ކުޅުދުއްފުށި އެއަރޕޯޓުގެ ފެންސަށް އެރި ޕިކަޕު ޓޯކޮށްފި
-
ޕިކަޕް ދުއްވަން އިނީ 18 އަހަރު ނުފުރޭ ކުއްޖެއް
-
މިމައްސަލަ ފުލުހުން ދަނީ ތަހުޤީޤު ކުރަމުން
ކުޅުދުއްފުށި ސިޓީގައި 18 އަހަރު ނުފުރޭ ކުއްޖަކު ދުއްވި ޕިކަޕެއް އެ ރަށު އެއަރޕޯޓު ފެންސަށް އެރި މައްސަލާގައި ޕިކަޕް ޓޯވކޮށް މައްސަލަ ތަޙުޤީޤު ކުރަމުންދާކަމަށް ފުލުހުން ވިދާޅުވެއްޖެެވެ.
ސޯޝަލް ސޯޝަލް މީޑިއާގައި ދައުރުވަމުންދާ މިހާދިސާގެ ވީޑިއޯއި ޕިކަޕު ބާރު ސްޕީޑުގައި ދުއްވާފައި ދަނިކޮށް ކޮންޓްރޯލް ނުވެ އެއަރޕޯޓު ފެންސަށް އަރާ މަންޒަރު ފެނެއެވެ. އޭގެ ފަހުން ޕިކަޕުން ދެ މީހަކު ނިކުމެ ޕިކަޕް ވަށައި ގޮސް ލިބުނު ގެއްލުންތައް ބެލުމަށް ފަހު ޕިކަޕް އެތަނުން ނެރެގެން ދުއްވާލާތަން ފެނެއެވެ.
މިމައްސަލާއި ގުޅިގެން ފުލުހުން ވިދާޅުވީ، އެކަން ފުލުހުންގެ ސަމާލުކަމަށް އައުމާއެކު މިހާރު މައްސަލަ ބަލަމުންދާ ކަމަށެވެ. އެގޮތުން މިހާތަނަށް ބެލިބެލުމުން ޕިކަޕް ދުއްވަން އެވަގުތު އިނީ 18 އަހަރު ނުފުރޭ ކުއްޖެއްކަން އެނގިފައިވާ ކަމަށް ފުލުހުން ވިދާޅުވިއެވެ. މިއާއެކު ޕިކަޕް ޓޯކޮށް މައްސަލަ ތަހުޤީޤު ކުރަމުންދާކަން ފުލުހުން ވަނީ ހާމަކޮށްފައެވެ.
ލައިސެންސް ނެތި ނުވަތަ އުމުރު ހަމަނުވާ ކުއްޖަކު އުޅަނދުތައް ދުއްވުމާއި އެކަމަށް މަގުފަހި ކުރުމަކީ ކުށެކެވެ. މިފަދަ މައްސަލަތަކުގައި އުޅަނދުގެ ވެރިފަރާތްވެސް ޖުރިމާނާކުރެއެވެ. އަދި އެ އުޅަނދެއް ވަގުތުން ޓޯކުރެއެވެ.