ރެއާލް މެޑްރިޑް 5-0އިން ބަލިކޮށް ސްޕެނިޝް ސުޕަ ކަޕް އަންހެން ފުޓްބޯޅަ މުބާރާތް ވެސް ބާސެލޯނާ ކާމިޔާބުކޮށްފި އެވެ.
ރެއާލް ކޮޅަށް ބާސެލޯނާގެ ޕޮލެންޑް ފޯވަޑް އެވާ ޕާޖޯ ވަނީ ދެ ލަނޑު ޖަހައިފަ އެވެ. ކެރޮލީން ގްރެހަމް ހަންސެން އާއި ޕެޓްރީސިއާ ގުއިޖާރޯ އާއި ކެޕްޓަން އެލެކްސިއާ ޕުޓެޔާސް ވެސް ވަނީ ގޯލު ޖަހައިފަ އެވެ.
މިއީ ވިދިވިދިގެން ބާސެލޯނާ މި ތަށި ހޯދި ހަތަރު ވަނަ ފަހަރެވެ. ޖުމުލަ ފަސް ވަނަ ފަހަރެވެ.
ބާސެލޯނާގެ އަންހެން ޓީމަކީ ދުނިޔޭގައި މިވަގުތު އޮތް އެންމެ ކާމިޔާބު އެންމެ ވަރުގަދަ ޓީމެވެ. ހުސްވި ދެ ސީޒަނުގައި އެ ޓީމު ވަނީ ޗެމްޕިއަންސް ލީގާއި ސްޕޭނުގެ ހުރިހާ ތައްޓެއް ކާމިޔާކޮށްފަ އެވެ.
މި މެޗުން ބަލިވުމުން ރެއާލް މެޑްރިޑްގެ ކެޕްޓަން ޖެނިފާ ހާމޯސޯ ބުނީ ފައިނަލެއްގައި ފަސް ލަނޑުން ބަލިވުމަކީ ވަރަށް ބޮޑު ހިތްދަތިކަމެއް ކަމަށެވެ. ބާސެލޯނާ އަކީ މޮޅު ޓީމެއް ކަމަށާއި ނަމަވެސް ނަތީޖާ މިހާ ފަރަގު ވެދާނެ ކަމަށް ކުޑަކޮށް ވެސް ހީނުކުރާ ކަމަށެވެ.
އަންހެނުންގެ ސުޕަކަޕް ރެއާލް ކޮޅަށް ފަސް ލަނޑު ޖަހައިގެން ހޯދިއިރު ބާސެލޯނާގެ ފިރިހެން ޓީމު މި މަހުގެ ކުރީކޮޅު ސުޕަކަޕް ކާމިޔާބު ކުރީ ވެސް ރެއާލް މެޑްރިޑް 5-2އިން ބަލިކޮށްފަ އެވެ. ސައޫދީ އަރަބިއާގައި ކުޅުނު އެ ފައިނަލަށް ފަހު ރެއާލް އަށް ވަނީ ވަރަށް ބޮޑަށް ފާޑުކއުން އަމާޒު ވެފަ އެވެ.