ސުމޫދު ފްލޮޓިއްލާގެ ބޯޓުތައް ހިފެހެއްޓުން؛ ރައީސް ގޮވާލެއްވީ ޔަހޫދީ ދައުލަތުގެ ޢަމަލުތައް ހުއްޓުވުމަށް

އިންސާނީ އެހީ ހިފައިގެން ޣައްޒާއަށް ދަތުކުރަމުންދާ، ގްލޯބަލް ސުމޫދު ފްލޮޓިއްލާގެ ބޯޓުތައް ބައިނަލްއަޤްވާމީ ކަނޑުގެ ސަރަހައްދުން ހިފެހެއްޓުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހަރުކަށި އިބާރާތުން ކުށްވެރިކުރައްވައިފިއެވެ. ޔަހޫދީ ދައުލަތުގެ މި ޢަމަލު ރައީސުލްޖުމްހޫރިއްޔާ ކުށްވެރިކުރެއްވީ، މީސް މީޑިއާގައި ހިއްސާ ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ ގްލޯބަލް ސުމޫދު ފްލޮޓިއްލާގައި ދަތުރުކުރަމުންދިޔައީ އިންސާނީ އެހީގެ ސަމާނު ޣައްޒާއަށް ހިފައިގެން ކަމަށެވެ. އެ ބޯޓުތަކުގައި ތިބީ ހަތިޔާރު ނެތް، އާންމުން ކަމަށާއި އެ ބޯޓުތައް ބައިނަލްއަޤްވާމީ ކަނޑުގެ ސަރަހައްދުން ހިފަހައްޓާ ބިރުދެއްކުން ބަލައިނުގަނަވޭނެ ކަމަށެވެ. އެމަނިކުފާނު ވިދާޅުވީ ހާލުގައި ޖެހި އަސާސީ ހައްޤުތަކުން މަޙްރޫމް ވެފައި ތިބި ބަޔަކަށް، އިންސާނީ އެހީ ހިފައިގެންދާ ގާފިލާއަކާއި ދިމާކޮއްލުމަކީ އިންސާނިއްޔަތާއި އަދި ބައިނަލްއަޤްވާމީ ޤާނޫނުތަކާއިވެސް ޚިލާފްކަމެއްކަމަށެވެ.

ތަކުރާރުކޮށް ކުރަމުންދާ މިފަދަ ޢަމަލުތަކުން ޔަހޫދީ ދައުލަތުން ދަނީ ދުނިޔޭގެ އެހެން ޤައުމުތަކާއި އެއްފަރާތް ވަމުން ކަމަށާއި މިއީ އިންސާނީ ކަރާމާތަށް ހުރުމަތްތެރިކޮށް ނުހިތުން ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިއީ އަޅާލުމާއި ކުލުނު ނެތް ކަން ހާމަކޮށްދޭ ކަމެއް ކަމެއް ކަމަށްވެސް އެމަނިކުފާނު ވިދާޅުވިއެވެ. ރައީސްވަނީ ޔަހޫދީ ދައުލަތުން ތަކުރާރުކުރަމުންދާ މިޢަމަލުތައް ހުއްޓުވުމަށް ބައިނަލްއަޤްވާމީ މުޖްތަމަޢަށް ގޮވާލައްވާފައެވެ.

ރައީސުލްޖުމްހޫރިއްޔާ ޕޯސްޓު ނިންމަވާލެއްވީ، ދިވެހިން އަބަދުވެސް ތިބެނީ، ފަލަސްޠީނުގެ ރައްޔިތުންގެ އިންސާނީ ހައްޤުތައް ކަށަވަރުކޮށް އިންސާފު ހޯދައި ސުލްހައާއި ސަލާމަތްތެރިކަމަށް ކުރަމުންދާ މަސައްކަތުގައި އެކުގައި ކަމަށް ވިދާޅުވަމުންނެވެ.

ގްލޯބަލް ސުމޫދު ފްލޮޓިއްލާއަކީ ދިވެހިރާއްޖެ ހިމެނޭހެން 44 ޤައުމެއްގެ ރައްޔިތުން އިސްވެ، ޣައްޒާ ހިސާރުން ނައްތާލައި ޣައްޒާގެ ހާލުގައި ޖެހިފައިވާ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ކަނޑުމަގުން ދަތުރު ކުރަމުންދާ ގާފިލާއެކެވެ. މި ބޯޓުތަކުގައި 500 އަށްވުރެ ގިނަ މީހުން ތިބިއިރު، އެ ގާފިލާއަށް ޔަހޫދީ ދައުލަތުން ހުރަސް އަޅައި އެ ބޯޓުތަކުން ދަތުރުކުރަމުންދިޔަ ބައެއް މީހުން ވަނީ ހައްޔަރުކޮށްފައެވެ.

Strongly condemn Israel’s interception of the Global Sumud Flotilla in international waters, unarmed civilian vessels carrying vital humanitarian aid to Gaza. Such intimidation is unacceptable and must not be tolerated. Targeting a humanitarian convoy carrying relief to a…

— Dr Mohamed Muizzu (@MMuizzu) October 2, 2025

ސުމޫދު ފްލޮޮޓިއްލާގެ ހަރަކާތުގައި ބައިވެރިވާ އެކްޓިވިސްޓުންގެ އަދަދު 500އަށް އަރާއިރު، އޭގެތެރޭގައި ބައެއް ޤައުމުތަކުގެ ޤާނޫނު ހަދާ މަޖިލީހުގެ މެންބަރުންނާއި، ޤާނޫނީ ވަކީލުން ވެސް ހިމެނެއެވެ. އެ މީހުން ވެސް ވަނީ، ޔަހޫދީ ސިފައިން ހަތިޔާރާއެކު އުޅަނދުތަކަށް އަރައިގަންނަ މަންޒަރުތައް ފެންނަ ވީޑިއޯތަކެއް ޢާންމު ކޮށްފައެވެ. ޔަހޫދީ ސިފައިންގެ ބެލުމުގެ ދަށަށް އެ މީހުން ގެންދިއުމަކީ ޣައިރު ޤާނޫނީ ކުށެއްގެ ގޮތުގައި އެމީހުންވަނީ ސިފަކޮށްފައެވެ. ސުމޫދު ފްލޮޓިއްލާގެ މިދަތުރުގައި ދިވެހިރާއްޖެއިން އިންޓަނޭޝަނަލް އެއިޑް ކެމްޕެއިންގެ ސެކްރެޓަރީ ޖެނެރަލް އިބްރާހީމް ޝާޒް ދަނީ ބައިވެރިވަމުންނެވެ.

ފްލޮޓިއްލާގެ ދަތުރު އިންތިޒާމު ކުރާ ފަރާތުން ބުނީ، އެ ފްލޮޓިއްލާގައި ހިމެނޭ 13 އުޅަނދަކަށް ޔަހޫދީ ސިފައިން އަރައިގަނެ، ހުއްޓުވާފައިވާ ކަމަށެވެ. އަދި، އިތުރު 30 އުޅަނދު މިހާރު ވެސް ޣައްޒާއަށް ދަތުރު ކުރަމުންދާ ކަމަށް އެ ފަރާތުން ބުންޏެވެ.