މުޅި ރާއްޖެއަށް ކްރިކެޓް ފުޅާކުރުމުގެ މަގްސަދުގައި ކްރިކެޓް ބޯޑު އޮފް މޯލްޑިވިސް އިން "ސީޑްސް" ނަމުގައި ޕްރޮގްރާމެއް ފަށައިފިއެވެ.
ކްރިކެޓްގެ ހިންގުން ހަރުދަނާކޮށް ވައިޑީޕީ ޕްރޮގްރާމްތަށް އިތުރުކުރުމާއި، ރާއްޖޭގައި ކްރިކެޓްގެ ހަރަކާތްތައް އިތުރަށް ފުޅާކޮށް ހިންގުމަކީ ކުރިކެޓް ބޯޑަށް އިންތިހާބުވި އައު ރައީސް މުހަންމަދު ފައިސަލުގެ ވައުދުފުޅެކެވެ. ކުރިކެޓް ބޯޑުގެ ނައިބު ރައީސް އަހްމަދު އިސްހާގް ވިދާޅުވީ އޮށެއް އިންދައިގެން ނޫނީ ގަހެއް ނުފާޅާނެކަމަށާއި އެހެން ކްރިކެޓުން މިފެށީ ރާއްޖޭގައި މި ކުޅިވަރު ފުޅާކުރުމުގެ ބޮޑު ޕްރޮޖެކްޓެއް ކަމަށެވެ.
ކްރިކެޓް ބޯޑުގެ އަމާޒަކީ މި ޕްރޮގްރާމްގެ ދަށުން 5000 ކުދިން ކްރިކެޓަށް ނެރުމެވެ. އެގޮތުން ކޮންމެ އަހަރަކު 8 ރަށެއްގައި މި ޕްރޮގްރާމް ކުރިޔަށް ގެންދާނެ ކަމަށާއި އެ ރަށްރަށުން 1200 ކުދިން ކޮންމެ އަހަރަކު ތަމްރީނު ވެގެންދާނެކަމަށް އިސްހާގު ވިދާޅުވިއެވެ.
"އަހަރަކު 1200 ކުދިން ނެރުން އަޅުގަނޑުމެންގެ މައިގަނޑު އަމާޒަކީ، މުޅި ބަޖެޓުގެ 17 ޕަސެންޓް އަޅުގަނޑުމެން ހާއްސަކޮށްފަ މިވަނީ ކްރިކެޓް ވައިޑީޕީއަށް ނުވަތަ ކުޑަކުދިންގެ ކްރިކެޓް ތަރައްގީއަށް" އިސްހާގް ވިދާޅުވިއެވެ.
އިސްހާގް ވިދާޅުވީ ޒަމާނުއްސުރެ ކުޅިވަރެއްގެ ގޮތުގައި ކްރިކެޓް ކުޅެމުން އައީ މާލެ ސަރަހައްދުގައި ކަމަށެވެ.
އަތޮޅުތެރޭގެ ރަށްތަކަށް ބަލާއިރު ފުވައްމުލަކު ސިޓީގައި ކުރިކެޓްގެ ހަރަކާތްތައް ފެށިގެން އައީ 2011 ވަނަ އަހަރުން ފެށިގެންނެވެ. އަދި ލ.ކުނަހަންދުއަކީ ފަހަކަށް އައިސް އަންހެން ކުރިކެޓްގައި އެންމެ ފާހަގަކޮށްލެވޭ އެއް ރަށެވެ.