ފަލަސްޠީނުގެ ޣައްޒާގައި ސިއްޙީ ފަރުވާ ނުދެވި، ފުރާނައަށް ނުރައްކާވެފައިވާ 2،500 އެއްހާ ކުދިންނަށް ފަރުވާ ދިނުމަށް އެތަނުން ސަލާމަތް ކުރަން އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭސް ގޮވާލައްވައިފިއެވެ.
ގުޓެރޭސް މި އިލްތިމާސް ކުރައްވާފައިވަނީ، ޣައްޒާގައި ސިއްޙީ ފަރުވާ ދިނުމަށް ހަރަކާތްތެރިވާ އެމެރިކާގެ ހަތަރު ޑޮކްޓަރަކާ ބައްދަލުކުރެއްވުމަށްފަހުއެވެ.
ފަނަރަ މަސް ދުވަސް ވަންދެން ޔަހޫދީ އިސްތިޢުމާރީ ފައުޖުން ޣައްޒާއަށް ދިން ލާއިންސާނީ ޢުދުވާންތަކުގައި މުޅި ޣައްޒާ ވަނީ އެކީހެން ސުންނާފަތި ކޮށްލައިފައެވެ. އެ ރަހުމްކުޑަ ޙަމަލާތައް ޣައްޒާގެ ހޮސްޕިޓަލުތަކާއި ސިއްޙީ މަރުކަޒުތަކަށް ވެސް އަމާޒުކޮށްފައިވާއިރު، ޣައްޒާގެ މުޅި ސިއްޙީ ނިޒާމު ވަނީ ހުއްޓުމަކަށް އައިސްފައެވެ.
މި މަހުގެ 19 ވަނަ ދުވަހު، ޣައްޒާގެ ހަނގުރާމަ ހުއްޓައިލުމުގެ އެއްބަސްވުމަށް ޢަމަލުކުރަން ފެށިއިރު، ސިއްޙީ ފަރުވާއަށް ޣައްޒާއިން ބޭރަށް ގެންދަންޖެހޭ 12،000 އަށްވުރެ ގިނަ ބަލިމީހުން ތިބި ކަމަށް ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ބުނެފައިވެއެވެ.
ޣައްޒާގައި މިދިޔަ އަހަރުގެ 25 މާޗް އިން 8 އޭޕްރީލް އާ ހަމައަށް މަސައްކަތް ކުރި އެމެރިކާ ޑޮކްޓަރަކު ނޫސްވެރިންނަށް ވިދާޅުވި ގޮތުގައި، މިހާރުން މިހާރަށް ފަރުވާ ނުދެވިއްޖެނަމަ، ފުރާނަ ގެއްލޭ ޙާލަތުގައި ތިބި 2،500 އެއްހާ ކުޑަކުދިން އޭގެތެރޭގައި ހިމެނެއެވެ.
"ކުރިއަށް އޮތް ހަފްތާތަކުގެ ތެރޭގައި މަރުގެ ތުންފަތްމަތީގައި 2،500 އެއްހާ ކުދިން އެބަތިބި. މިހާރުވެސް ބައެއް ކުދިން މަރުވަމުން އެބަދޭ. މާދަމާ ބައެއް ކުދިން މަރުވާނެ. އަދި ޖެހިގެން އަންނަ ދުވަހު ވެސް މަރުވާނެ ކުދިން އެބަތިބި،" ގުޓެރޭސްއާ ބައްދަލުކުރުމަށް ފަހު ނޫސްވެރިންނާ ވާހަކަ ދައްކަވަމުން ކެލިފޯނިއާއަށް ނިސްބަތްވާ ސަރޖަން ފީރޯޒް ސިދްވާ ބުންޏެވެ.
އޭނާ ބުނީ، އޭގެ ތެރެއިން ގިނަ ކުދިން އެޑްމިޓުކުރީ ވަރަށް އާދައިގެ ކަންކަމަށް ފަރުވާ ކުރަން ކަމަށާއި، ނަމަވެސް، އެކަށީގެންވާ ފަރުވާ ދެވޭނެ ގޮތެއް ނެތިގެން އެ ކުދިންގެ ފުރާނައަށް ނުރައްކާވާ ޙާލަތަށް މިހާރު ވެއްޓިފައިވާ ކަމަށެވެ.
ޙަމަލާތައް ހުއްޓައިލުމުގެ އެއްބަސްވުމަށް ޢަމަލުކުރަން ފެށުމާ އެކު، ބަލިމީހުން ބޭސްފަރުވާއަށް ޣައްޒާއިން ނެރެ، ގެންދެވޭނެ ކަމުގެ އުއްމީދު ބޮޑުވިނަމަވެސް، އެކަމުގެ އެއްވެސް އަލި މަގެއް އަދިވެސް ނުފެންނަ ކަމަށް އެ ޑޮކްޓަރުން ބުންޏެވެ.
އަދި ބޭސްފަރުވާއަށް ޣައްޒާއިން ބޭރަށް ގެންދިޔުމަށްފަހު، ފަރުވާއަށްފަހު އެނބުރި ޣައްޒާއަށް އެތެރެވެވޭނެ ކަމުގެ ޔަޤީންކަމެއް ނެތް ކަމަށް ވެސް އެ މީހުން ބުނެފައިވެއެވެ.
ޑޮކްޓަރުންނާއެކު ބޭއްވި ބައްދަލުވުމަށްފަހު ގުޓެރޭސް ވިދާޅުވި ގޮތުގައި، ޣައްޒާގެ ނިކަމެތި ރައްޔިތުންނަށް ކުރިމަތިލާންޖެހިފައިވާ ހިތްދަތި ޙާލަތު އިތުރަށް އިޙްސާސް ކުރެއްވިއްޖެއެވެ.
"މި 2،500 ކުދިން ވަގުތުން ބޭސްފަރުވާއަށް ގެންދިޔުމުގެ ފުރުޞަތު ދޭންޖެހޭނީ، އާއިލާ އާއި މުޖުތަމަޢުއަށް އެނބުރި ދެވޭނެ ކަމުގެ ޔަޤީންކަމާއެކު،" އެ ބައްދަލުވުމަށްފަހު ގުޓެރޭސް އެކްސްގައި ކުރެއްވި ޕޯސްޓެއްގައި ގޮވައިލެއްވިއެވެ.