އިނގިރޭސި ޕްރިމިއާ ލީގުގެ ކްލަބް ބްރައިޓަން އަށް ކުޅެމުންދާ ޖަޕާނުގެ ކައޮރު މިޓޯމާ ހޯދުމަށް ސައުދި އަރަބިއްޔާގެ އަލް ނަސްރު އިން ހުށައެޅި 54.5 މިލިއަން ޕައުންޑުގެ ހުށައެޅުމަށް އެ ކްލަބުން ނޫނެކޭ ބުނެފި އެވެ.
އުމުރުން 27 އަހަރުގެ މިޓޯމާ ވަނީ 2023 ވަނަ އަހަރުގެ އޮކްޓޯބަރ މަހު އެ ކްލަބުގައި އިތުރު ހަތަރު އަހަރު މަޑުކުރުމަށް އޭނާގެ ކޮންޓްރެކްޓް އައު ކޮށްފަ އެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް އޭނާ ބްރައިޓަން ގައި މަޑު ކުރާނެ އެވެ.
2021 ވަނަ އަހަރު ޖަޕާނުގެ ޖޭ ލީގުގެ ކްލަބް ކަވަސާކީ ފްރޮންޓޭލް އިން ބްރައިޓަން އާއި ގުޅުނު މިޓޯމާ ވަނީ ފާއިތުވެދިޔަ ދުވަސްތަކުގައި ބްރައިޓަންގައި ރަގަޅު ކުޅުމެއް ދައްކާފަ އެވެ.
މީޑިޔާ ރިޕޯޓްތައް ބުނާ ގޮތުގައި ބްރައިޓަން އިން އަލް ނަސްރުގެ ހުށައެޅުން ދޫކޮށްލި ނަމަވެސް މިޓޯމާ ހޯދުމަށް އެ ކްލަބުން އިތުރު ހުށައެޅުމެއް ހުށައަޅާނެ އެވެ. ޕޯޗުގަލްގެ ކްރިސްޓިއާނޯ ރޮނާލްޑޯ އަލް ނަސްރަށް ގެންގޮސް ދުނިޔޭގެ ސަމާލުކަން ހޯދާފައިވާ ސައުދީ ޕްރޯ ލީގުގެ އަލް ނަސްރު އިން ދަނީ އެސްޓަން ވިލާގެ ފޯވަޑް ޖޯން ދުރާން ހޯދުމުގެ މަސައްކަތް ކުރަމުންނެވެ.
ސައުދީ ޕްރޯ ލީގުގެ ޓްރާންސްފާ މުއްދަތު މިއަދުގެ ނިޔަލަށް ހަމަވާއިރު އެ ކްލަބުން ހޯދަން ބޭނުންވާ ކުޅުންތެރިއެއްނަމަ މިއަދު އެކަން ކުރަން ޖެހޭނެ އެވެ.
މިޓޯމާ ވަނީ ބްރައިޓަން އަށް މިހާތަނަށް ކުޅުނު 92 މެޗުގައި 18 ލަނޑު އެ ކްލަބަށް ކާމިޔާބުކޮށްދީފަ އެވެ. އަދި އޭނާ އަކީ މި ސީޒަނުގައި ޕްރިމިއާ ލީގުގައި ބްރައިޓަން ކުޅުނު 23 މެޗުގައި ކުޅެފައިވާ އެ ކްލަބުގެ ހަމައެކަނި ކުޅުންތެރިޔާ އެވެ.