ކަޝްމީރުގެ އިންޑިޔާފަޅި ކަމަށްވާ ޖަންމޫ ކަޝްމީރުގައި ހިނގަމުންދާ ހަމަނުޖެހުންތަކުގައި ގެއްލުންލިބިފައިވާ ފަރާތްތަކަށް އިންސާނީ އެހީ ފޯރުކޮށްދިނުމަށް ޕާކިސްތާނުން ހުށައެޅި ހުށައެޅުމަކަށް އިންޑިޔާއިން ދެކޮޅު ހަދައިފިއެވެ. img:http://s4.psmnews.mv/images/660x400/14712368977598.jpg|ޖައްމޫ ކަޝްމީރުގެ އެންމެ ބޮޑު ސިޓީ އަދި ވެރިރަށް ސްރީނަގަރުގައި ހިނގަމުންދާ ހަމަނުޖެހުންތަކުގެ ތެރެއިން - ފޮޓޯ: ޝިންހުއާ ނިއުސް
އިންޑިޔާގެ ޚާރިޖީ ވުޒާރާގެ ތަރްޖަމާން ވިކާސް ސްވަރާޕް ވިދާޅުވީ ޖަންމޫ ކަޝްމީރަށް އިންސާނީ އެހީގެ ތަކެތި ފޯރުކޮށްދިނުމަށް ޕާކިސްތާނުން ހުށައެޅި ހުށައެޅުން އެއްގޮތަކަށްވެސް ގަބޫލު ނުކުރެވޭނެ ކަމަށާއި، އެކަމަށް އިންޑިޔާއިން ކަނޑައެޅިގެން ދެކޮޅު ހަދާ ކަމަށެވެ. ޖަންމޫ ކަޝްމީރުގައި ހިނގަމުންދާ ހަމަނުޖެހުންތަކުގައި ގެއްލުން ލިބިފައިވާ ފަރާތްތަކަށް އިންސާނީ އެހީ ފޯރުކޮށްދިނުމުގެ ފުރުޞަތު ދިނުމަށް ޕާކިސްތާނުން ހުށަހަޅާފައިވަނީ ޖަންމޫ ކަޝްމީރުގެ ހަމަނުޖެހުންތަކުގައި ޒަޚަމްވެފައިވާ އާންމުންނަށް ސިއްޙީ އެހީފޯރުކޮށްދޭން ޕާކިސްތާން ބޭނުންވާ ކަމަށް ވިދާޅުވެ ޕާކިސްތާނުގެ ބޮޑުވަޒީރު ނަވާޒް ޝަރީފު ވާހަކަ ދައްކަވާފައި ވަނިކޮށެވެ. img:http://s3.psmnews.mv/images/660x400/14712369206984.jpg|ޖައްމޫ ކަޝްމީރުގެ އެންމެ ބޮޑު ސިޓީ އަދި ވެރިރަށް ސްރީނަގަރުގައި ހިނގަމުންދާ ހަމަނުޖެހުންތަކުގެ ތެރެއިން - ފޮޓޯ: ޝިންހުއާ ނިއުސް
ޕާކިސްތާނުން ވަނީ ޖަންމޫ ކަޝްމީރުގެ ހަމަނުޖެހުންތަކުގައި ޒަޚަމްވެފައިވާ އާންމުންނަށް ސިއްޙީ ފަރުވާ ނުލިބޭކަމަށް ތުހުމަތުކޮށް ބައިނަލްއަޤްވާމީ ފަރާތްތަކަށް ޝަކުވާވެސް އުފުލާފައެވެ. ޖަންމޫ ކަޝްމީރުގައި މިހާރު ހިނގަމުންދާ ހަމަނުޖެހުންތައް ފެށިފައިވަނީ މިދިޔަ ޖުލައިމަހު އިންޑިޔާގެ ސަލާމަތީ ބާރުތަކުން ދިން ޙަމަލާތަކެއްގައި ކަޝްމީރުގެ ހިޒްބުލް މުޖާހިދީން ޕާޓީގެ ލީޑަރު ބުރްހާން ވާނީ މަރުވުމާ ގުޅިގެންނެވެ.