އިނގިރޭސި ޕްރިމިއަރ ލީގުގައި ރޭ ލެސްޓާ ސިޓީއާ ދެކޮޅަށް ކުޅުނު މެޗު 2-0 ގެ ނަތީޖާއަކުން ކާމިޔާބުކޮށް، ތާވަލުގެ ހަތަރުވަނަ މަގާމު މެންޗެސްޓާ ސިޓީން ހޯދައިފިއެވެ.
މި މެޗުން މެންޗެސްޓަރ ސިޓީ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން 51 ޕޮއިންޓާއެކު ތާވަލުގެ ހަތަރުވަނަ މަގާމް ލިބިފަ އެވެ. މި މެޗުން ބަލިވި ލެސްޓަރ ސިޓީއަށް ލިބިފައިވާ 17 ޕޮއިންޓާއެކު އެ ޓީމު އޮތީ ތާވަލުގެ 19 ވަނައިގައި ރެލިގޭޝަން ޒޯނުގަ އެވެ.
އަނިޔާގެ ސަބަބުން ތިން ހަފްތާއެއްހާ ދުވަހަށް ކުޅުމާއި ދުރަށް ދާން ޖެހިފައިވާ އާލިން ހާލަންޑުގެ ބަދަލުގައި ފުރަތަމަ ޓީމުން އުމަރު މަރްމޫޝް އަށް ޕެޕް ގަޑިއޯލާ ފުރުސަތު ދީފައިވާއިރު މި މެޗުގައި އޭނާ ވަނީ ރަގަޅު ކުޅުމެއް ދައްކާފަ އެވެ.
މި މެޗަށް މެންޗެސްޓަރ ސިޓީ ނިކުތްއިރު އެ ޓީމުގެ ކޯޗު ޕެޕް ގަޑިއޯލާ ސަސްޕެންޑް ކޮށްފައިވާތީ އޭނާ މެޗު ބަލާފައިވަނީ ސަޕޯޓަރުންގެ ތެރޭގައި ހުރެގެންނެވެ.
މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުގައި އެ ޓީމުން ގިނައިރު ބޯޅަ ހިފަހައްޓައިގެން ކުޅެފައިވާ މި މެޗުގައި ވަނީ ލަނޑު ޖަހަން ރަގަޅު ފުރުސަތުތަކެއް ތަނަވަސްކޮށްފަ އެވެ. އަދި މެޗުގެ ދެވަނަ މިނިޓުގައި ޖެކް ގްރީލިޝް ވަނީ ލަނޑެއް ޖަހާ މެންޗެސްޓަރ ސިޓީއަށް ކުރި ހޯދަދީފަ އެވެ.
ގްރީލިޝް މި މެޗުގައި ލަނޑު ޖަހާފައިވާއިރު މިއީ ފާއިތުވެދިޔަ 16 މަސް ދުވަހުގެ ތެރޭގައި އޭނާ ޖެހި ފުރަތަމަ ލަނޑެވެ. އަދި މިއީ މިދިޔަ ޑިސެމްބަރ މަހަށްފަހު އޭނާ ޓީމުގެ ފުރަތަމަ އެގާރައިގައި ހިމެނިގެން ކުޅުނު ފުރަތަމަ ފަހަރުވެސްމެ އެވެ.
މީގެ ކުރިން ގަޑިއޯލާ ބުނެފައިވަނީ ގްރީލިޝް އަށް ފުރަތަމަ ޓީމުން ފުރުސަތު ލިބިފައިނުވަނީ އެ މަގާމަށްކުރޭ ސަވީނިއޯ އާއި ޖެރެމީ ޑޮކޫގެ ފަރާތުން އޭނާއަށްވުރެ ރަގަޅު ކުޅުމެއް ފެންނަމުންދާ ކަމަށެވެ.
މި މެޗު ފެށުމުގެ ކުރިން މެންޗެސްޓަރ ސިޓީގެ ސަޕޯޓަރުން ވަނީ ސްޓޭޑިއަމް ތެރޭގައި މުޒާހަރާކޮށްފަ އެވެ. އެއީ މެޗު ޓިކެޓުތަކުގެ އަގު ބޮޑު ކުރުމުގެ އިތުރުން މެޗު ޓިކެޓް ވިއްކުމަށް ވިއާގޯގޯ އާއިއެކު ހަދާފައިވާ އެއްބަސްވުމުގެ މުއްދަތު އިތުރު ކުރުމުގެ ސަބަބުންނެވެ. އަދި ޖެކް ގްރީލިޝް ޖެހި ގޯލާއިއެކު މުޒާހަރާވަނީ ހުއްޓިފަ އެވެ.
މެންޗެސްޓަރ ސިޓީ އިން މި މެޗުގައި ޖެހި ދެވަނަ ލަނޑު މެޗުގެ 29 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ އުމަރު މަރްމޫޝް އެވެ. މިއީ މިދިޔަ ޖެނުއަރީ މަހު ޖަރުމަނުގެ އިންޓްރެކްޓް ފްރެންކްފަރޓް އިން 59 މިލިއަން ޕައުންޑުގެ ފީއަކަށް ސިޓީ އާއި ގުޅުނު ފަހުން އޭނާ ޕްރިމިއާ ލީގުގައި އެ ކްލަބަށް ކާމިޔާބުކޮށްދިން ފަސްވަނަ ލަނޑެވެ.
މި މެޗުން ލެސްޓަރ ސިޓީ ބަލިވެފައިވާއިރު އެ ޓީމު އެންމެ ފަހުން ކުޅުނު 15 މެޗުގެ ތެރެއިން 14 މެޗުން ވަނީ ބަލިވެފަ އެވެ. އަދި ޕްރިމިއާ ލީގުގެ ތާރީޚުގައި ޖެހިޖެހިގެން ހަތް މެޗުގައި ލަނޑެއް ނުޖެހި އެ ބަލިވި ހަތަރުވަނަ ޓީމަށްވަނީ ވެފަ އެވެ.