ނިއު ރޭޑިއަންޓް ސްޕޯޓްސް ކުލަބުގެ ކޯޗުކަން ލިބުމުން ކޯޗިން ސީވީ ފުރިހަމަވެއްޖެ ކަމަށް ތަޖުރިބާކާރު ކޯޗު އަލީ ސުޒެއިން ބުނެފިއެވެ.
ނިއު ރޭޑިއަންޓާ ހަވާލުވުމަށްފަހު "ޕީއެސްއެމް ނިއުސް" އަށް ދިން ޚާއްސަ އިންޓަވިއުއެއްގައި ސުޒެއިން ބުނީ މިހާރު މިއީ އޭނާގެ ކޯޗިން ކެރިއަރުގެ ފަހު ދުވަސްތައް ކަމަށާއި، އެހެންކަމުން ކޯޗިން ދާއިރާއާ ވަކިވުމުގެ ކުރިން ނިއު ރޭޑިއަންޓުގެ ކޯޗުކަންކޮށްލަން ލިބުމުން ސީވީ ފުރިހަމަވެއްޖެ ކަމަށް ގަބޫލުކުރާ ކަމަށެވެ.
"އަޅުގަނޑުގެ ފުޓުބޯޅައިގެ އެންމެ ފަހުކޮޅު މިއީ. ދެން ކެރިއަރުގެ އެންމެފަހު ދުވަސްކޮޅު ކޯޗިންގައި މިދަނީ. ދެ އަހަރު ފަސް އަހަރެއް ނިމުނީމަ ނިމުނީ. އެހެންވީމަ އަޅުގަނޑުގެ ސީވީވެސް ފުރިހަމަވެގެންދާނެ ކަމަށް އަޅުގަނޑު ގަބޫލުކުރަނީ. އެއީ ގައުމީ ޓީމުގެ ހެޑް ކޯޗުކަންކޮށްފައި، ދެން ނިއު ރޭޑިއަންޓުގެ ކޯޗުކަން ކޮށްލީމަ ދެން ރާއްޖެގައި މިކަން ކުރެވޭނެ ހުރިހާ ގޮތަކަށް ކުރެވުނީ ކަމަށް އަޅުގަނޑު ގަބޫލުކުރަނީ" ސުޒެއިން ބުންޏެވެ.
ރާއްޖޭގެ ފުޓްބޯޅައިގެ ރަން ދުވަސްވަރު ނިއު ރޭޑިއަންޓާ އެންމެ ވާދަވެރި ވިކްޓަރީ ސްޕޯޓްސް ކުލަބުން ހޯދި ކާމިޔާބީތަކުގެ މުގުލުގައި ހުރި ކޯޗު ބުނީ ނިއު ރޭޑިއަންޓާ ހަވާލުވަނީ ފޮނި އުއްމީދުތަކަކާއެކު ކަމަށެވެ. ޓީމާ އަލަށް ގުޅުނު ވަރުގަދަ މޮޅެތި ކުޅުންތެރިންނާއެކު އަމާޒަކީ ނިއު ރޭޑިއަންޓް މިހާރު އޮތް ފެންވަރަށްވުރެ މައްޗަށް ޖައްސާލުން ކަމަށް ސުޒެއިން ފާހަގަކުރިއެވެ.
"ނިއު ރޭޑިއަންޓާއެކު ކާމިޔާބު ހޯދުން އެއީ ހަމަގައިމުވެސް އަޅުގަނޑުގެ އެންމެ ބޮޑު ވިސްނުން. އަޅުގަނޑު ނިއު ރޭޑިއަންޓާ ހަވާލުވުމުގެ ވާހަކަތައް ފެތުރިގެން ދިޔަތަނުން ހަމަ އޭގެ އަނެއް ދުވަހު ނިއު ރޭޑިއަންޓުގެ ބާނީ ވަހީދު އަޅުގަނޑަށް ގުޅުއްވި. ގުޅުއްވާފައި ވަރަށް ހިތްވަރުދެއްވި. އަދި ވަރަށް އުފާކޮށް، އެކަމާ އަޅުގަނޑަށް މަރުހަބާވެސް ކި. އެދެން ވަރަށް ބޮޑު އިތުބާރަކާއި ހިތްހަމަޖެހުމެއް ލިބިގެންދިޔަ ކަމެއް. އެއީ ނިއު ރޭޑިއަންޓް އާއިލާ އަޅުގަނޑާ ދޭތެރޭ ދެކެނީ ކޮންގޮތެއްތޯ ވަރަށް ރަނގަޅު ތަސައްވުރެއް އަޅުގަނޑަށް ލިބިގެންދިޔަ ވަހީދު ގުޅުއްވާ އެ ދެއްވި ހިތްވަރާއި، އެ ދެއްކެވި ވާހަކައިން" ސުޒެއިން ބުންޏެވެ.
