އިތުރު 3 ފަރާތަކުން "ފަވަރަ" ގެ ޚިދުމަތް ދޭން ފަށައިފި

އިތުރު 3 ފަރާތަކުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޤާއިމްކޮށްފައިވާ އިންސްޓަންޓް ޕޭމަންޓް ސިސްޓަމް، "ފަވަރަ"ގެ ޚިދުމަތް ދޭން ފައިފިއެވެ.

"ފަވަރަ" ގައި އަލަށް ބައިވެރިވެ އެ ޚިދުމަތް ދޭންފަށާފައިވަނީ ހަބީބް ބޭންކް ލިމިޓެޑް (އެޗްބީއެލް)، ކޮމާޝަލް ބޭންކް އޮފް މޯލްޑިވްސް ޕްރައިވެޓް ލިމިޓެޑް (ސީބީއެމް) ގެ އިތުރުން ދިރާގު ފިންޓެކް ޕްރައިވެޓް ލިމިޓެޑް (ދިރާގު ފިންޓެކް) އެވެ. މީގެ ތެރެއިން ދިރާގު ފިންޓެކްއަކީ ބޭންކު ނޫން ޕޭމަންޓް ޚިދުމަތްދޭ ފަރާތްތަކުގެ ތެރެއިން ފަވަރައާއި ގުޅޭ ފުރަތަމަ ކުންފުންޏެވެ.

މި 3 ފަރާތުންވެސް ފަވަރައާ ގުޅުމަށް ވާންޖެހޭ އެންމެފަހުގެ ތައްޔާރީތައް ފުރިހަމަކޮށް ޕައިލެޓް ޓެސްޓިންގެ މަރުހަލާ ފުރިހަމަ ކޮށްފައިވާ ކަމަށް އެމްއެމްއޭއިން ވިދާޅުވެއެވެ. އެހެންކަމުން މިހާރު އެޗްބީއެލްއާއި ސީބީއެމް އަދި ދިރާގު ފިންޓެކްގެ ޚިދުމަތްތައް ބޭނުންކުރާ ހުރިހާ ކަސްޓަމަރުންނަށްވެސް ފަވަރަ ޓްރާންސްފަރ، ފަވަރަ ރިކުއެސްޓް، ފަވަރަ އައިޑީ އަދި ފަވަރަ ރީކޯލް ހިމެނޭހެން، ފަވަރަގެ އެންމެހާ ޚިދުމަތްތައް ލިބިގެންދާނެ ކަމަށްވެސް އެ އޮތޯރިޓީން ވިދާޅުވެއެވެ.

ފަވަރައާއި އަލަށް ގުޅުނު އެޗްބީއެލް އަދި ސީބީއެމްއާއެކު ރާއްޖޭގައި ބޭންކިންގގެ ޚިދުމަތް ދެމުންގެންދާ ހުރިހާ ބޭންކުތަކެއް މިހާރު މިވަނީ އެ ސިސްޓަމްގައި ބައިވެރިވެފައެވެ. މިއާއެކު އެއް ބޭންކުން އަނެއް ބޭންކަށް ކުރާ މުއާމަލާތްތައް ފަސޭހަކަމާއެކު ވަގުތުން މިހާރު ކުރެވޭނެކަމަށް އެމްއެމްއޭއިން ވިދާޅުވެއެވެ.

ކުރިޔަށް އޮތްތަނުގައި ޕޭމަންޓް ޚިދުމަތްދޭ އެހެނިހެން ފަރާތްތަކުން ވެސް ފަވަރަ ސިސްޓަމާއި ގުޅުމުގެ މަސައްކަތްތައް މިހާރުވެސް ކުރައްވަމުންދާ ކަމަށް އެމްއެމްއޭއިން ވިދާޅުވެއެވެ.