ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެނައުމަށް އެއްބަސްވުމެއް އެކުލަވައިލުމަށް ރަޝިޔާއިން ފަސްޖެހެމުންދާ ނަމަ އެ ޤައުމާ ދެކޮޅަށް އެމެރިކާއިން އަޅާފައިވާ ދަތި ކުރުމުގެ ފިޔަވަޅުތައް އިތުރަށް ހަރުކަށި ކުރާނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ. 2022 ފެބުރުވަރީ 24ވަނަ ދުވަހު ފަށާފައިވާ ހަނގުރާމަ ހުއްޓުމަކަށް ގެނައުމަކީ ޓްރަމްޕްގެ މުހިންމު ވަޢުދެކެވެ.
މި ހަނގުރާމަ ތިންވަނަ އަހަރަކަށް ދިގުދެމިގެން ގޮސްފައިވާއިރު، އިސްވެ ޔޫކްރެއިނަށް ސިފައިން ފޮނުވައިގެން ހަނގުރާމަ ފަށާފައި ވަނީ ރަޝިޔާއިންނެވެ. ރަޝިޔާއިން ޤަބޫލު ކުރާ ގޮތުގައި މިއީ ޚާއްޞަ އަސްކަރީ އޮޕަރޭޝަނެކެވެ. ހަނގުރާމައެއް ނޫނެވެ. ހަނގުރާމައިގެ ތެރެއިން ރަޝިޔާގެ ފައުޖުތަކުން ޔޫކްރެއިންގެ ބޮޑު ސަރަޙައްދަކަށް އަތްގަދަ ކޮށްފައިވާއިރު، 2024 އޮގަސްޓު މަހުން ފެށިގެން ޔޫކްރެއިންގެ ސިފައިން ވެސް ދަނީ ރަޝިޔާގެ ތެރޭގައި ހަރަކާތްތެރިވަމުންނެވެ. އެ ޤައުމުގެ ހުޅަނގު ކޫރްސްކުގެ ބައެއް ސަރަޙައްދުތައް މި ވަގުތު އޮތީ ޔޫކްރެއިންގެ ސިފައިންގެ ބާރުގެ ދަށުގައެވެ.
"އެއްބަސްވުމެއް އެކުލަވައިނުލެވިއްޖެ ނަމަ، އެމެރިކާގައި ވިއްކާ ރަޝިޔާގެ މުދަލުން އިތުރު ޓެކުސް ނަގައި، ޑިޔުޓީ ބޮޑުކޮށް، އިތުރު ފިޔަވަޅުތައް އެޅުން ނޫން ގޮތެއް އަޅުގަނޑަކަށް ނޯންނާނެ،"އެމެރިކާގެ ރައީސް ޑޮނަލްޑް ޓްރަމްޕް
މި ހަނގުރާމަ ނިމުމަކަށް ގެނައުމާ ގުޅޭ ގޮތުން މަޝްވަރާކޮށް، އެއްބަސްވުމެއް އެކުލަވައިލަން ރަޝިޔާއިން ދެކޮޅު ހަދަމުންދާ ނަމަ، ރަޝިޔާއާ ދެކޮޅަށް އެމެރިކާއިން އަޅާފައިވާ ދަތި ކުރުމުގެ ފިޔަވަޅުތައް އެތަކެއް ގުނައަކަށް ހަރުކަށި ކުރާނެ ކަމުގައި ޓްރަމްޕް ވިދާޅުވިއެވެ. އަދި، ހަނގުރާމައިގައި ރަޝިޔާއަށް ވާގިވެރިވާ އެހެން ޤައުމުތަކަށް ފިޔަވަޅުތައް ފުޅާ ކުރުމުގެ ފުރުޞަތު އޮތް ކަމުގައި ވެސް ޓްރަމްޕް ވިދާޅުވިއެވެ.
