އިނގިރޭސި ޕްރިމިއަރ ލީގުގައ ރޭ އެވަޓަންއާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، ތާވަލުގެ ކުރީގައި 12 ޕޮއިންޓުގެ ލީޑެއް ލިވަޕޫލްއިން ހޯދައިފިއެވެ.
މި މެޗުން ލިވަޕޫލް މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން 73 ޕޮއިންޓް ލިބިފަ އެވެ. އަދި ދެވަނައިގައި އޮތް އާސެނަލް އަށް 61 ޕޮއިންޓް ލިބިފައިވާއިރު ތިންވަނައިގައި އޮތް ނޮޓިންހަމް ފޮރެސްޓަށް ލިބިފައިވަނީ 57 ޕޮއިންޓެވެ. މި މެޗުން ބަލިވި އެވަޓަން އަށް ލިބިފައިވާ 34 ޕޮއިންޓާއެކު އެ ޓީމު އޮތީ ތާވަލުގެ 15 ވަނައިގަ އެވެ.
ޕްރިމިއާ ލީގުގައި ބާކީ އަށް މެޗު ކުޅެންއޮއިރު ލީގު ޗެމްޕިއަންކަން ހޯދުމަށް ލިވަޕޫލް އަށް ދެން ބޭނުންވަނީ 13 ޕޮއިންޓެވެ. އަދި ދެވަނައިގައި އޮތް އާސެނަލް އަށް ކުރިއަށްހުރި މެޗުތަކުން ހޯދޭ ނަތީޖާއަކުން ލިވަޕޫލް ހޯދަންޖެހޭ ޕޮއިންޓުގެ އަދަދު މަދުވެގެންދާނެ އެވެ.
ލިވަޕޫލްގެ އެންފީލްޑްގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 57 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ލުއިސް ޑިއާޒްގެ އެސިސްޓަކުން ޑިއެގޯ ޖޮޓާ އެވެ.
ލިވަޕޫލް އިން ލަނޑު ޖެހުމުގެ ކުރިން އެވަޓަންގެ ޑިފެންޑަރ ޖޭމްސް ޓާކޮސްކީ ލިވަޕޫލްގެ އެލެކްސިސް މެކަލިސްޓަރ އަށް ކުރި ނުރައްކާތެރި ފައުލަކާއި ގުޅިގެން ރެފްރީ އޭނާއަށް ރީނދޫ ކާޑެއް ދައްކާފައިވާތީ އެކަމާއި ލިވަޕޫލްގެ ކުޅުންތެރިންނާއި އޮފިޝަލުން ވަނީ ހިތްހަމަނުޖެހުން ފާޅުކޮށްފަ އެވެ.