ވޮކޭޝަނަލް ތަޢުލީމުގެ 50 އަހަރުގެ ދަތުރު ދައްކުވައިދޭ ފޮޓޯ މައުރަޒު ހުޅުވައިދެއްވައިފި
-
150 ފޮޓޯ ވަނީ ބަހައްޓާފައި
-
އެހާރާއި މިހާރުގެ ގިނަ ފޮޓޯތަކެއް ބަހައްޓަފައިވޭ
-
ޑިޒިޓަލް ގެލަރީއެއްވެސް ވަނީ އިފްތިތާޙުކޮށްފައި
ރާއްޖޭގައި ވޮކޭޝަނަލް ތަޢުލީމުގެ ފެށިތާ 50 އަހަރު ފުރުން ފާހަގަކުރުމަށް، ޕޮލިޓެކްނިކުން ކުރިއަށްގެންދާ ފޮޓޯ މައުރަޒު ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަތީފު ހުޅުވައިދެއްފައިފިއެވެ. "ވޮކޭޝަނަލް ޖަރނީ އިން ފްރޭމްސް" ނަމުގައި ކުރިއަށްގެންދާ ފޮޓޯ މައުރަޒުގައި 150އަށްވުރެ ގިނަ ފޮޓޯވަނީ ބަހައްޓާފައެވެ.
މި ރަސްމިއްޔާތުގައި މަތީ ތަޢުލީމާ ހުނަރުތައް ތަރައްޤީކުރުމާ ބެހޭ ވަޒީރު ޑރ.އަލީ ޙައިދަރު އަޙުމަދާއި، ޕޮލިޓެކްނިކްގެ ސީއީއޯ ޒޫޝާން ކަމާލުއްދީންގެ އިތުރުން ޕޮލިޓެކްނިކްގެ ގިނަ އަދަދެއްގެ އިސް ދަރިވަރުން ބައިވެރިވިއެވެ. މި މައުރަޒު ހުޅުވުމަށް ބޭއްވި ރަސްމިއްޔާތުގަވަނީ 200 ފޮޓޯ ހިމެނޭހެން ޑިޖިޓަލް ގެލަރިއެއްވެސް ވަނީ ލޯންޗްކޮށްފައެވެ. މި ގެލަރީ ލޯންޗްކޮށްދެއްވީވެސް ރައީސުލްޖުމްހޫރިއްޔާގެ ނައިބެވެ.
ޕޮލިޓެކްނިކްގެ ދަރިވަރުންގެ ފަރާތުން ރައިސުލްޖުމްހޫރިއްޔާގެ ނައިބަށް ވަނީ ހަނދާނީ ހަދިޔާއެއްވެސް އަރުވާފައެވެ.
ރާއްޖޭގައި ވޮކޭޝަނަލް ޓްރެއިނިންގ ސެންޓަރަކާއެކު، މަސައްކަތްތެރިކަމުގެ ހުނަރުތައް ދަސްކޮށްދޭން ފެށީ 1975ވަނަ އަހަރުގެ އޮކްޓޯބަރު މަހުގެ 14 ވަނަ ދުވަހުއެވެ.
މި ފޮޓޯ މައުރަޒުގައި ވަނީ އެއިރުން ފެށިގެން ޕޮލިޓެކްނިކްގައި ކުރިއަށްގެންދިޔަ އެކިއެކި ކޯސްތަކާއި ހިންގާފަވާ ޕްރޮގްރާމްތަކާއި އެކި ޚާއްސަ ދުވަސްތަކުގެ ހަނދާނީ ފޮޓޯތައް ބަހައްޓާފައެވެ. އެގޮތުން މާލެއާއި އަތޮޅުތަކުގައި ކުރިއަށްގެންގޮސްފަވާ ކޯސްތަކާއި ޕްރޮގްރާމްތައް ހިމެނެއެވެ.
ގެލަރީ މިއަދު ހުޅުވާފަ ހުންނާނީ މިރޭގެ 10:00އާއި ހަމައަށެވެ. އަދި މާދަމާ ހެނދުނު 10:00އިން އިރުއޮއްސި 06:00އަށް ކުރިއަށްދާނެއެވެ. މި މައުރަޒު އޮންނަނީ ސިފްކޯ ޕާޓީ ހޯލުގައެވެ.
ޕޮލިޓެކްނިކަށް 50 އަހަރު ފުރުން ފާހަގަކުރުމަށް ކާނިވަލެއް ބޭއްވުމަށްވެސް ވަނީ ހަމަޖެހިފައެވެ. މިމަހުގެ 16އިން 17އަށް ކުރިއަށްދާ މި ފެސްޓިވަލްގައި ޕޮލިޓެކްނިކާގުޅޭ އެކި ހަރަކާތްތަކާއި ޕޮލިޓެކްނިކްގެ ޚިދުމަތްތަކާ ވޯކްޝޮޕްތައްވެސް ބަލާލެވެނޭއެވެ.
އަދި މި ދުވަސް ފާހަގަކުރުމަށް ޚާއްސަ ރަސްމިއްޔާތެއް ބޭއްވުމަށްވެސް ވަނީ ހަމަޖެހިފައެވެ.
ޕޮލިޓެކްނިކްގެ އެކި ކެމްޕަސްތަކުގައި މިހާރުވެސް 25އެއްހާ ކޯސް ހިންގަމުންދާއިރު 500އަށްވުރެ ގިނަ ދަރިވަރުން އަންނަނީ އެކި ދާއިރާތަކުން ތަމްރީންވަމުންނެވެ.