"އެއްބަސްވުމެއް އެކުލަވައިނުލެވިއްޖެ ނަމަ، އެމެރިކާގައި ވިއްކާ ރަޝިޔާގެ މުދަލުން އިތުރު ޓެކުސް ނަގައި، ޑިޔުޓީ ބޮޑުކޮށް، އިތުރު ފިޔަވަޅުތައް އެޅުން ނޫން ގޮތެއް އަޅުގަނޑަކަށް ނޯންނާނެ، [ހަނގުރާމައިގައި] ބައިވެރިވާ އެހެން ޤައުމުތަކަށް ވެސް އެ މޭރުމުން އަމަލު ކުރާނަން،" ރަޝިޔާއަށް އިންޒާރު ދެއްވައި ސޯޝަލް މީޑިޔާގައި ކުރެއްވި ޕޯސްޓެއްގައި ޓްރަމްޕް ވިދާޅުވިއެވެ. ރަޝިޔާގެ އިތުރުން ފިޔަވަޅުތައް އެޅުމާ މެދު އެމެރިކާއިން ވިސްނަމުން ދަނީ ކޮން ޤައުމުތަކަކަށް ކަން އޭނާ ސާފު ކޮށްދެއްވާފައެއް ނެތެވެ.
ބައިޑަންގެ ސަރުކާރުން ވެސް ރަޝިޔާއަށް ފިއްތުންތައް
ރަޝިޔާ-ޔޫކްރެއިން ހަނގުރާމަ ފެށުމާ އެކު، ހުޅަނގުގެ ބާރުތަކާ ގުޅިގެން އެމެރިކާގެ ކުރީގެ ރައީސް ޖޯ ބައިޑަންގެ ސަރުކާރުން ވެސް ވަނީ ރަޝިޔާއާ ދެކޮޅަށް ހަރުކަށި ފިޔަވަޅުތަކެއް އަޅާފައެވެ. ފިޔަވަޅުތައް އަޅާފައިވާ ދާއިރާތަކުގެ ތެރޭގައި ބޭންކިންގ، ދިފާޢީ، އުފެއްދުންތެރިކަން، ހަކަތަ އަދި ޓެކްނޮލޮޖީގެ ދާއިރާ ހިމެނެވެ. މި ހަނގުރާމައިގެ ތެރެއިން ޔޫކްރެއިންގެ ބޮޑު ސަރަޙައްދެއް ސުންނާފަތި ކޮށްލާފައިވާއިރު، އެ ޤައުމުން އެތަކެއް ސަތޭކަ ހާސް ބަޔަކު ވަނީ މަރުވެފައެވެ.
ރަޝިޔާއަށް އިންޒާރު ދެއްވައި ޓްރަމްޕް ސޯޝަލް މީޑިޔާގައި ޕޯސްޓެއް ކުރެއްވުމާ އެކު ރަޝިޔާއިން ވަނީ އެ ކަމަށް ރައްދު ދީފައެވެ. ރަޝިޔާއިން އދއަށް ކަނޑައަޅާފައި ހުންނަވާ ސަފީރުގެ ނައިބު ދްމީތުރީ ޕަލިޔާންސްކީ ވިދާޅުވީ، އެއްބަސްވުމެއްގެ ގޮތުގައި ޓްރަމްޕް މާނަ ކުރައްވާފައި އެ ވަނީ ކޮން ކަމަކަށް ކަން މޮސްކޯއިން ސާފު ކުރަން ޖެހޭ ކަމުގައެވެ.
"މިއީ، ހަމައެކަނި ހަނގުރާމަ ހުއްޓައިލުމާ ގުޅޭ ސުވާލެއް ނޫން. އެންމެ ފުރަތަމަ ކުރަން ޖެހޭ އެންމެ މުހިންމު ސުވާލުތައް ގުޅިފައި އޮތީ ޔޫކްރެއިން ކާރިސާ ފެށުމަށް މެދުވެރިވި ސަބަބުތަކާ،" އޭނާ ވިދާޅުވިއެވެ.
