އިނގިރޭސި ޕްރިމިއަރ ލީގުގައި ރޭ މެންޗެސްޓާ ޔުނައިޓެޑާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، ޔުއެފާ ޗެމްޕިއަންސް ލީގުގެ ޖާގައެއް ހޯދުމުގެ ފުރުސަތު ނޮޓިންހަމް ފޮރެސްޓުން ބޮޑުކޮށްފިއެވެ.
މި މެޗުން ނޮޓިންހަމް ފޮރެސްޓް މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން 57 ޕޮއިންޓާއެކު ތާވަލުގެ ތިންވަނަ މަގާމް ލިބިފައެވެ. އެއްވަނައިގައި އޮތް ލިވަޕޫލަށް 70 ޕޮއިންޓް ލިބިފައިވާއިރު، ދެވަނައިގައި އޮތް އާސެނަލްއަށް ލިބިފައިވަނީ 61 ޕޮއިންޓެވެ. ޔުނައިޓެޑަށް ލިބިފައިވާ 37 ޕޮއިންޓާއެކު އެ ޓީމު އޮތީ ތާވަލުގެ 13 ވަނައިގައެވެ.
ނޮޓިންހަމް ފޮރެސްޓްގެ ދަ ސިޓީ ގްރައުންޑުގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ ފަސްވަނަ މިނިޓުގައި ކާމިޔާބުކޮށްދީފައިވަނީ މެންޗެސްޓަރ ޔުނައިޓެޑަށް ކުރިން ކުޅުނު އެންތަނީ އެލަންގާއެވެ. އުމުރުން އެންމެ 12 އަހަރުގައި ޔުނައިޓެޑާ ގުޅުނު އެލަންގާ އެ ޓީމު ދޫކޮށް ނޮޓިންހަމް ފޮރެސްޓާއި ގުޅިފައިވަނީ 2023 ވަނަ އަހަރު، 15 މިލިއަން ޕައުންޑުގެ ފީއަކަށެވެ.
ޔުނައިޓެޑުން ގިނައިރު ބޯޅަ ހިފަހައްޓައިގެން ކުޅެފައިވާ މި މެޗުގައި އެ ޓީމުން ވަނީ އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ. އަދި މެޗުގެ ފަހު ވަގުތުގައި ހެރީ މެގުއާ ފޮނުވާލި ހަމަލައެއް ގޯލުގެ ރޮނގު ހުރަސް ކުރުމުގެ ކުރިން ޑިފެންޑަރު މުރީލޯ ވަނީ ދިފާއުކޮށްފައެވެ.
އިނގިރޭސި އެފްއޭ ކަޕްގެ ސެމީ ފައިނަލުންވެސް ފުރުސަތު ހޯދާފައިވާ ނޮޓިންހަމް ފޮރެސްޓަށް ކުރިއަށް އޮތް ސީޒަނުގައި ޗެމްޕިއަންސް ލީގުގެ ފުރުސަތު ގެއްލުމަކީ ވުމަށްވުރެ ނުވުން ގާތް ކަމެއް ކަމަށް ގިނަބަޔަކު ވަނީ ބުނެފައެވެ. އެގޮތުން ލީގުގެ ތިންވަނައިގައި އެ ޓީމު އޮތްއިރު ހަތަރުވަނައިގައި އޮތް ޗެލްސީއާ ދެމެދު އަށް ޕޮއިންޓުގެ ފަރަގެއް މިހާރު އެބައޮތެވެ.
1996 ވަނަ އަހަރަށްފަހު ޔޫރަޕްގެ ފުޓްބޯޅަ މުބާރާތަކުން ފުރަތަމަ ފަހަރަށް ފުރުސަތު ހޯދުމަށް ނޮޓިންހަމް ފޮރެސްޓުން މަސައްކަތް ކުރަމުންދާއިރު، އެ ޓީމުން ވަނީ މި ސީޒަނުގައި ޔުނައިޓެޑާ ދެކޮޅަށް ކުޅުނު ދެ މެޗުވެސް ކާމިޔާބުކޮށްފައެވެ. އަދި މި ސީޒަނުގައި ޕްރިމިއާ ލީގުގައި ވަނީ ބައިކޮޅަށް ލަނޑެއް ވަނަނުދީ 13 މެޗު ހަމަކޮށްފައެވެ.