ދެކުނު އޭޝިޔާގެ ބޮޑު ދެ ބާރު ކަމުގައިވާ އިންޑިޔާއާއި ޕާކިސްތާނާ ދެމެދު ބޮޑު ހަނގުރާމައެއް ފެށިދާނެކަމުގެ ބިރުހީވެފައިވަނިކޮށް އިންޑިޔާއިން ޕާކިސްތާނަށް ވަރުގަދަ މިސައިލް ޙަމަލާއެއް ދީފިއެވެ.
އިންޑިޔާގެ ސަރުކާރުން ނެރުނު ބަޔާނެއްގައި ބުނެފައި ވަނީ އޮޕަރޭޝަން ސިންދޫރުގެ ދަށުން ޕާކިސްތާނުގެ ނުވަ ސަރަޙައްދަކަށް ޙަމަލާ ދީފައިވާނެ ކަމަށެވެ. އަދި އެއީ އިންޑިޔާއާ ދެކޮޅު ހަނގުރާމަވެރިންނަށް ޢަމާޒުކޮށް ދިން ޙަމަލާއެއް ކަމަށާއި ޕާކިސްތާނުގެ އެއްވެސް އަސްކަރީ މަޤާމަކަށް ޙަމަލާ ދީފައި ނުވާނެ ކަމަށް ވެސް އިންޑިޔާއިން ބުނެފައިވެއެވެ. އެ ޤައުމުން ދެކޭ ގޮތުގައި ދާދިފަހުން ފަތުރުވެރިންގެ ބަޔަކަށް ދިން ޙަމަލާގެ ބަދަލު މިހާރު މި ވަނީ ހިފިފައެވެ.
އިންޑިޔާއިން ދިން ޙަމަލާގެ ސަބަބުން ތިން މީހުން މަރުވެ 12 މީހުން ވަނީ ޒަޚަމުވެފައެވެ. ނަމަވެސް ޕާކިސްތާނުގެ މުޒައްފަރުއާބާދުން ވަނީ ކަރަންޓު ކެނޑިފައެވެ. ޕާކިސްތާނުން ރައްދުގައި ވަރުގަދަ ޙަމަލާއެއް އިންޑިޔާއަށް ދޭނެ ކަމަށެވެ. އަދި އިންޑިޔާގެ ޙަމަލާ ޢަމާޒުކޮށްފައި ވަނީ ޢާންމުންނަށް ކަމަށް ވެސް ޕާކިސްތާނުން ވަނީ ބުނެފައެވެ.
މިދިޔަ މަހުގެ 22 ވަނަ ދުވަހު، އިންޑިޔާގެ ކަޝްމީރުގައި ފަތުރުވެރިން ތިބި ސަރަޙައްދަކަށް ހަތިޔާރު އެޅި ބަޔަކު ވަދެ، ބަޑިން ޙަމަލާދީ 26 މީހުން ވަނީ މަރާލައިފައެވެ. އެ ޙަމަލާދިން ތިން މީހުން ހޯދުމަށް އިންޑިޔާއިން ވަރުގަދަ އަސްކަރީ ޙަރަކާތެއް ހިންގަމުންދާއިރު، އޭގެ ތެރެއިން ދެ މީހުންނަކީ ޕާކިސްތާނަށް ނިސްބަތްވާ މީހުން ކަމަށް އިންޑިޔާއިން ވަނީ ތުހުމަތުކޮށްފައެވެ.
އިންޑިޔާއާއި ޕާކިސްތާނުން ވަނީ މިހާތަނަށް ހަތަރު ހަނގުރާމައެއް ކޮށްފައެވެ. އޭގެ ތެރެއިން ތިން ހަނގުރާމަ ކޮށްފައި ވަނީ ކަޝްމީރުގެ މައްސަލާގައެވެ.