ބޭނުންވާ ފެންވަރަށް އެސޯސިއޭޝަންތަކުގެ ހިންގުން ބަދަލުކުރެވެމުން އެބަދޭ: ޠަލާލް

ރާއްޖޭގެ ކުޅިވަރު އެސޯސިއޭޝަންތައް ހަރުދަނާކޮށް ހިންގުމަށްޓަކައި އެސޯސިއޭޝަންތަކުގެ ހިންގުން ބޭނުންވާ ފެންވަރަށް ބަދަލުކުރެވެމުންދާ ކަމަށް ކޮމިޝަރަނަރ އޮފް ސްޕޯޓްސް، މުހައްދު ޠަލާލު ވިދާޅުވެއްޖެއެވެ.

ޕީއެސްއެމް ސްޕޯޓްސްއަށް ދެއްވި ހާއްސަ އިންޓަވިއުއެއްގައި ޠަލާލު ވިދާޅުވީ އެސޯސިއޭޝަންތަކުން ލިބެންޖެހޭ އެއްބާރުލުމާއި އެހީތެރިކަން ވަރަށް ފުރިހަމައަށް ލިބެމުންދާ ކަމަށެވެ. ކުޅިވަރު އެސޯސިއޭޝަންތަކުގެ ހިންގުން ހަރުދަނާ ކުރުމަށްޓަކައި އެސޯސިއޭޝަންތަކަށް ދޭންޖެހޭ އެހީތެރިކަމަކީ ސްޕޯޓްސް ކޮމިޝަނަރގެ އޮފީހުން އެންމެ އިސްކަމެއްދީގެން ކުރައްވާނެ އެއް ކަންތައް ކަމަށް ޠަލާލު ވިދާޅުވިއެވެ.

ޠަލާލު ވިދާޅުވީ އެންމެ ބޮޑު އިސްކަމެއް ދޭނީ ޤައުމީ ކުޅިވަރު އެސޯސިއޭޝަންތަކަށް ކަމަށެވެ. އޭގެތެރޭގައި މިހާރު އެންމެ ބޮޑު ފޯކަސްދީގެން ކުރިޔަށްގެންދާ އަހަރީ އާއްމު ޖަލްސާ ބާއްވަން އެސޯސިއޭޝަންތަކުން ކުރަމުގެންދާ މަސައްކަތްތަކަށް ކަމަށް ޠަލާލު ވިދާޅުވިއެވެ.

ކުޅިވަރު ގާނޫނު ބުނާގޮތުން އަހަރު ފުރަތަމަ ތިން މަސްތެރޭގައި ޤައުމީ ކުޅިވަރު އެސޯސިއޭޝަންތަކުން އަހަރީ އާއްމު ޖަލްސާ ބާއްވާ ކޮމިޝަނަރގެ އޮފީހާއި ރިޕޯޓު ހިއްސާކުރަން ޖެހެއެވެ.

"އޭގެތެރޭގައި އަހަރީ އާއްމު ޖަލްސާއަށް ހުށަހަޅައިގެން އެ ޖަލްސާގައި ނިންމަންޖެހޭ މުހިންމު ކަންތައްތަކެއް ހުންނާނެ، އޭގެތެރޭގައި ސަމާލުކަން ދޭންޖެހޭ ކަންތައްތަކެއް ހުންނަޖެހޭނެ، ހަމަ އެގޮތަށް އޭގެތެރޭގައި ފާއިތުވި އަހަރު އެސޯސިއޭޝަނުން ރޭވި ހަރަކާތްތަކާއި ކުރިޔަށް އޮތް އަހަރު ރާވާހިންގާނެ ކަންކަން ހިއްސާކުރަން ޖެހޭނެ" ޠަލާލް ވިދާޅުވިއެވެ.

