ޕްރިމިއާ ލީގުގައި މި ސީޒަނުގައި ރަގަޅު ނަތީޖާތަކެއް ހޯދަމުންދާ ނޮޓިންހަމް ފޮރެސްޓް 5-0 ގެ ނަތީޖާއަކުން ބަލިކޮށް ބޯންމަތު އިން ލީގުގައި ބަލިނުވެ 11 މެޗުގެ ރެކޯޑެއް ހަދައިފި އެވެ.
މި މެޗުން ބޯންމަތު މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 23 މެޗުން ލިބިފައިވާ 40 ޕޮއިންޓާއެކު ތާވަލުގެ ހަތްވަނަ މަގާމް ލިބިފަ އެވެ. މި މެޗުން ނޮޓިންހަމް ފޮރެސްޓް ބަލިވި ނަމަވެސް އެ ޓީމަށް ލިބިފައިވާ 44 ޕޮއިންޓާއެކު އޮތީ ތާވަލުގެ ތިންވަނައިގަ އެވެ.
ބޯންމަތުގެ ވައިޓަލިޓީ ސްޓޭޑިއަމްގައި އެގާރަ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ 9 ވަނަ މިނިޓުގައި އެ ޓީމުގެ ޖަސްޓިން ކްލައިވަޓް ވަނީ ލަނޑެއް ޖަހާ ކުރި ހޯދާފަ އެވެ. މިއީ މި ސީޒަނުގައި އޭނާ ޖެހި 11 ވަނަ ލަނޑެވެ.
މި މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ދެވަނަ ހާފުގެ ކުޅުން ފެށުނުތާ 10 ވަނަ މިނިޓުގައި ޑެންގޯ އޮޓާރާ ވަނީ ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. އޭގެ ފަހުން މެޗުގެ 61 ވަނަ މިނިޓާއި 81 ވަނަ މިނިޓުގައި އޮޓާރާ ވަނީ އިތުރު ދެ ލަނޑު ޖަހާ މި މެޗުގައި ހެޓްރިކް ހަދާފަ އެވެ.
ބޯންމަތު އިން މި މެޗުގައި ޖެހި ފަސްވަނަ ލަނޑަކީ މެޗުގެ އިތުރު ވަގުތުގެ ކުޅުމުގައި އެންޓޮއިން ސެމެންޔޯ ކާމިޔާބުކޮށްދިން ލަނޑެކެވެ.
މި ސީޒަނުގައި ތަފާތު މޮޅު ކުޅުމެއް ދައްކާ ހައިރާންކުރުވަނިވި ނަތީޖާތަކެއް ހޯދާފައިވާ ނޮޓިންހަމް ފޮރެސްޓް ބަލިކޮށް ލީގުގައި ބަލިނުވެ 11 މެޗު ބޯންމަތު އިން ހަމަކޮށްފައިވާއިރު މިއީ އެ ޓީމުގެ ތާރީޚުގައި ޕްރިމިއާ ލީގުގައި ބަލިނުވެ އެ ޓީމަށް ދެމެހެއްޓުނު އެންމެ ރަގަޅު ރެކޯޑެވެ.