ތުރުކިޔޭގެ ފެނަބާޗޭގެ ކޯޗު ޖޯސޭ މޮރީނިއޯ، ވާދަވެރި ގަލަތަސަރާއީގެ ކޯޗު އޮކާން ބުރުކަށް ހަމަލާދިންކަމުގެ ތުހުމަތުކޮށްފިއެވެ.
ޓާކިސް ކަޕްގައި މި ދެ ޓީމު ރޭ ފެނަބާޗޭގެ ދަނޑުގައި ކުޅުނު މެޗު ނިމުނު ފަހުން ދެ ކޯޗުން ވަނީ ދަނޑު މައްޗަށް އަރާ ރެފްރީންނާއި ވާހަކަ ދައްކާފަ އެވެ. އަދި އޭގެ ފަހުން ފެނުނީ އޮކާން ބުރުކް މޫނުމަތީގައި އަތް އަޅައިގެން ދަނޑު މައްޗަށް ވެއްޓުނު މަންޒަރެވެ.
މެޗަށްފަހު ގަލަތަސަރާއީގެ ނައިބް ރައީސް މެޓިން އޮޒްޓޫކް ބުނެފައިވަނީ ރެފްރީންނާއި ވާހަކަ ދެއްކުމަށްފަހު މޮރީނިއޯ އޮކާންގެ ފަހަތުން އައިސް އޭނާގެ ނޭފަތުގައި ޖަހާފައިވާ ކަމަށެވެ.
"މޮރީނިއޯ ވަނީ ފަހަތުން އައިސް އޮކާންގެ ނޭފަތުގައި ޖަހާފައި. މިއީ ދުނިޔޭގެ އެއްވެސް ގައުމެއްގައި މިފަދަ ކަމެއް ފެންނާނެ ގޮތެއް ނޫން. އަދި ފުޓްބޯޅަ ފެޑަރޭޝަނުން މި މައްސަލަ ބެލުމުގެ ކުރިން ފެނަބާޗޭއިން މި މައްސަލަ ބަލަން އަހަރެން ގޮވާލަން." މެޓިން ބުންޏެވެ.
މެޗަށްފަހު އޮތް ނޫސްވެރިން ބައްދަލުވުމުގައި ކޯޗު އޮކާން ބުނެފައިވަނީ އޭނާ އާއި މޮރީނިއޯ އާއި ދެމެދު އެއްވެސް މައްސަލައެއް ނެތް ކަމަށާއި ނަމަވެސް އޭނާގެ ނޭފަތުގައި މޮރީނިއޯ ހިފާފައިވާ ކަމަށެވެ.
"އަހަރެންނާއި މޮރީނިއޯ އާއި ދެމެދު އެއްވެސް މައްސަލައެއް ނެތް. އަހަރެންގެ ނޭފަތުގައި އޭނާ އައިސް ހިފި އަދި ކޮންމެވެސް ވަރަކަށް ހަންގަނޑު މަށައިގެން ގޮސްފައި ހުރީ. އެއީ އެއްގޮތަކަށްވެސް ރީތި އަދި ރަގަޅު ކަމެއް ނޫން." ކުރިން ފެނަބާޗޭއަށް ކުޅުނު އޮކާން ބުންޏެވެ.
އޮކާން އިތުރަށް ބުނެފައިވަނީ ޓީމުތަކުގެ ކޯޗުންގެ ފަރާތުން މިއަށްވުރެ ރަގަޅު އަހުލާގެއް ފެންނަން ޖެހޭނެ ކަމަށާއި އޭނާ މި މައްސަލަ އިތުރަށް ބޮޑުކުރަން ބޭނުންނުވާ ކަމަށެވެ.
މި މެޗުން 2-1 ގެ ނަތީޖާއަކުން ފެނަބާޗޭ ވަނީ ބަލިވެ މުބާރާތުން ކަޓާފަ އެވެ. ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގައި ރެފްރީ ވަނީ ތިން ރަތް ކާޑު ދައްކާފަ އެވެ. އެ ގޮތުން ގަލަތަސަރާއީގެ ދެ ކުޅުންތެރިންނަށް ރަތް ކާޑު ދައްކާފައިވާއިރު ފެނަބާޗޭގެ އެއް ކުޅޫންތެރިއަކަށް ރެފްރީ ވަނީ ރަތް ކާޑު ދައްކާފަ އެވެ.
ޓާކިޝް ލީގުގެ މިދިޔަ ފެބްރުއަރީ މަހު މި ދެ ޓީމު ބައްދަލުކުރި މެޗަށްފަހު ގަލަތަސަރާއީގެ އޮފިޝަލުންނާއި ނަސްލީގޮތުން ދިމާކޮށްފައިވާކަމަށް ބުނެ މޮރީނިއޯ އެ ގައުމުގެ ފުޓްބޯޅަ ފެޑަރޭޝަނުން ވަނީ ހަތަރު މެޗަށް ސަސްޕެންޑްކޮށް 35194 ޕޮއިންޑުން ޖުރިމަނާކޮށްފަ އެވެ.