ސްޕެއިންގެ ގައުމީ ފުޓްބޯޅަ ޓީމުގެ ކޯޗު ލުއިސް ޑިލަ ފުއެންޓޭ އާއިއެކު އެ ގައުމުގެ ފުޓްބޯޅަ ފެޑަރޭޝަނުން ހަދާފައިވާ އެއްބަސްވުމުގެ މުއްދަތު އިތުރު 2028 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ނިޔަލަށް އޭނާ އެ މަގާމުގައި ބަހައްޓަން ނިންމައިފި އެވެ.
އުމުރުން 63 އަހަރުގެ ޑިލަފުއެންޓޭ ގެ އިރުޝާދުގެ ދަށުން ސްޕެއިން ވަނީ އެންމެ ފަހުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދާފަ އެވެ. މި މުބާރާތް ސްޕެއިން އިން ކާމިޔާބުކޮށްފައިވަނީ މުބާރާތުގައި ކުޅުނު ހަތް މެޗުންވެސް މޮޅުވެ ސައްތައިން ސައްތައިގެ މޮޅުވުމުގެ ރެކޯޑަކާއެކުގަ އެވެ.
2028 ވަނަ އަހަރު ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގެ ކުރިން ޑިލަފުއެންޓޭ އަށް އޮތް އެންމެ ބޮޑު ޓެސްޓަކީ 2026 ވަނަ އަހަރު އެމެރިކާ އާއި މެކްސިކޯގެ އިތުރުން ކެނެޑާގައި ބޭއްވުމަށް ހަމަޖެހިފައިވާ ވޯލްޑް ކަޕް ފުޓްބޯޅަ މުބާރާތެވެ. މި މުބާރާތުގެ ކޮލިފައިން މެޗުތައް މިހާރު ފެށިފައިވާއިރު އެ ޓީމު އެންމެ އަވަހަށް ކުޅެން ޖެހިފައިވަނީ އަންނަ މާޗް މަހު ނޭޝަންސް ލީގުގެ ކުއާޓަރ ފައިނަލުގައި ނެދަލޭންޑްސް އާއި ދެކޮޅަށެވެ.
ސްޕެއިން އެންމެ ފަހުން ބަލިވެފައިވަނީ މިދިޔަ އަހަރުގެ މާޗު މަހުގެ 22 ވަނަ ދުވަހު އެކުވެރިކަމުގެ މެޗެއްގައި ކޮލަމްބިއާ އަތުން 1-0 ގެ ނަތީޖާ އަކުންނެވެ.
2013 ވަނަ އަހަރުން ފެށިގެން ސްޕެއިންގެ ޒުވާން ގައުމީ ޓީމުތަކަށް ކޯޗުކޮށްދީފައިވާ ޑިލަފުއެންޓޭ ވަނީ ސްޕެއިންގެ 23 އަހަރުން ދަށުގެ ގައުމީ ޓީމަށް ޓޯކިޔޯ އޮލިމްޕިކްސްގެ ރިހި މެޑަލް ހޯދަދީފަ އެވެ. އަދި އޭނާ ވަނީ 2022 ވަނަ އަހަރުގެ ނޭޝަންސް ލީގުގެ ޗެމްޕިއަންކަން ސްޕެއިން އަށް ހޯދައިދިނުމަށްފަހު އަހަރުގެ އެންމެ މޮޅު ކޯޗުގެ މަގާމްވެސް ހޯދާފަ އެވެ.
ނޭޝަންސް ލީގުގެ ކުއާޓަރ ފައިނަލުގައި ސްޕެއިން ކުޅޭ ދެމެޗަށްފަހު ވޯލްޑް ކަޕްގެ ކޮލިފައިންގައި އެ ޓީމު ވާދަކުރަން ޖެހޭނީ ކޮން ގްރޫޕެއްގައިކަން ސާފު ވެގެންދާނެ އެވެ.