އަންނަ މަހު ފެށޭ ފުޓްބޯޅަ ސީޒަނަށް ނިއު ރޭޑިއަންޓުން ވަނީ ޓީމު ވަރުގަދަކުރުމުގެ ގޮތުން ނަން މަޝްހޫރު ގިނަ ކުޅުންތެރިންތަކެއްގެ ސޮއި ހޯދާފައެވެ. އޭގެ ތެރޭގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) އާއި، މާޒިޔާ ސްޕޯޓްސް އެންޑް ރެކްރިއޭޝަނަށް ކުޅުނު ގައުމީ ޓީމުގެ ފޯވާޑް އަލީ ފާސިރު (ސެންޓޭ) ގެ އިތުރުން، މާޒިޔާގެ މުހިންމު ދެ ކުޅުންތެރިން ކަމަށްވާ ހަސަން ރާއިފް އަޙްމަދު (ހަންނަ) އާއި އަޙްމަދު އިރުފާން (އިރޭ) ހިމެނެއެވެ. އަދި ސުޕަ ޔުނައިޓެޑް ސްޕޯޓްސް (ސަސް) އިން މީގެ ކުރިން ފާހަގަކޮށްލެވުނު މޮޅެތި ކުޅުންތެރިން ކަމަށްވާ މުޙައްމަދު ނިޒާމް (ޕީކޭ) އާއި އަހުނަފް ރަޝީދު (އަހުއްކޮ) އަދި މުޙައްމަދު ސަޚާއު (ބޭލް) ވެސް ވަނީ ނިއު ރޭޑިއަންޓަށް ސޮއިކޮށްފައެވެ.
ޓީމުގެ ސްކޮޑާ ގުޅޭގޮތުން ސުޒެއިން ބުނީ އުއްމީދަކީ އެ ކުޅުންތެރިންނާއެކު ނިއު ރޭޑިއަންޓް މިހާރު އޮތް ހިސާބުން މައްޗަށް ހިއްލާލުން ކަމަށެވެ. އެހެންކަމުން އެ އަމާޒަށް ވާސިލުވުމަށް ޓީމާއެކު މަސައްކަތްކުރާނެކަން އޭނާ ފާހަގަކުރިއެވެ.
"ނިއު ރޭޑިއަންޓް ކުރިއަށް އޮތް ސީޒަނުގައި ދެންމެ ޗެއާމަން ފާހަގަކުރެއްވިހެން ކޮންމެ ހިސާބެއްގައި އޮތްކަމަށް ވިޔަސް، އެ އޮތް ހިސާބުން އެއަށްވުރެ މައްޗަށްދާން ކާމިޔާބީ ހޯދަން އަޅުގަނޑު މިހަވާލުވީ. ދެން މީގަ ރަނގަޅު ކުޅުންތެރިންތަކެއްވެސް އަތުވެއްޖެ. އެ ކުޅުންތެރިންނާ އެއްކޮށް އިރާދަކުރެއްވިއްޔާ އަޅުގަނޑު ބޭނުންވާ ހިސާބަށް ނިއު ރޭޑިއަންޓާއެކު ދެވޭނެކަމުގެ ވަރަށް ބޮޑު އުއްމީދެއް އެބައޮތް" ސުޒެއިން ބުންޏެވެ.