ކުޅިވަރު އެސޯސިއޭޝަންތަކަށް މިވަގުތު ދިމާވާ އެންމެ ބޮޑު މައްސަލައަކީ ފައިސާގެ މައްސަލަތަކެވެ. ޠަލާލް ވިދާޅުވީ ފާއިތުވި އަހަރުތަކުގައި ފައިސާ ހޭދަކުރި ގޮތުގެ އޮޑިޓަކީ ކޮންމެހެން ހުށަހަޅަންޖެހޭ ލިޔުމެއް ކަމަށެވެ. ކުޅިވަރުގެ މައިދާނުގައި ރާއްޖޭގައި ބާއްވާ މުބާރާތްތަކާއި ބައިނަލްއަޤްވާމީ މައިދާނުގައި ރާއްޖެ ތަމްސީލު ކުރާ ހަރަކާތްތަކުގެ ބަޖެޓަކީ ކޮންމެހެން ހުށަހަޅަންޖެހޭ އެއްޗެއް ކަމަށެވެ.

މިކަންކަން އެސޯސިއޭޝަންތަކުން ކުރަމުންދާއިރު އެހީތެރިކަން ފޯރުކޮށްދެވާނެ ކަމަށް ކޮމިޝަނަރ އޮފް ސްޕޯޓްސް ވިދާޅުވިއެވެ. އެންމެ ބޮޑު މައްސަލަތަކެއް ގޮތުގައި ފާހަގަކުރެވިފަވަނީ ފައިސާގެ މުއާމަލާތްތައް ހިންގުމުގައި ދިމާވާ މައްސަލަތައްކަން ފާހަގަކުރެވިފައިވާ ކަމަށް ޠަލާލް ވިދާޅުވިއެވެ.

"ލިޔެކުންތައް ރަނގަޅަށް ބެލެހެއްޓިފައި ނުވާ މައްސަލަ، ހަމަ އަޅުގަނޑުމެންނަށް ފެންމަތިވަމުން އައީ، އަޅުގަނޑު މި މަގާމާއި ހަވާލުވެގެން އެންމެ ފުރަތަމަ އެސޯސިއޭޝަންތަކާއި ބައްދަލު ކުރިއިރު އެންމެ ބޮޑު ޝަކުވާއަކީ އަހަރުން އަހަރަށް އެސޯސިއޭޝަންތަކުން ހަދަންޖެހޭ އޮޑިޓްގެ ދަތިކަން" ޠަލާލް ވިދާޅުވިއެވެ.

މިހާރު އޮލިންޕިކް ކޮމެޓީގެ ތެރެއިން މިކަންކަން ހައްލުކުރުމަށްޓަކައި ޕްރީ އެސެސްމެންޓެއް ހެދުމަށް އެސޯސިއޭޝަންތަކާއި މަޝްވާރާކުރެވިފައި ވާނެކަމަށް ޠަލާލް ވިދާޅުވިއެވެ. ބައެއް އެސޯސިއޭޝަންތަކުގައި އަދިވެސް ކުޅިވަރު ގާނޫނާ ފުށޫއަރާ ބައެއް ކަންކަން ހުރިކަން ފާހަގަކުރައްވާ ޠަލާލް ވިދާޅުވީ މިހާރު ޤައުމީ ހުރިހާ އެސޯސިއޭޝަނެއްގައި މިހެން ހުރި ކަންކަން ބަދަލުކުރެވިފަވާ ކަމަށެވެ.

މީގެ އިތުރުން މިއަހަރު ތެރޭގައި ހިންގާ ކޮމެޓީގެ މުއްދަތު ހަމަވާ ފަސް އެސޯސިއޭޝަނެއްގެ ހިންގާ ކޮމިޓީގެ މުއްދަތުގެ ތެރޭގައި އިންތިހާބު ކުރުމަށް ބާރުއަޅައި އެކަމުގެ މަސައްކަތް ކުރައްވަމުން އަންނަ ކަމަށް ޠަލާލް ވިދާޅުވިއެވެ.