ރާއްޖޭގެ ފުޓްބޯޅަ އެސޯސިއޭޝަނުގެ ނޯމަލައިޒޭޝަން ކޮމިޓީން އޭއެފްސީގެ ރައީސް ޝެއިޚް ސަލްމާން ބިން އިބްރާހީމް އަލް ޚަލީފާއާ ބައްދަލުކޮށްފިއެވެ.
މި ބައްދަލުކުރުން އޮތީ މީގެ ދެ ދުވަސް ކުރިން ސްރީ ލަންކާގައެވެ. އެއީ ލަންކާގައި ބޭއްވި ސާފް ފެޑަރޭޝަނުގެ އެކްސްޓްރާ އޯޑިނަރީ ކޮންގްރެސްގެ ހަވާސާގައި ކަމަށް އޭއެފްސީން މައުލޫމާތުދެ އެވެ. އޭޝިޔާގެ މައި ފުޓްބޯޅަ އިދާރާއިން ބުނެފައިވަނީ ދެކުނު އޭޝިޔާގެ މެމްބަރު ހަތް ގައުމާއެކު ރައީސް ސަލްމާން ވަކިވަކިން ބައްދަލުކޮށް އެ ގައުމުގެ ފުޓްބޯޅައިގެ ހަރަކާތްތަކާ ބެހޭ ގޮތުން މަޝްވަރާކޮށްފައިވާ ކަމަށެވެ.
ރާއްޖެއިން މި ކޮންގްރެސްގައި ތިން މީހަކު ބައިވެރިވިއެވެ. އެއީ އެފްއޭއެމުގެ ނޯމަލައިޒޭޝަން ކޮމިޓީގެ ރައީސް އަޙްމަދު މުއިއްޒު އާއި ޖެނެރަލް ސެކްރެޓަރީ ޝުޖާއު އާއި އެފްއޭއެމުގެ ކުރީގެ ނައިބް ރައީސް އަލީ އުމަރެވެ. މީގެ ތެރެއިން އަލީ އުމަރު ބައިވެރިވީ ސާފްގެ ހިންގާ ކޮމިޓީގެ މެމްބަރެއްގެ ހައިސިއްޔަތުންނެވެ.
ރާއްޖެގެ ފުޓްބޯޅަ ފެޑަރޭޝަން ފީފާއިން ނޯމަލައިޒް ކުރީ މިދިޔަ އަހަރުގެ ޖޫން މަހު އެވެ. އެއީ އެފްއޭއެމުގެ ހިންގުން ދޯދިޔާވުމާއި މާލީ އެތައް މައްސަލަތަކާހުރެ އެވެ. އެންމެ ފުރަތަމަ އެކުލަވާލި ފަސް މެމްބަރުންގެ ކޮމިޓީގެ ބަދަލުގައި ފަހުން ނޯމަލައިޒޭޝަން ކޮމިޓީ ވަނީ ތިން މެމްބަރުންނަށް ކުޑަކޮށްފަ އެވެ.