މާޅޮސް މަޑުލު ދެކުނުބުރިއަށް ޝަރަފުވެރި ޚިދުމަތްކޮށްދެއްވާ ބޭފުޅުންނަށް ދެއްވާ "ރަންނަ އެވޯޑް" ދެ ބޭފުޅަކަށް ދެއްވައިފިއެވެ.
ރަންނަ އެވޯޑަކީ، ބ.އަތޮޅަށް ދިގުމުއްތަކަށް ފާހަގަކުރެވޭފަދަ ޝަރަފުވެރި ޚިދުމަތްތައް ކޮށްދީފައިވާ ފަރާތްތަކާއި، މިނޫންވެސް އަތޮޅަށް އަގުހުރި ޚިދުމަތްތައް ތަފާތު ދާއިރާތަކުން ކޮށްދީފައިވާ ފަރާތްތަކުގެ އަގު ވަޒަންކުރުގެ ގޮތުން ކައުންސިލުން ދެއްވާ އެވޯޑެކެވެ. ރަންނަ އެވޯޑު ދިނުމަށް ބޭއްވެވި ޖަލްސާގައި، ޝަރަފުވެރިކަމުގެ ދާއިރާއިންނާއި އިޖުތިމާއީ ދާއިރާއިން އެވޯޑު ޙާސިލްކުރި އިބްރާހީމް ޒުބައިރާއި، އަބްދުއް ރައްޒާޤު މުޙައްމަދަކީ ބ.އަތޮޅަށް ދިގުމުއްތަކަށް ޚިދުމަތްކުރެއްވި ދެ ބޭފުޅުންނެވެ. ބ. އަތޮޅު ތަޢުލީމީ މަރުކަޒުގައި ބޭއްވެވި ޖަލްސާގައި މި ދެފަރާތަށް އެވޯޑު ޙަވާލުކޮށްދެއްވީ، މި ޖަލްސާގެ ޝަރަފުވެރި މެހުމާނު މިނިސްޓަރ އޮފް ހޯމް އެފެއާރޒް އަޒްލީން އަޙުމަދުއެވެ.
img:http://s4.psmnews.mv/images/660x400/14715949733830.jpg|ރަންނަ އެވޯޑް ހާޞިލުކުރި ފަރާތަކަށް މިނިސްޓަރ އެވޯޑް ދެއްވަނީ / ފޮޓޯ: އޭދަފުށި ޓައިމްސް
ރަންނަ އެވޯޑު ދިނުމަށް ބޭއްވި ޖަލްސާގައި، ބ. އަތޮޅުގެ އެންމެ ހިންގުންތެރި ތިން ރަށު ކައުންސިލް ހޮވާފައިވެއެވެ. އެގޮތުން ބ. އަތޮޅުގެ އެންމެ ޙިންގުންތެރި އެއްވަނަ ރަށު ކައުންސިލަކަށް ހޮވިފައިވަނީ، ބ. ކުޑަރިކިލު ކައުންސިލްއެވެ. އެކައުންސިލަށް ފައިސާގެ އިނާމެއްގެ ގޮތުގައި ފަންސާސް ހާސް ރުފިޔާ ދެއްވާފައިވެއެވެ. ކައުންސިލަށް އިނާމު ޙާވަލުކޮށްދެއްވީ، ދައުލަތަށް ގިނަ ދުވަހު ޚިދުމަތްކުރެއްވި ނިޝާން އިއްޒުއްދީން އިއްޒަތުގެ ވެރިޔާ އަބްދުއް ރަޝީދު ޙުސައިންއެވެ. ދެވަނައަށް އެންމެ ހިންގުންތެރި ރަށު ކައުންސިލަކަށް ހޮވިފައިވަނީ، ބ. މާޅޮހު ކައުންސިލްއެވެ. އެކައުންސިލަށް އިނާމެއްގެ ގޮތުގައި ތިރީސް ހާސް ރުފިޔާގެ ފައިސާގެ އިނާމެއް ދެއްވާފައިވެއެވެ. އަދި ތިންވަނައަށް ހޮވިފައިވަނީ، ބ.ގޮއިދޫ ކައުންސިލްއެވެ. އެ ފަރާތަށް ވިހިހާސް ރުފިޔާގެ ފައިސާގެ އިނާމެއް ދެއްވާފައިވެއެވެ.