ރަޝިޔާ-ޔޫކްރެއިން ހަނގުރާމަ ނިމުމަކަށް ގެންނަވާނެ ކަމުގެ ވަޢުދު
އެމެރިކާގެ ރިޔާސީ އިންތިޚާބުގެ ކެމްޕޭންގެ ތެރެއިން ރަޝިޔާ-ޔޫކްރެއިން ހަނގުރާމައާ ގުޅޭ ގޮތުން ޓްރަމްޕް އެތަކެއް ފަހަރަކު ވާހަކަފުޅު ދައްކަވާފައިވެއެވެ. އަދި، އޭނާގެ ސިޔާސަތު ހާމަ ކުރައްވާފައިވެއެވެ. ޓްރަމްޕް ވިދާޅުވީ، ވެރިކަމާ ޙަވާލުވެ ވަޑައިގަންނަވާ ފުރަތަމަ ދުވަހު އެ ހަނގުރާމައަށް ނިމުމެއް ގެންނަވާނެ ކަމުގައެވެ. ނަމަވެސް، އެ މުހުލަތު ފަހަނައަޅައިގެން ދިޔައިރު، އޭނާގެ ވަޢުދު ވަނީ ފޭލުވެފައެވެ. ޓްރަމްޕްގެ މުޝީރުން މިހާރު ބުނަމުން ދަނީ، ރަޝިޔާ-ޔޫކްރެއިން ހަނގުރާމަ ނިމުމަކަށް ގެނައުމަށް އެތަކެއް މަސްތަކެއް ހޭދަވެދާނެ ކަމުގައެވެ.
ރަޝިޔާގެ ތެލާއި ގޭހުގެ ވިޔަފާރިއަށް އިތުރު ފިއްތުންތައް ކުރިމަތި ކުރުމުގެ ގޮތުން އެމެރިކާއިން މި މަހުގެ ކުރީކޮޅުގައި ވެސް ވަނީ ހަރުކަށި ފިޔަވަޅުތަކެއް އަޅާފައެވެ. އެ ފަހަރު އަޅާފައިވާ ފިޔަވަޅުތައް އަމާޒު ކޮށްފައި ވަނީ ރަޝިޔާގެ ތެޔޮ ކުންފުނިތައް ކަމުގައިވާ ގެސްޕްރޮމް ނިޔެފްޓާއި ސުރްބުތުނިޔެފްތެގާސްއާ ދެކޮޅަށެވެ. މީގެ އިތުރުން ރަޝިޔާގައި އުފައްދާ ތެލާއި ގޭސް އެހެން ޤައުމުތަކަށް އުފުލާ 183 އާގުބޯޓަކާ ދެކޮޅަށް ވެސް އެމެރިކާއިން ވަނީ ފިޔަވަޅު އަޅާފައެވެ.
ރަޝިޔާގެ އިތުރުން މެކްސިކޯއާއި ކެނެޑާ އަދި ޗައިނާއާ ދެކޮޅަށް ފިޔަވަޅުތަކެއް އެޅުމަށް ވެސް ޓްރަމްޕް އޮތީ ނިންމަވާފައެވެ. އެއީ، ނުޤަވާޢިދުން އެމެރިކާއަށް ހިޖުރަކުރާ މީހުން ހުއްޓުވުމާއި، މަސްތުވާތަކެތީގެ ނުރައްކާތެރި ބާވަތެއް ކަމުގައިވާ ފެންޓެނިލް އެމެރިކާއަށް އެތެރެ ކުރުން ހުއްޓުވުމަށް އެޅުމަށް ޓްރަމްޕް ނިންމަވާފައިވާ ފިޔަވަޅުތަކެކެވެ.
ޓެކުހާއި ޑިޔުޓީ ބޮޑު ކޮށްގެން އެ ތިން ޤައުމާ ދެކޮޅަށް ފިޔަވަޅު އެޅުމަށް ޓްރަމްޕް ނިންމަވާފައިވާއިރު، އެއީ ވިޔަފާރީގެ ދާއިރާއިން އެމެރިކާގެ އެންމެ ބޮޑު ތިން ބައިވެރިންނެވެ. އެމެރިކާއިން އެ ތިން ޤައުމާ އެކު ކުރާ ވިޔަފާރީގެ މުއާމަލާތްތަކުގެ އަގު އަހަރަކު 2.1 ޓްރިލިޔަން އެމެރިކާ ޑޮލަރަށް އަރައެވެ. މިއާ އަޅައިބަލާއިރު، 2024ވަނަ އަހަރު ރަޝިޔާއިން އެމެރިކާއަށް އެތެރެ ކޮށްފައި ވަނީ 2.9 ބިލިޔަން އެމެރިކާ ޑޮލަރުގެ މުދަލެވެ. އެ އަދަދު 2021ވަނަ އަހަރު ހުރީ 29.6 ބިލިޔަން އެމެރިކާ ޑޮލަރުގައެވެ.