މުދާ އުފުލާ ބޯޓެއްގައި ރޯވެ އަނދަނީ

މުދާ އުފުލާ ބޯޓެއްގައި އަލިފާން ރޯވެގެން އެމްއެންޑީއެފް ފަޔަރ އެންޑް ރެސްކިއު ޓީމުން ހަރަކާތްތެރިވާން ފަށައިފިއެވެ.

އެމްއެންޑީއެފުން ވިދާޅުވީ ހޮޅުދޫ ބޯޓް ނަމަކަށް ކިޔާ މުދާ އުފުލާ ބޯޓެއްގައި އަލިފާން ރޯވެ ކައްދޫ ފަޔަރ ސްޓޭޝަނުން ހަރަކާތްތެރިވާން ފަށާފައިވާކަމަށެވެ. މިކަމުގެ އިތުރު ތަފްސީލް އަދި ހާމަކުރައްވާފައެއް ނުވެއެވެ. ނަމަވެސް އެމްއެންޑީއެފުން މީޑީއާއާއި ޙިއްސާކުރި ވީޑިއޯއިން ފެންނަގޮތުގައި މުޅި ބޯޓުގައި ވަނީ ރޯވެފައެވެ.

ޕީއެސްއެމް ނިއުސްއަށް މައުލޫމާތު ދެއްވަމުން ލ. މާވަށު ކައުންސިލްގެ ރައީސް އަޙްމަދު މޫސާ ވިދާޅުވީ، އެބޯޓަކީ ތ. ހިރިލަންދޫން މާލެއަށް ދަތުރުކުރަމުން ދިޔަ ބޯޓެއްކަމަށެވެ. އެއީ މާވަށަށްވެސް ދަތުރުކުރާ ބޯޓެއްކަމަށާއި، އެބޯޓުގައި މާވަށު އަދި ހިރިލަންދޫގެ މީހުންވެސް ތިބޭނެކަމަށް ލަފާކުރެވޭކަމަށް ކައުންސިލްގެ ރައީސް ވިދާޅުވިއެވެ. އަދި އެ ބޯޓުން ދަތުކުރި މީހުންގެ ޢަދަދު ސާފުނުވާކަމަށާއި، މާވަށުން އެ ބޯޓުން ދަތުކުރި މީހުންގެ މަޢުލޫމާތު ހޯދަމުންދާކަމަށް ކައުންސިލްގެ ރައީސް ވިދާޅުވިއެވެ. އޭނާ ވިދާޅުވީ އެ ބޯޓު އެއްކޮށް އަނދާފައިވާކަމުގެ މަޢުލޫމާތު ލިބިފައިވާކަމަށާއި، އެކަކު ގެއްލިފައިވާކަމުގެ މަޢުލޫމާތު ލިބިފައިވާކަމަށްވެސް ކައުންސިލްގެ ރައީސް ވިދާޅުވިއެވެ.

އަޙްމަދު މޫސާ ވިދާޅުވީ އެ ބޯޓުން، ރަށަށް ބޭނުންވާ ހުރިހާ ބާވަތެއްގެ މުދާވެސް އުފުލާކަމަށެވެ. އަލިފާނުގެ ހާދިސާ ހިނގާފައިވާ ބޯޓުގެ ސަރަހައްދަށް ދ. ކުޑަހުވަދޫ ފުލުހުންނާއި އެހެނިގެން ޢާންމު ލޯންޗުފަހަރުވެސް އެހީތެރިވުމަށް ގޮސްފައިވާކަމަށް މަޢުލޫމާތު ލިބެއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ތ. ހިރިލަންދޫ ކައުންސިލްގެ ރައީސް މުޙައްމަދު ޖަލާލް ވިދާޅުވީ އެބޯޓުގައި އެރަށުގެ ފަޅުވެރިން ތިބޭނެކަމަށް ލަފާކުރެވޭކަމަށެވެ. އޭނާވެސް ވަނީ އެކަކު ގެއްލިގެން އުޅޭކަމުގެ މަޢުލޫމާތު ލިބިފައިވާކަމަށް ވިދާޅުވެފައެވެ. އަދި ބާކީ ތިބި މީހުން ކަނޑޫދޫއަށް ގެންގޮސްފައިވާކަމަށްވެސް އޭނާ ވިދާޅުވިއެވެ.