ކުޅިވަރު

ފެށުން ރަނގަޅު ކުރަންޖެހޭ، ރާއްޖެ ބަލިކުރެވޭނެ: ފިލިޕީންސް


އޭއެފްސީ އޭޝިއަން ކަޕް ކޮލިފައިންގެ ފެށުން ރަނގަޅު ކުރުމަށްޓަކައި ރާއްޖެ ބަލިކުރުމުގެ މުހިންމުކަން ފިލިޕީންސްއިން ފާހަގަކޮށްފިއެވެ.

އެ ގައުމުގެ ގައުމީ ފުޓްބޯޅަ ޓީމުގެ ޑިރެކްޓަރު ފްރެޑީ ގޮންޒާލޭޒް ބުނީ ހުސްވި އަހަރު ފިލިޕީންސް ކުޅުނު ހުރިހާ މެޗެއްގައި ވެސް ތައްޔާރުވީ މި ފަހަރުގެ ކޮލިފައިން މެޗުތަކަށް ކަމަށެވެ.

"އަހަރުމެންގެ އެންމެ ބޮޑު ޓާގެޓަކީ 2027 ވަނަ އަހަރުގެ އޭޝިއަން ކަޕަށް ކޮލިފައިން. ކޮންމެ ގްރޫޕަކުން ވެސް ކޮލިފައި މި ވަނީ އެންމެ ގިނަ ޕޮއިންޓް ހޯދާ ޓީމު. މިހެންވެ ފެށުން ވަރަށް ރަނގަޅު ކުރަންޖެހޭ. އަހަރުމެންގެ ފުރިހަމަ އިތުބާރު އެބައޮތް ރާއްޖެ ބަލިކުރެވޭނެ ކަމަށް،" ފްރެޑީ ބުންޏެވެ.

ކޮލިފައިންގައި ފިލިޕީންސް ހިމެނެނީ ރާއްޖެ އާއި ތަޖިކިސްތާން އަދި ޓިމޯލެސްޓޭއާ އެއް ގްރޫޕެއްގަ އެވެ.

ރާއްޖެއާ ދެކޮޅަށް މާދަމާ ކުޅޭ މެޗާ ބެހޭ ގޮތުން މިޑްފީލްޑަރު ސަންދްރޯ ރޭޔޭސް ބުނީ ކޮންމެ މެޗަކީ ވެސް ފައިނަލެއް ކަމަށެވެ.

"އަހަރެންނަށް ހީވަނީ އޭޝިއަން ކަޕް ކޮލިފައިންގެ ކޮންމެ މެޗަކީ ވެސް ފައިނަލެއްހެން. ސަބަބަކީ ކޮންމެ ގްރޫޕަކުން ވެސް އެއްވަނަ ޓީމު އޭޝިއަން ކަޕަށް ދާތީވެ، މިހެންވީމަ ކޮންމެ މެޗެއް ވެސް ވަރަށް މުހިންމު. ކޮންމެ ޓީމަކާ ކުޅުނަސް އަހަރުމެންނަށް ވަރިހަމަ، އަހަރުމެން ތައްޔާރުވާނީ ފައިނަލެއްގެ ގޮތަށް،" އާސިއާން ކަޕުގައި އެންމެ މޮޅަށް ކުޅުނު ކުޅުންތެރިޔާ ކަމަށް ގިނަ ބަޔަކު ފާހަގަ ކުރާ ރޭޔޭސް ބުންޏެވެ.

ރާއްޖެ އާއި ފިލިޕީންސް ކުޅޭ މެޗު އޮންނާނީ އަންގާރަ ދުވަހު ނިއު ކްލާކް ސިޓީ އެތްލެޓިކްސް ސްޓޭޑިއަމުގަ އެވެ. މި މެޗަށް ރާއްޖޭގެ ޓީމު ވެސް މިހާރު ވަނީ ފިލިޕީންސަށް ގޮސްފަ އެވެ. ރާއްޖެ ވަނީ މި މެޗުގެ ކުރިން އިންޑިޔާއާއެކު އެކުވެރިކަމުގެ މެޗެއް ކުޅެފަ އެވެ. ރާއްޖެ މެޗުގެ ކުރިން ފިލިޕީންސް ފެޑަރޭޝަނުން ވަނީ ދަނޑުގެ މަތީ ބަރިއަށް ހިލޭ ސަޕޯޓަރުންނަށް ވަދެވޭނެ ގޮތް ހަދައިފަ އެވެ.