ހުސްވެފައިވާ ބްރެޒިލްގެ ގައުމީ ފުޓްބޯޅަ ޓީމުގެ ކޯޗުކަން ތަޖުރިބާކާރު ކޯޗު މެނުއަލް ޕެލެގްރީނީއަށް ދޭން މަސައްކަތް ފަށައިފިއެވެ. ސްޕެއިންގެ މީޑިއާތަކުން ރިޕޯޓުކޮށްފައިވާ ގޮތުގައި ބްރެޒިލްގެ ފުޓްބޯޅަ ފެޑަރޭޝަނުން މިހާރު ވަނީ ޕެލެގްރީނީއާ ރަސްމީކޮށް މަޝްވަރާކުރަން ތައްޔާރުވެފައެވެ.
ޕެލެގްރީނީ މިވަގުތު ކޯޗުކޮށްދެމުން ދަނީ ސްޕެއިނުގެ ރެއާލް ބެޓިސްއަށެވެ. އުމުރުން 71 އަހަރުގެ ޕެލެގްރީނީގެ މަގާމާމެދު މި ސީޒަނުގެ ކުރީކޮޅު ސުވާލު އުފެދުނެވެ. ނަމަވެސް އޭނާ ވަނީ މަޑުމަޑުން ނަތީޖާ ރަނގަޅު ކުރަމުން އައިސް ސްޕެނިޝް ލީގު ތާވަލުގެ ހަވަނައަށް ކުރިއަށް ޖެހިލައިފަ އެވެ. އަދި އޭނާ ވަނީ 2022 ވަނަ އަހަރުގެ ސްޕެނިޝް ކަޕް ރެއާލް ބެޓިސްއަށް ކާމިޔާބުކޮށްދީފައެވެ.
2020 ވަނަ އަހަރު ބެޓިސްއާ ހަވާލުވުމުގެ ކުރިން ޕެލެގްރީނީ ވަނީ 2014 ވަނަ އަހަރު މެންޗެސްޓާ ސިޓީއަށް އިނގިރޭސި ޕްރިމިއާ ލީގު ކާމިޔާބުކޮށްދީފައެވެ. އަދި އެ ޓީމަށް ދެ ފަހަރެއްގެ މަތީން އިނގިރޭސި ލީގު ކަޕުވެސް ހޯދައިދިނެވެ.
އޭގެ ކުރިން އޭނާ ވަނީ 2009 ވަނަ އަހަރު ސްޕެއިނުގެ ރެއާލް މެޑްރިޑަށްވެސް ކޯޗުކޮށްދީފަ އެވެ. މީގެ އިތުރުން އޭނާ ކޯޗުކޮށްދިން މަޝްހޫރު ޓީމުތަކުގެ ތެރޭގައި އާޖެންޓީނާގެ ރިވަޕްލޭޓާއި, ސްޕެއިނުގެ ވިޔަރެއާލް އަދި މަލާގާ އާއި، އިނގިރސިވިލާތުގެ ވެސްޓް ހޭމް ޔުނައިޓެޑް ހިމެނެއެވެ.
ބްރެޒިލްއިން ޕްލެގްރީނީއަށް ކޯޗުކަންދޭން ގަސްތުކުރީ ތަޖުރިބާކާރު އަދި ކާމިޔާބު ކޯޗަކަށް ގައުމީ ޓީމު ހަވާލުކުރަން ބޭނުންވާތީއެވެ. އަދި އޭނާ އަކީ ދެކުނު އެމެރިކާގެ ފުޓްބޯޅަ އެނގޭ ތަޖުރިބާކާރު ކޯޗަކަށްވެސް ވާތީއެވެ.
ތަޖުރިބާކާރު ކޯޗެއް ހޯދުމުގެ ގޮތުން ބްރެޒިލްއިން އެންމެ ފުރަތަމަ ބޭނުންވީ ރެއާލް މެޑްރިޑުގެ މިހާރުގެ ކޯޗު އިޓަލީގެ ކާލޯ އަންޗެލޮޓީއަށް ކޯޗުކަން ދިނުމަށެވެ. ނަމަވެސް ރެއާލްގައި ހުރެފައި އޭނާ މިވަގުތު ބްރެޒިލާ މިވަގުތު ހަވާލުނުވާނެކަން މިހާރު ވަނީ ޔަގީންކުރެވިފައެވެ.