ޔަހޫދީ ދައުލަތާއި ޣައްޒާގައި ވެރިކަންކުރާ ޙަމާސާ ދެމެދު ވެފައިވާ ޢުދުވާން ހުއްޓައިލުމުގެ އެއްބަސްވުމުގެ ދަށުން، ޙަމާސުން މިއަދު މިނިވަންކުރި ހަތަރު ޔަހޫދީއެއްގެ ބަދަލުގައި ޔަހޫދީ ޖަލުތަކުގައި ތިބި ފަލަސްޠީނުގެ 200 ޤައިދީން މިނިވަން ކޮށްފިއެވެ.
ޖަނަވަރީ މަހުގެ 19ވަނަ ދުވަހު ތަންފީޒު ކުރި ޢުދުވާން ހުއްޓައިލުމުގެ އެއްބަސްވުމުގެ ދަށުން އަސީރުން ބަދަލުކުރުމަށް ހަމަޖެހިފައި ވަނީ ތިން މަރުޙަލާއަކަށް ބަހާލައިގެންނެވެ. ކޮންމެ މަރުޙަލާއެއް ވެސް 42 ދުވަހަށް ދެމިގެން ދާނެއެވެ. ފުރަތަމަ މަރުަޙަލާގައި ޙަމާސުން ޖުމްލަ 33 އަސީރުން ދޫކޮށްލުމަށް ހަމަޖެހިފައިވެއެވެ. މި މަރުޙަލާގައި ދޫކުރާނީ އަންހެނުންނާއި ކުޑަކުދިންނާއި އުމުރުން 50 އަހަރުން މަތީގެ މީހުންނެވެ. އޭގެ ބަދަލުގައި 2,000އަށް ވުރެ ޤައިދީން ޔަހޫދީން މިނިވަން ކުރާނެއެވެ. އެ އެއްބަސްވުމާ އެއްގޮތަށް އެއްބަސްވުން ތަންފީޒު ކުރި ފުރަތަމަ ދުވަހު ވަނީ ޔަހޫދީންގެ ތިން އަސީރުންގެ ބަދަލުގައި ފަލަސްޡީނުގެ 90 ޤައިދީން މިނިވަން ކޮށްފައެވެ. އެއީ ޙަމާސުން މިނިވަން ކުރާ ކޮންމެ އަސީރަކަށް 30 ޤައިދީންގެ މަގުންނެވެ. އެ ދުވަހަށް ފަހު ކޮންމެ ހަތް ދުވަހަކުން އަސީރުން ބަދަލު ކުރުަމަށް ދެ ފަރާތުން އެއްބަސްވެފައި ވެއެވެ.
އެއްބަސްވުން ތަންފީޒު ކުރިތާ ހަތް ދުވަސް ފާއިތުވުމުން ދެވަނަ ބުރަކަށް މި ވަނީ އަސީރުން ބަދަލު ކޮށްފައެވެ. އެގޮތުން ޙަމާސުން ވަނީ ޔަހޫދީ އަސްކަރިއްޔާގެ ހަތަރު އަންހެން ސިފައިން ރެޑްކްރޮސްއާ ޙަވާލު ކޮށްފައެވެ. އެ ވަގުތު އެ ސަރަޙައްދުގައި ގިނަ ޢަދަދެއްގެ ޙަމާސްގެ ހަނގުރާމަވެރިންނާއި ޢާންމުން އެއްވެ ތިއްބެވެ. އޭގެ އިރުކޮޅެއްގެ ތެރޭގައި ހުޅަނގު އައްސޭރީގައި ހުންނަ ޔަހޫދީންގެ އޮފަރ ޖަލުން ފަލަސްޠީނަށް ނިޞްބަތްވާ ޤައިދީން މިނިވަން ކޮށް ބަސްތަކަށް އަރުވައިގެން ވަނީ ގެންގޮސްފައެވެ. ޔަހޫދީން މިނިވަން ކުރި މީހުންގެ ތެރޭގައި އުމުރަށް ޖަލަށް ލާފައިވާ 121 މީހުންނާއި ދިގު ހުކުމެއް ތަންފީޒު ކުރަމުން ދިޔަ 79 މީހުން ހިމެނެއެވެ. މިނިވަން ކުރި ޤައިދީންގެ ތެރެއިން އެންމެ ދުވަސްވީ މީހާގެ އުމުރަކީ 69 އަހަރެވެ. އަދި އެންމެ ހަގީ އުމުރުން 15 އަހަރުގެ ކުއްޖެކެވެ.
ޔަހޫދީންގެ ޖަލުތަކުން ސަލާމަތްވި ފަލަސްޠީނުގެ ރައްޔިތުންގެ ތެރެއިން 114 މީހުން ގެންގޮސްފައި ވަނީ ހުޅަނގު އައްސޭރީގެ ރާމަالله އަށެވެ. އަދި 16 މީހުން ގެންގޮސްފައި ވަނީ ޣައްޒާގެ ޚާން ޔޫނިސަށެވެ. ދެ ސަރަޙައްދުން ވެސް މިނިވަން ކުރި ޤައިދީންނަށް ވަނީ ހޫނު މަރުޙަބާއެއް ކިފައިފައެވެ. ބާކީ ތިބި 70 ޤައިދީން ގެންގޮސްފައި ވަނީ މިޞްރަށެވެ. މިޞްރުގައި 48 ގަޑިއިރު ހޭދަ ކުރުމަށް ފަހު އެ މީހުން ދެން ގެންދާނީ ތޫނިސަށާއި ތުރުކީވިލާތަށާއި އަލްޖަޒާއިރަށެވެ. ތިން ޤައުމުން ވެސް ވަނީ އެ މީހުން ބަލައިގަތުމަށް އެއްބަސް ވެފައެވެ.