ތަރާވީޙް ނަމާދުކުރަން ހާފިޒުން ގެނައުމުގެ ވިޒާއަށް އެދެން ހުޅުވާލައިފި

މިއަހަރުގެ ރަމަޟާން މަހު މިސްކިތްތަކުގައި ތަރާވީހް ނަމާދު ކުރުމަށް ރާއްޖެއިން ބޭރުން ހާފިޒުން ގެނައުމަށް ވިޒާއަށް އެދި ހުށަހެޅުމުގެ ފުރުސަތު މޯލްޑިވްސް އިމިގްރޭޝަނުން ހުޅުވާލައިފިއެވެ.

އިމިގްރޭޝަނުން ކުރި އިޢުލާނެއްގައިވަނީ ހާފިޒުން ގެނައުމަށް އިސްލާމީ ކަންތައްތަކާ ބެހޭ ވުޒާރާއިން ހުއްދަ ދޫކޮށްފައިވާ ފަރާތްތަކުން ރާއްޖެ ގެނައުމަށް ބޭނުންވާ ހާފިޒުންގެ ވިޒާއަށް އެދި ހުށަހެޅުމުން، ޝަރުތު ހަމަވެ، ހުއްދަ ދޭ ފަރާތްތަކަށް، އެމީހުން ރާއްޖެ އަންނަ ތާރީޚުން ފެށިގެން 45 ދުވަހުގެ "ސްޕެޝަލް ވިޒާ" ދޫކުރުމަށް ހަމަޖެހިފައިވާ ކަމަށެވެ.

އަދި މިސްކިތްތަކުގައި ހިފްޒުކޮށް ތަރާވީހް ނަމާދުކުރުމަށް ރާއްޖެއިން ބޭރުން ހާފިޒުން ގެނައުމަށް އެދޭ ފަރާތްތަކުން، އިމިގްރޭޝަންގެ އޮންލައިން ޕޯޓަލް މެދުވެރިކޮށް ސްޕެޝަލް ވިޒާއަށް އެދި ހުށަހެޅުމަށް ވަނީ ހުޅުވާލާފައެވެ.

އެޕްލިކޭޝަން ހުށަހެޅުމުން، ހުއްދަ ދޭ ފަރާތްތަކަށް އެޕްލިކޭޝަން ހުށަހަޅާ ތާރީޚުން ފެށިގެން 7 ދުވަހުގެ ތެރޭގައި އިމިގްރޭޝަންގެ "އިމުގާ" ޕޯޓަލް މެދުވެރިކޮށް އަންގާނެކަމަށް އިމިގްރޭޝަނުން ވިދާޅުވެއެވެ. ހުއްދަ ދޭ ފަރާތްތައް ރާއްޖޭގައި ހޭދަކުރާ މުއްދަތުގައި އެފަރާތްތަކުގެ ވިޒާގެ ކަންކަން ގަވާއިދާ އެއްގޮތަށް ފުރިހަމަ ކުރުމަކީ އެފަރާތްތައް ރާއްޖެ ގެނައުމަށް އިސްލާމީ ކަންތައްތައްކާ ބެހޭ ވުޒާރާއިން ދޫކޮށްފައިވާ ހުއްދަ ލިބިފައިވާ ފަރާތުގެ ޒިންމާއެއް ކަމަށް އިމިގްރޭޝަނުން ވިދާޅުވެއެވެ

މީގެއިތުރުން، ދޫކުރާ ވިޒާގެ މުއްދަތު ހަމަވުމުގެ ކުރިން އެފަރާތްތައް ރާއްޖެއިން ފުރުވާލުމުގެ އިންތިޒާމް ހަމަޖެއްސުމަކީވެސް ހުއްދަ ލިބިފައިވާ ފަރާތުގެ ޒިންމާއެކެވެ.

