ފިލްމާއި ސީރީޒް ބެލުމަށް ފޯރި ހުންނަ ފަރާތްތައް އަނެއްކާވެސް ކެތްމަދުވެ، ނޭވާ ހިފަހައްޓާލަން މިވަނީ ޖެހިފައެވެ.
ނެޓްފްލިކްސްގެ އޮރިޖިނަލް ފިލްމްތަކާއި ސީރީޒްތަކަކީ މިފަހަކަަށް އައިސް އާއްމުންގެ މަޤުބޫލުކަން ހޯދަމުން އަންނަ ގިނަ ބަޔަކު ބަލާ މުނިފޫހިފިލުވުމުގެ މުހިއްމު ބައިވެރިއެކެވެ. މިގޮތުން ނެޓްފްލިކްސްގައި އެންމެ ގިނަ ބައެއްގެ މަޤުބޫލުކަން މިފަހުން ހޯދާފައިވާ އެއް ސީރީޒަކީ "ނާކޮސް" އެވެ.
ހަޤީގީ ހާދިސާއެއްގެ މައްޗަށް ބިނާކޮށް ތައްޔާރުކުރާ ނެޓްފްލިކްސްގެ މި ސީރީޒްގެ ސީޒަން 1 ނިމުނުއިރު މި ސީރީޒްގެ މައި ކެރެކްޓަރ ޕަބްލޯ އެމީލިއޯ އެސްކޮބާ ގަވީރިއާ ނުވަތަ އާއްމު ނަމުން ނަމަ ޕަބްލޯ އެސްކޮބާ ވަނީ ޖަލުން ފިލާފައެވެ. އެހެންކަމުން 2 ވަނަ ސީޒަނަށް ފަށާއިރު ސީރީޒްގައި އެކްޝަންގެ ގިނަ ޙަރަކާތްތަކެއް ފެނިގެންދާނެ ކަމަށް ވަނީ އުއްމީދު ކުރެވިފައެވެ.
ނާރކޮސްގެ 2 ވަނަ ސީޒަން ފެށެން ވަގުތު ކުޑަތަންވެފައިވަނިކޮށް ނެޓްފްލިކްސްއިން މި ސީރީޒްގެ 2 ވަނަ ސީޒަންގެ ޕޯސްޓަރަކާއި ޓްރެއިލަރ ރިލީޒް ކުރުމާއެކު ދެން އުފެދިގެން މިދިޔައީ އިތުރު ސުވާލެކެވެ. ޕޯސްޓަރަކާއި ޓްރެއިލަރއިން ލޮލުގައި އަޅައިގަތީ ބޭނުންކޮށްފައިވާ ހޭޝްޓެގް "ހޫ ކިލްޑް ޕަބްލޯ" އެވެ. ފޯރިގަދަ ސީރީޒެއްގެ 2 ވަނަ ސީޒަނާއި ހިސާބުން ސީރީޒްގެ މެއިން ކެރެކްޓަރ މަރާލީ ކާކުތޯ އަހާ ހޭޝްޓެގެއް ޕްރޮމޯޓް ކުރުމުން ވާނީ ކިހިނެތްބާ؟
ސީޒަން 2 ގެ 10 އެޕިސޯޑާއެކު އަންނަ ސެޕްޓެމްބަރު މަހުގެ 2 ވަނަ ދުވަހު ނާކޮސް ނެޓްފްލިކްސްއަށް އަންނާނެއެވެ.