ފޮޓޯއާއި ވީޑިއޯ ދައުރުކުރުމުން ކުދިންނަކީ ކޮން ބައެއްކަން އެނގި، ކަރާމާތަށް އުނިކަން ލިބޭ: އިޖުތިމާޢީ ވުޒާރާ

ކުޑަކުދިންގެ ކަރާމާތަށް އުނިކަމެއް ލިބިދާނެ އެއްވެސް ކަމެއް ވިޔަ ނުދިނުމަށްޓަކާ އެފަދަ ފޮޓޯ އަދި ވީޑިއޯތައް މީޑިއާގައި ދަޢުރު ނުކުރުމަށް އިޖުތިމާޢީ އަދި އާއިލީ ތަރައްޤީއާބެހޭ ވުޒާރާއިން އިލްތިމާސްކުރައްވައިފިއެވެ.

އިޖުތިމާޢީ ތަރައްޤީއާބެހޭ ވުޒާރާއިން ވިދާޅުވީ ސޯޝަލް މީޑިއާގައި ދައުރުކުރާ ފޮޓޯތަކާއި ވީޑިއޯތަކުގެ ސަބަބުން، ސީދާ ގޮތުން ނުވަތަ ނުސީދާގޮތުން ނަމަވެސް އެކުދިންނަކީ ކޮންބައެއްކަން އާއްމުންގެ ތެރެއިން ބަޔަކަށް އިނގިގެންދާކަމަށެވެ. އޭގެ ސަބަބުން އެ ކުދިންގެ ކަރާމާތަށް އުނިކަން ލިބިގެންދާކަމަށާ އެއީ ވުޒާރާއިން ނުހަނު ކަންބޮޑުވާ ކަމެއްކަމަށް ވަނީ ވިދާޅުވެފައެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު ބުނާގޮތަށް، ކުޑަކުދިންގެ ކަރާމާތަށް އުނިކަން އަންނަ ގޮތަށް، ކުޑަކުދިންގެ ޒާތީ މަޢުލޫމާތު އެއްވެސް ފަރާތަކުން އާއްމުކޮށްގެން ނުވާނެއެވެ. ކުށުގެ ތުޙުމަތުގަވާ ކުދިންނާ، ކުޑުގެ ޝިކާރައަކަށްވެފައިވާ ކުދިންނާ އެނުންވެސް ކުޑަކުދިންނާ ގުޅޭ މައްސަލަތަކުގައި އެކުންދިންގެ ނަމާއި އެޑްރެހާއި ތަޢުލީމު ހާސިލްކުރާ ތަނުގެ މަޢުލޫމާތު ފަދަ ޒާތީ އެއްވެސް މަޢޫލޫމާތެއް ހާމަކޮށްގެން ނުވާނެއެވެ. އަދި އެފަދަ ކުއްޖެއްގެ ތަސްވީރު، ވީޑިއޯ ނުވަތަ ސިދާގޮތުން ނުވަތަ ނުސީދާގޮތުންވެސް ކުއްޖާއަކީ ކާކުކަން ދެނެގަނެވޭނެ އެއްވެސް މަޢުލޫމާތެއް މީޑިއާގައި ނުވަތަ އެނޫންވެސް އެއްވެސް ވަސީލަތެއްގައި ޝާއިޢުކުރުމަކީ މަނާކަމެކެވެ.

ކުޑަކުދިންގެ ޙައްޤުތައް ޙިމާޔަތްކޮށް ރައްކާތެރިކުރުމަކީ އާއިލާއާއި މައިންބަފައިންނާއި ބެލެނިވެރިންނާއި މުޖުތަމަޢުއާއި ދަޢުލަތާ އަދި އެހެނިހެން ފަރާތްތަކުގެ ޒިންމާއެއްކަމަށްވެސް ޤާނޫނުގައި ކަނޑައަޅާފައިވެއެވެ.

ކުޑަ ކުދިންގެ ސަލާމަތާ ރައްކާތެރިކަމާ ގުޅޭ ކަންކަމުގައި އެފަދަ ފޮޓޯއާއި ވީޑިއޯ އާއްމުކުރުމުގެ ބަދަލުގައި، ކަމާ ގުޅޭ އިދާރާތަކާ މުވައްސަސާތަކަށް ހުށައަޅައިގެން ކުރިއަށްގެންދިއުމަށް ފުލުހުންނާ އަދި ކަމާގުޅުންހުރި އިދާރާތަކުންވެސް އިލްތިމާސްކުރެއެވެ.