އިމިގްރޭޝަނުން ވަނީ ހާފިޒުންނާއި ޤާރީންނާއެކު އަންނަ އާއިލާ މެންބަރުން އަމަލުކުރަންޖެހޭގޮތްވެސް އާންމުކުރައްވާފައެވެ. އެގޮތުން އެފަރާތްތަކުންވެސް އިމިގްރޭޝަންގެ އޮންލައިން ޕޯޓަލް މެދުވެރިކޮށް "ސްޕޮންސަރޝިޕް ޑެކްލަރޭޝަން" ފޯމް ހުށަހަޅާ ދަތުރުކުރުމުގެ ހުއްދަ ހޯދަން ޖެހެއެވެ. އިމިގްރޭޝަނުން ވިދާޅުވީ އެމީހުންނަށް ދޫކުރުމަށް ހަމަޖެހިފައިވަނީ 30 ދުވަހުގެ އޮން އެރައިވަލް ޓޫރިސްޓް ވިޒާއެއްކަމަށެވެ. މި މުއްދަތައްވުރެ ގިނަ ދުވަސްވަންދެން ރާއްޖޭގައި ތިބޭނަމަ ޓޫރިސްޓް ވިޒާ ހަމަވުމުގެ ރަސްމީ 7 ދުވަހުގެ ތެރޭގައި ވިޒާގެ މުއްދަތު އިތުރުކުރުމަށް ހުށަހަޅަން ޖެހެއެވެ.

އަދި ބިދޭސީންނަށް ދޫކުރުމަށް ހަމަޖެހިފައިވާ "ސްޕެޝަލް ވިޒާ" އާއި "ސްޕޮންސަރޝިޕް ޑެކްލެރޭޝަން" އެ މުއައްސަސާ އިން އެޕްރޫވްކުރުމުގެ ކުރިން މިއިން އެއްވެސް ފަރާތަކުން ރާއްޖެ އައުމަށް ދަތުރު ނުފެށުމަށްވެސް އިމިގްރޭޝަނުން ވަނީ އިލްތިމާސްކުރައްވާފައެވެ.

އިސްލާމީ ކަންތައްތަކާ ބެހޭ ވުޒާރާއިން ވަނީ ރަމަޟާންމަހު ތަރާވީޙު ނަމާދު ކުރަން ރާއްޖެއިން ބޭރުގެ ޙާފިޡުން ގެނައުމަށް ހުއްދައަށް އެދުމުގެ ފުރުސަތުވެސް ހުޅުވާލައްވާފައެވެ. އެގޮތުން އެ ފުރުސަތު ސިޓީ ތަކަށާއި ރަށްރަށަށްވެސް ހުޅުވާލާފައިވެއެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ އެކަމަށް ހުއްދައަށް އެދި ހުށައެޅުމުގެ ފުރުސަތު ފެބްރުއަރީ މަހުގެ 16 ވަނަ ދުވަހާހަމައަށް ހުޅުވާލާފައިވާކަމަށެވެ.

ރަމަޟާންމަހު ޙިފްޡުކޮށް އިމާމުވެ ތަރާވީޙު ނަމާދު ކުރާ ރާއްޖެއިން ބޭރުގެ ޙާފިޡަކަށް އެލަވަންސް ފައިސާ ދޭންވާނީ އާބާދީގެ ނިސްބަތުންކަމަށާއި އެގޮތުން ރާއްޖެއިން ބޭރުގެ ޙާފިޡުންނަށް އިމާމުވެ ޙިފްޡުކޮށް ތަރާވީޙު ނަމާދު ކުރާ ކޮންމެ ރެޔަކަށް 200 ރުފިޔާގެ އެލަވަންސެއް ދޭންޖެހޭނެކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވިއެވެ.

މީގެއިތުރުން ރާއްޖޭގައި މަސައްކަތްކުރާ ރާއްޖެއިން ބޭރުގެ ގައުމުތަކުގެ މީހުންނަށް ރާއްޖޭގައި ޙިފްޡުކޮށް އިމާމުވެ ތަރާވީޙު ނަމާދު ކުރުމުގެ ހުއްދަ ދެވޭނީ ރާއްޖޭގައި މަސައްކަތް ކުރުމުގެ ހުއްދަ އޮންނަ، އަދި އެފަދަ ދާއިރާއަކާ ގުޅޭ މަރުކަޒެއް ނުވަތަ ޤުރުއާން ކުލާހެއްގައި މަސައްކަތް ކުރާ ޙާފިޡުކަމުގެ ސެޓްފިކެޓް ލިބިފައިވާ ފަރާތްތަކަށްކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.