ރައީސްގެ ރ. އަތޮޅު ދަތުރުފުޅު: 8 ވަނަ މަންޒިލަކަށް އިންނަމާދޫ
-
މިއަދުވެސް ރ. އަތޮޅުގެ 4 ރަށަކަށް ވަނީ ވަޑައިގެންފައި
-
މި ދަތުރުފުޅުގައި އެއަތޮޅުގެ ޖުމްލަ 11 ރަށަކަށް ވަޑައިގަންނަވާނެ
މާޅޮސްމަޑުލު އުތުރުބުރީގެ ބައެއް ރަށްތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވާފައިވާ ދަތުރުފުޅުގެ ތެރެއިން އިންނަމާދޫއަށް ވަޑައިގެންފިއެވެ.
ރައީސުލްޖުމްހޫރިއްޔާ އިންނަމާދޫއަށް މިރޭ ވަޑައިގަތުމުން، އެރަށުން ވަނީ އެމަނިކުފާނަށް ހޫނު މަރުހަބާއެއް ދަންނަވާފައެވެ. އެގޮތުން ރައީސުލްޖުމްހޫރިއްޔާއާ ސަލާމްކުރެއްވުމަށް ބަނދަރު ސަރަޙައްދަށް ގިނަ އަދަދެއްގެ އާންމުން ވަނީ އެއްވެފައެވެ.
އިންނަމާދޫއަކީ ރ. އަތޮޅަށް އެމަނިކުފާނު ފައްޓަވާފައިވާ ދަތުރުފުޅުގެ ތެރެއިން ވަޑައިގެންނެވި 8 ވަނަ ރަށެވެ. އިންނަމާދޫއަށް ވަޑައިގެން އެރަށުގެ ރައްޔިތުންނާވެސް އެމަނިކުފާނު ބައްދަލުކުރެއްވުމަށް ވަނީ ހަމަޖެހިފައެވެ.
އެމަނިކުފާނުގެ މި ދަތުރުފުޅުގެ ތެރެއިން ރ. އަތޮޅުން މިހާތަނަށް ވަޑައިގެންނެވި ރަށްތަކަކީ ވާދޫ، ރަސްގެތީމު، އަނގޮޅިތީމު، އުނގޫފާރު، ހުޅުދުއްފާރު، މަޑުއްވަރީ، ރަސްމާދޫ އަދި އިންނަމާދޫއެވެ.
ރައީސުލްޖުމްހޫރިއްޔާ ރ. އަތޮޅަށް ކުރައްވާ މިދަތުރުފުޅުގައި އެއަތޮޅުގެ ޖުމްލަ 11 ރަށަކަށް ވަޑައިގަތުމަށް ވަނީ ހަމަޖެހިފައެވެ. 3 ދުވަހުގެ މި ދަތުރުފުޅު އެމަނިކުފާނު ފެއްޓެވީ އިއްޔެއެވެ. އިއްޔެވެސް 4 ރަށަކަށް ވަނީ ވަޑައިގެންފައެވެ.
މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ގެންދަވަނީ އެ ރަށްރަށުގެ ކައުންސިލްތަކާއި ޑަބްލިއުޑީސީގެ މެންބަރުންނާއި މުއައްސަސާތަކުގެ ވެރިންނާ ބައްދަލުކުރެއްވުމުގެ އިތުރުން ރަށްރަށުގެ ރައްޔިތުންނާވެސް ބައްދަލުކުރައްވާ އެ ރަށްރަށުގެ ތަރައްޤީއަށް އެމަނިކުފާނު ގެންގުޅުއްވާ ސިޔާސަތުތައް ހާމަކުރައްވަމުންނެވެ. އަދި ރިޔާސީ އިންތިޚާބުގެ ކެމްޕޭންގެ ތެރެއިން އެމަނިކުފާނު ރަށްރަށަށް ކޮށްދެއްވާނެކަމަށް ވިދާޅުވެފައިވާ ވަޢުދުފުޅުތައް ތަންފީޒުކުރެއްވުމަށް ކުރައްވާ މަސައްކަތްތަކުގެ ތަފްސީލު ހިއްސާކުރައްވަމުންނެވެ.
ރައީސްގެ މިދަތުރުފުޅަކީ ރައްޔިތުންގެ ޙާލަތު ގާތުން ބެއްލެވުމަށް ކުރައްވާ ސިލްސިލާ ދަތުރުފުޅެކެވެ. އެމަނިކުފާނުގެ ޢަމާޒަކީ ދަޢުރުގެ ތެރޭގައި މީހުން ދިރިއުޅޭ ކޮންމެ ރަށަކަށް ދެ ފަހަރު ވަޑައިގެންނެވުމެވެ.