މިނިސްޓްރީ އޮފް ޖެންޑަ އެންޑް ފެމިލީއާއި އެ މިނިސްޓްރީގެ ދަށުން ހިންގާ މުއައްސަސާތަކުގައި، ކުރަމުންދާ މަސައްކަތް ދަސްކުރުމުގެ ފުރުޞަތު އެމިނިސްޓްރީން ހުޅުވާލައްވައިފިއެވެ.
ޖެންޑަރ މިނިސްޓްރީން މައުލޫމާތުދެއްވާ ގޮތުގައި "އިންޓަރންޝިޕް ޕްރޮގްރާމް" ގެ ނަމުގައި ހުޅުވާލި މި ފުރުޞަތުގައި، އެމިނިސްޓްރީއާއި، މިނިސްޓްރީގެ ދަށުން 19 އަތޮޅެއްގައި ޤާއިމް ކުރައްވާފައިވާ ފެމިލީ އެންޑް ޗިލްޑްރެން ސާވިސް ސެންޓަރުތަކާއި، ކުޑަކުދިންގެ ހިޔާއާއި، އަމާން ހިޔާގެ މަސައްކަތްތައް ދަސްކުރުމުގެ މަގު އެމިނިސްޓްރީން ފަހިކޮށްދެއްވާނެއެވެ.
މިނިސްޓްރީން ވިދާޅުވާގޮތުގައި، މި އިންޓާންޝިޕްގެ މައިގަނޑު އަމާޒަކީ މިނިސްޓްރީގެ މޭންޑޭޓްގައި ހިމެނޭ މަސައްކަތްތައް ކުރިޔަށްގެންދާ މައިގަނޑު ދާއިރާތައް ކަމަށްވާ އަންހެނުންނާއި، ކުޑަކުދިންނާއި، އުމުރުން ދުވަސްވީ މީހުންނާއި، ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ކުރިއަރުވާ ހިމާޔަތް ކުރުމަށްޓަކައި ކުރާ މަސައްކަތާއި، އިޖްތިމާޢީ މަސައްކަތުގެ ދާއިރާއާއި، އިޖްތިމާޢީ މަސައްކަތްތަކުގައި ޙަރަކާތްތެރިވުމަށް ޝައުޤުވެރިވާ އަދި އެދާއިރާތަކުން ތަމްރީން ލިބިގަތުމަށް ބޭނުންވާ ފަރާތްތަކާއި، އެދައިރާތަކުން ތައްލީމް ޙާޞިލް ކުރަމުންދާ ފަރާތްތަކަށް މަސައްކަތުގެ ޢަމަލީ މަސައްކަތް ތަޖުރިބާ ކުރުމުގެ މަގު ފަހިކޮށްދިނުމެވެ.
ޖެންޑަރ މިނިސްޓްރީން ވިދާޅުވާ ގޮތުގައި، އިންޓަންޝިޕްގެ ތެރެއިން، އިދާރީ މަސައްކަތްތަކާއި، މިނިސްޓްރީގެ މޭންޑޭޓުގައި ހިމެނޭ ޢާއްމުން ހޭލުންތެރި ކުރުމުގެ މަސައްކަތާގުޅޭ އަސާސީ ހުނަރާއި، އިޖްތިމާޢީ ރައްކާތެރިކަން ކަށަވަރުކޮށްދެއްވުމަށް އެމިނިސްޓްރީން ކުރިޔަށް ގެންދަވާ މަސައްކަތްތަކާއި ގުޅުންހުރި މައްލޫމާތާއި ހުނަރު ދަސްކޮށްދެވޭނެއެވެ.
އިންޓާންޝިޕާއި ބެހޭ މަޢުލޫމާތާއި މިންގަނޑުތައް، އެމިނިސްޓްރީގެ ވެބްސައިޓްގައި ވަނީ އާއްމުކޮށް ފެންނާނެހެން ޝާއިޢުކުރައްވާފައެވެ. އަދި ބައިވެރިވުމަށް އެދޭ ފަރާތްތަކަށް އޮންލައިންކޮށް ވެސް ހުށައެޅުމުގެ ފުރުޞަތު އިއްޔެއިން ފެށިގެން މިނިސްޓްރީން ވަނީ ހުޅުއްވާލައްވާފައެވެ.