ޚަބަރު

ރާއްޖޭގައި ހަށިވިއްކުމުގެ ވިޔަފާރިކުރި ބިދޭސީންތަކެއް ޑީޕޯޓުކޮށްލަނީ


  • އިމިގްރޭޝަންގެ ބެލުމުގެ ދަށަށް ގެންދިޔައީ 5 މީހުން

  • އެކަކު މިހާރު ވަނީ ޑީޕޯޓްކޮށްފައި

ރާއްޖޭގައި ހަށިވިއްކަމުން ދިޔަ ވިއެޓްނާމްގެ ބަޔަކު އިމިގްރޭޝަންގެ ބެލުމުގެ ދަށަށް ގެނެސްފިއެވެ.

ސޯޝަލް މީޑިއާގައި ހިއްސާ ކުރެއްވި ޕޯސްޓެއްގައި އިމިގްރޭޝަނުން ވިދާޅުވީ ރާއްޖޭގައި ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދާކަމަށް ތުހުމަތުކުރެވޭ ބިދޭސީން ހޯދުމަށްޓަކައި، އިމިގްރޭޝަނާއި ފުލުހުން ގުޅިގެން ހިންގި ޚާއްޞަ އޮޕަރޭޝަންތަކެއްގެ ދަށުން، ވިއެޓްނާމްގެ 5 މީހަކު އެ އިދާރާގެ ބެލުމުގެ ދަށަށް ގެނެސްފައިވާކަމަށެވެ. އޭގެ ތެރޭގައި ހިމެނެނީ 4 އަންހެނުންނާއި އެޖެންޓެއްގެގޮތުގައި މަސައްކަތްކުރި ފިރިހެނަކުކަމަށް އިމިގްރޭޝަނުން ވިދާޅުވެއެވެ.

އެޖެންޓު އަދި މީގެ ތެރެއިން 3 އަންހެނުން ރާއްޖޭގައި އުޅެމުންދިޔައީ ވޯކް ވިސާގައި ކަމަށް އިމިގްރޭޝަނުން ވިދާޅުވެއެވެ. އިމިގްރޭޝަނުން ވިދާޅުވީ، މި މައްސަލަތައް އިތުރަށް ތަޙްޤީޤުކުރުމަށްފަހު، މީގެތެރެއިން އެކަކު މިމަހުގެ 17 ވަނަ ދުވަހު ޑީޕޯޓްކޮށްފައިވާކަމަށެވެ. އަދި ބާކީ ތިބި 4 ބިދޭސީން ޑިޕޯޓުކުރުމުގެ މަސައްކަތް މިހާރު ކުރިއަށްދާ ކަމަށްވެސް އިމިގްރޭޝަނުން ވިދާޅުވެއެވެ.

ދާދިފަހުން އިމިގްރޭޝަނުން ވަނީ ބިދޭސީން ހަރަކާތްތެރިވާ ތަންތަން މޮނިޓަރ ކުރުމުގެ މަސައްކަތްވެސް ފަށާފައެވެ. ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން މުޅިރާއްޖޭގައި އަންނަނީ އޮޕަރޭޝަން ކުރަނގީގެ ނަމުގައި ޚާއްސަ އޮޕަރޭޝަނެއްވެސް ހިންގަމުންނެވެ.

މިއޮޕަރޭޝަންގެ ދަށުން މިހާތަނަށް ފަންސަވީސްހާހަށްވުރެ ގިނަ ބިދޭސީންގެ މަޢުލޫމާތު ނަގާފައިވާކަމަށް ދާޚިލީ ސަލަމާތާއި ފަންނިއްޔާތާބެހޭ ވުޒާރާއިން ވިދާޅުވެއެވެ.