އަސާސީ އެއްވެސް ޙައްޤަކަށް އުނިކަމެއް ނާންނާނެކަމަށް މޫސާ މަނިކު ވިދާޅުވިއެވެ. މިޤާނޫނާ ދެކޮޅަށް ވާހަކަދައްކާ މީހުން ވާހަކަދައްކަމުންދިޔައީ ސިޔާސީ ބޭނުންމަށްކަމަށް ސިފަކުރައްވައި މޫސާ މަނިކު ވިދާޅުވީ މިޤާނޫނަކީ ރާއްޖޭގެ ޑިމޮކްރަސީއަށްވެސް ހެޔޮފާލެއްކަމަށެވެ.
"ޑިމޮކްރަސީވެސް އޮންނާނީ ކޮންމެވެސް އިމެއްގެ ތެރޭގައި. އެހެންވެގެންތާ ޤާނޫނުއަސާސީއެއް މިއޮންނަނީ. ޤާނޫނު ފާސްކުރުމަށް މަސައްކަތްކުރަމުން އައިއިރު ހުރި ފާޑުކިއުންތަކާއި، މިހާ ހިސާބަށް އައިއިރު ރައްޔިތުންގެ ތެރޭގައި ކަންބޮޑުވުންތަކެއް ހުރެގެން މިކަމަކާއެއް ނޫޅޭ. ރައްޔިތުން ބަލައިގަންނަ ޤާނޫނަކަށް މިޤާނޫނު ވެއްޖެ. އަދި އިރާދަކުރެއްވިއްޔާ އެއަށްވުރެ ރަނގަޅަށް ރައްޔިތުން މި ބަލައިގަނެ އަދި ޚިޔާލުފާޅުކުރުމުގެ މިނިވަންކަމުގައި މަސައްކަތްކުރައްވަމުން ގެންދިޔަ ބޭފުޅުންނަށްވެސް މީގެ ސަބަބުން ފަސޭހަތަކެއް ވެގެން ދާނެ." މޫސާ މަނިކު ވިދާޅުވިއެވެ.
އަބުރު ރައްކާތެރިކޮށްދިނުމުގެ ޤާނޫނަކީ އިދިކޮޅު ފަރާތްތަކާއި މީޑިއާތައް ޒިންމާދާރު އިތުރަށް ޒިންމާދާރުވުމަށް ލިބިގެންދިޔަ އިތުރު ފުރުޞަތެއް ކަމަށާއި، މިއީ ކޮންމެ ރައްޔިތަކަށް ލިބިގެންދިޔަ ރައްކާތެރިކަމެއްކަމަށް މޫސާ މަނިކު ވިދާޅުވިއެވެ.
"ޑިމޮކްރަސީއެއްގައި އިދިކޮޅު ޕާޓީއެއް އެބައޮވޭ. އިދިކޮޅުގައިވެސް ހުންނަންވާނެ މީހުން ދައްކާފައި ނުދައްކާނެ ވާހަކަތައް. އިދިކޮޅު ވާހަކަދެއްކުމަކަށް ނުވާނެ މީހެއްގެ އަބުރު ކަތިލުން. މީހެއްގެ މުޅި ދިރިއުޅުން ހަލާކުކޮށްލުން. މީހެއްގެ އަބުރާ ބެހި އަނިޔާކުރުން. އެއީއަކީ އަޅުގަނޑުމެން ޤަބޫލުކުރާ ކަންކަމެއްނޫން." މޫސަ ވިދާޅުވިއެވެ.
img:http://s4.psmnews.mv/images/660x400/14720418753592.jpg|ރައްޔިތުންގެ މަޖިލީހުގެ ޖަލްސާއެއް ކުރިއަށްދަނީ / ފޮޓޯ: މަޖިލިސް
ރައްޔިތުންގެ މަޖިލީހުން އަބުރު ރައްކާތެރިކޮށްދިނުމުގެ ޤާނޫނު ފާސްކުރައްވާފައިވަނީ މެންބަރުން އެޤާނޫނާމެދު ޚިޔާލުފާޅުކުރުމުގެ ފުރުޞަތު ހުޅުވާލައި، ބިލެއް ފާސްކުރުމަށް ފުރިހަމަކުރަންޖެހޭ އެންމެހައި ކަންކަން ފުރިހަމަކުރެއްވުމަށްފަހުގައި ކަމަށްވުމުން، މިޤާނޫނާމެދު ސުވާލު އުފެއްދުމުގެ ފުރުޞަތު ނޯންނާނެ ކަމަށާއި، މިއީ ރައްޔިތުންގެ މަޖިލީހުގެ އަޣުލަބިއްޔަތުން ފާސްކޮށްފައިވާ ޤާނޫނަކަށްވުމުން މިޤާނޫނާ ދެކޮޅަށް ވޯޓް ދެއްވި މެންބަރުންވެސް މިޤާނޫނަށް އިޙްތިރާމްކުރައްވަން ޖެހިވަޑައިގަންނަވާކަމަށް ރައްޔިތުންގެ މަޖިލީހުގެ ނާއިބު ރައީސް ވިދާޅުވިއެވެ.
އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުން މުޖުތަމަޢުގެ ފަރުދުންނާއި، މީޑިއާތަކަށް ވަނީ މުހިންމު ޒިންމާތަކެއް މަތިކޮށްފައެވެ. މިޤާނޫނުން މަތިކޮށްފައިވާ ޒިންމާތަކަކީ މުޖުތަމަޢުގެ ޢާންމު ނިޒާމުގެ ތެރެއިންވެސް އެފަރާތްތަކުގެ ޒިންމާތަކެކެވެ.