ބ. އަތޮޅުގެ އެންމެ ޚިދުމަތްތެރި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮތުގައި، ހޮވުނީ، ކުޑަރިކިލު އަންހެނުންގެ ތަރައްޤީއަށް މަސައްކަތްކުރާ ކޮމިޓީއެވެ. އެކޮމިޓީއަށް އިނާމެއްގެ ގޮތުގައި ފަންސަވީސް ހާސް ރުފިޔާ ދެއްވާފައިވެއެވެ. ރަންނަ އެވޯޑު ދިނުމަށް ބ.އަތޮޅު ތަޢުލީމީ މަރުކަޒުގައި ބޭއްވި ޖަލްސާގައި ބ. އަތޮޅު ކައުންސިލްގެ ރައީސް މުޙައްމަދު އާދިލް ދެއްކެވި ވާހަކަގައި، އަތޮޅަށް އެކި ރޮނގު ރޮނގުން ޚިދުމަތްކޮށްދިން ފަރާތްތަކާއި، ރީތި ނަން ހޯދައިދޭ ފަރާތްތަކުގެ އަގު ވަޒަންކޮށް ހިތްވަރު ދިނުމަކީ ކައުންސިލުން ވަރަށް އިސްކަމެއް ދެއްވައިގެން ކުރެއްވި ކަމެއް ކަމަށެވެ.
''އަޅުގަނޑުމެން މިފަދަ އެވޯޑެއް ދެނީ އެފަރާތްތަކުގެ އަގު ވަޒަން ކުރުމުގެ ގޮތުން، މިގޮތަށް ކައުންސިލުން މިކަން ކުރީމައި އެފަރާތްތަކަށް ލިބޭނެ ވަރަށް ބޮޑު ހިތްވަރެއް ކަމަށް އަޅުގަނޑު ދެކެނީ، އެވޯޑު ދޭން މިދިޔަ އަހަރުވެސް ވަރަށް މަސައްކަތްކުރިން." ކައުންސިލުގެ ރައީސް އާދިލް ވިދާޅުވިއެވެ.
img:http://s2.psmnews.mv/images/660x400/14715949597521.jpg|ރަންނަ އެވޯޑް ދިނުމަށް ބޭއްވި ރަސްމިއްޔާތުގެ ތެރެއިން / ފޮޓޯ: އޭދަފުށި ޓައިމްސް
ރަންނަ އެވޯޑު ދިނުމަށް ބޭއްވި ޖަލްސާގައި، ބ.އަތޮޅު ކައުންސިލުން ދޭ ޚާއްސަ އެވޯޑެއްގެ ގޮތުގައި ޡާނަވީ އަދި މަތީ ޡާނަވީ ބައިން ހަ ފަރާތަކަށް އެވޯޑް ލިބުނުއިރު، ކުޅިވަރުގެ ބައިން ދެ ފަރާތަކުން އެވޯޑު ޙާސިލްކުރިއެވެ. މަތީ ދަރަޖަ ހޯދާ ފަރާތްތަކަށް ކައުންސިލުންދޭ ޚާއްސަ އެވޯޑު ޡާނަވީ ބައިން އެކަކަށް އެވޯޑު ލިބުނުއިރު، ޑިގްރީއިން ފެށިގެން މަތީ ދަރަޖައިގެ ބައިން ހަތަރު ފަރަތަކަށް އަދި ބައިނަލްއަޤްވާމީ މުބާރާތަކުން ރަންވަނަ ޙާސިލްކުރި އެއް ފަރާތަކަށް ވަނީ އެވޯޑު ދެއްޗާފައެއެވެ.
މީގެ އިތުރުން ބ.އަތޮޅަށް އެންމެ ޚިދުމަތްތެރި ދެ ރިސޯޓަށްވެސް އެވޯޑު ދީފައިވެއެވެ. އޭގެ ތެރޭގައި ހިމެނެނީ ދުސިޓް ތާނީ މޯލްޑިވްސްއާއި ރޯޔަލް އައިލެންޑް ރިސޯޓެވެ. މި ރިސޯޓަށް އެވޯޑު ޙަވާލުކޮށްދެއްވީ، ޕަބްލިކް ސަރވިސް މީޑިޔާގެ ޗީފް ކޮންޓެންޓް އޮފިސަރ އިބްރާޙީމް ރަޝީދުއެވެ.
ރަންނަ އެވޯޑު ދިނުމަށް ބޭއްވި ޖަލްސާގައި، އެކި ދާއިރާތަކުން ފާހަގަކޮށްލެވޭ ފަދަ ޚިދުމަތެއްކޮށް، އަދި. ބ.އަތޮޅަށް ރީތި ނަން ހޯދައިދީގެން ޖުމްލަ ތިރީސް ހަތް ފަރާތަކުން އެވޯޑު ޙާސިލްކޮށްފައިވެއެވެ.