ރާއްޖޭގައި އަންހެނަކަށްވީތީ ނުވަތަ ފިރިހެނަކަށްވީތީ އިސްލާމް ދީނުގެ ހަމަތަކުން ބޭރުން، ޘަޤާފީ ގޮތުންނާއި އާދަކާދައިގެ ގޮތުން ނޭދެވޭ ތަފާތުކުރުން ގެންގުޅޭކަމަށް ބެލެމުންދެއެވެ. އަދި އެކަން އެގޮތަށް އޮވެގެން ނުވާނެކަމަށް އެކި ދުވަސްވަރު އަޑުއުފުލައި ވާހަކަ ދެކެވިފައިވެއެވެ. އަދި ތަފާތުނުކުރުމުގެ ސިޔާސަތުތައް އެކި ދުވަސްވަރު ގެންގުޅެން މަސައްކަތްވެސް ކުރެވިފައިވެއެވެ. ނަމަވެސް އެކަމަށް ޚާއްޞަ ވަކި ޤާނޫނެއް ތަންފީޒު ކުރެވިފައެއްނުވެއެވެ. ސަރުކާރުން ރައްޔިތުންގެ މަޖިލީހަށް ހުށަހެޅުއްވައިގެން ޖެންޑަރ އީކުއަލިޓީ ބިލެއް ފާސްކުރެއްވީ 16 އޯގަސްޓް 2016 ވީ އަންގާރަ ދުވަހުއެވެ. މި ބިލް މިހާރު މިވަނީ ރައީސުލްޖުމްހޫރިއްޔާ ތަޞްދީޤު ކުރައްވާފައެވެ. މި ބިލަށް ޢަމަލުކުރަން ފެށޭނީ ތަޞްދީޤުކުރެއްވި ތާރީޚުން ފެށިގެން ހަމަސްދުވަސް ހަމަވާ ދުވަހުން ފެށިގެނެވެ.
މި ޤާނޫނުގައި، ޤާނޫނުގެ މަޤްޞަދަށްޓަކައި ޖެންޑަރ އީކުއަލިޓީ ބަޔާންކުރާގޮތުގައި އެއީ އަންހެނުންނަށާއި ފިރިހެނުންނަށް ފުރުޞަތު ލިބުމުގެ ހަމަހަމަކަމަށާއި ފުރުޞަތުތަކަށް ވާޞިލްވުމުގެ ހަމަހަމަކަމަށާއި ފުރުޞަތުތަކުން ނަތީޖާ ޙާޞިލްކުރުމުގެ ހަމަހަމަ ކަމަށާއި ޙައްޤުތަކާއި މިނިވަންކަމުގެ ފުރިހަމަ މަންފާ ހޯދޭފަދަ މަޢުނަވީ ހަމަހަމަކަމެވެ. ޖެންޑަރއަށް ބަލައި އެއްވެސް މީހަކާމެދު ސީދާގޮތުންވެސް އަދި ނުސީދާގޮތުންވެސް ތަފާތުކުރުމަކީ މަނާކަމެއްކަމަށް މި ޤާނޫނުގައިވެއެވެ. ދަރިމައިވުން ނުވަތަ ދަރިމައިވުމުގެ ފުރުޞަތު އޮތަތީ ނުވަތަ ވިހެއުން ނުވަތަ ވިހެއުމުގެ ފުރުޞަތު އޮތަތީ ނުވަތަ ގާތުން ކިރުދިނުން ނުވަތަ އެ ފުރުޞަތި އޮތަތީ އަންހެނަކާމެދު ސީދާގޮތުން ނުވަތަ ނުސީދާގޮތުން ތަފާތުކުރުމަކީ، މި ޤާނޫނުން މަނާކުރާ ކަމެކެވެ.
މި ޤާނޫނުގެ ޙަޤީޤީ މަންފާ ޙާޞިލްކުރުމަށްޓަކައި މީހުންގެ މަޞްލަޙަތާ ގުޅުންހުރި ފަރާތްތަކުން އަދާކުރަންޖެހޭ މަސްއޫލިއްޔަތުތަކެއް މި ޤާނޫނުގައި ބަޔާންވެގެންވޭ. އޭގެތެރޭގައި ދައުލަތުގެ އިދާރާތަކާއި އިދާރީ ދާއިރާތަކާއި ވިޔަފާރީ ހިންގާ ތަންތަނާއި މި ނޫންވެސް އެކިއެކި ޚިދުމަތްދޭ ތަންތަން ހިމެނެއެވެ. ޕަބްލިކް ސެކްޓަރ އަދި ޕްރައިވެޓް ސެކްޓަރގެ ވަޒީފާދޭ ތަންތަނާއި މީޑިއާގެ ޚިދުމަތްދޭ ތަންތަނާއި މީޑިއާގައި މަސައްކަތްކުރާ މީހުންވެސް ހިމެނެއެވެ. މީގެ އިތުރަށް ތަޢުލީމީ ޚިދުމަތްދޭ އިދާރާތަކާއި މާލީ ޚިދުމަތްދޭ ތަންތަނާއި ސިޔާސީ މައިދާނާއި ޞިއްޙީ ޚީދުމަތްދޭ ތަންތަނާއި ބޯހިޔާވަހިކަން ފޯރުކޮށްދޭ ފަރާތްތަކާއި އިޤްތިޞާދީ ޙަރަކާތްތައް ހިންގާ ތަންތަން ހިމެނެއެވެ. މި ފަރާތްތަކުގެ ޒިންމާ މި ޤާނޫނުގައި ކަނޑައަޅައި ބަޔާންކޮށްފައިވެއެވެ.
މި ޤާނޫނު ތަންފީޒުކުރުމުގެ އެންމެ އިސް މަސްއޫލިއްޔަތު އޮތީ ޖެންޑަރ މިނިސްޓްރީއަށެވެ. ޖެންޑަރ އީކުއަލިޓީގެ ޤާނޫނު ރައީސުލްޖުމްހޫރިއްޔާ ތަޞްދީޤުކުރެއްވުމާ ގުޅިގެން ޖެންޑަރ މިނިސްޓަރ ޒެނީޝާ ޝަހީދު ޒަކީ ވިދާޅުވީ، މި ޤާނޫނަކީ، ރާއްޖޭގެ ޖެންޑަރ އީކުއަލިޓީއަށް ވަރަށް މުހިންމު ޤާނޫނެކެވެ. އަދި މި ޤާނޫނު ތަންފީޒުކުރުމާބެހޭ ތައްޔާރީތައް ފަށްޓަވައިގެން ކުރިޔަށް ގެންދަވާކަމަށް މިނިސްޓަރ ވިދާޅުވިއެވެ.
މި ޤާނޫނުގެ ދަށުން ޙައްޤު ގެއްލޭ ފަރާތްތަކުން ޝަކުވާކުރަންވީ ގޮތާއި މަނާކުރެވިފައިވާ ކަމެއް ކުރާ މީހަކާމެދު އެޅޭ ފިޔަވަޅުތަކާއި ބަދަލު ނަގައިދެވޭ ގޮތްވެސް ބަޔާންވެގެންވެއެވެ. ޤާނޫނުގައި ކަނޑައެޅިފައިވާ ޖޫރިމަނާގެ މިންވަރު ހުރީ 12 ހާސް ރުފިޔާއާއި 50 ހާސް ރުފިޔާއާ ދެމެދުގައެވެ.