ޚަބަރު

މަނަދޫ ނަރުދަމާ ނިޒާމަށް ޖެހޭ މައްސަލަތައް ހައްލުކުރުމުގެ މަސައްކަތް ފަށައިފި


  • މަސައްކަތް ފެށުމަށް ސަރވޭއެއް ވަނީ ކޮށްފައި

  • މިކަމުގެ ހުއްދަތައް ނެގުމުގެ މަސައްކަތް އަންނަ ހަފުތާ ފެށޭނެ

  • ނަރުދަމާ މައްސަލަ ޖެހޭތާ 7 އަހަރު

ނ. މަނަދޫގެ ނަރުދަމާ ނިޒާމުގެ މައްސަލަތައް ކުރިއަށް އޮތް 4 މަސް ދުވަހުގެ ތެރޭގައި ހައްލުކުރުމަށް މަސައްކަތްކުރަމުން އަންނަކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.

ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި ފެނަކަ ކޯޕަރޭޝަނުން ވިދާޅުވީ މަނަދޫގެ ނަރުދަމާ ނިޒާމަށް ދިމާވެފައިވާ މައްސަލައަށް ދާއިމީ ޙައްލެއް ގެނައުމަށް ސަރވޭކޮށްފައިވާ ކަމަށެވެ. އަދި މަސައްކަތުގެ ޑިޒައިން ތައްޔާރުކޮށް، ކަމާބެހޭ އިދާރާތަކުން ނަގަންޖެހޭ ހުއްދަތައް ނެގުމުގެ މަސައްކަތް ކުރިއަށް އޮތް ހަފުތާގައި ފެށޭނެކަމަށް ފެނަކައިން ވިދާޅުވިއެވެ.

ފެނަކައިން ވިދަޅުވީ، ކުރިއަށް އޮތް 4 މަސްދުވަހުގެ ތެރޭގައި މަނަދޫގެ ނަރުދަމާއަށް ދިމާވަމުންދާ މައްސަލަތައް އެއްކޮށް ޙައްލު ކުރެވޭނެ ކަމަށެވެ.


މަނަދޫގެ ނަރުދަމާ ނިޒާމަށް ދިމާވެފައިވާ މައްސަލަތަކާ ގުޅޭގޮތުން އެ ރަށު ކައުންސިލްގެ ރައީސް ޢަބްދުއް ރަޙްމާން ޞަބީޙު ވިދާޅުވީ ނަރުދަމާއަށް މައްސަލަތައް ދިމާވަމުން އަންނަތާ ގާތްގަނޑަކަށް 7 އަހަރު ވެފައިވާ ކަމަށެވެ. އެގޮތުން 2018 ވަނަ އަހަރުން ފެށިގެން ނަރުދަމާ ނިޒާމަށް ބޭނުންވާ ސްޕެއަރ ނުލިބި، އަޕްގްރޭޑިންގެ މަސައްކަތެއް އެކަށީގެންވާ ގޮތެއްގައި ކޮށްފައިނުވާކަން ކައުންސިލްގެ ރައީސް ފާހަގަކުރެއްވިއެވެ.

"ނަރުދަމާގެ މައްސަލަތައް ފިޔަވައި ބޮޑު މައްސަލައެއް ނެތް މި ރަށަކަށް. ޕަންޕު ސްޓޭޝަންތައް ފުރިގެން މަގު މައްޗަށްވެސް ނަޖިސް ބޭރުވަނީ." ކައުންސިލްގެ ރައީސް ވިދާޅުވިއެވެ.

މަނަދޫގެ ނަރުދަމާ ނިޒާމަށް އެކި މައްސަލަތައް ކުރިމަތިވަމުން އަންނައިރު، ފ. ނިލަންދޫގެ ނަރުދަމާ ނިޒާމަށްވެސް ޖެހެމުންދާ މައްސަލަތައް ހައްލުކުރުމަށް ސަރުކާރުން ދަނީ މަސައްކަތް ކުރައްވަމުންނެވެ.