މަޑުއްވަރީ ކައުންސިލާއި، ޑަބްލިއުޑީސީގެ މެންބަރުންނާއި ރައީސް ބައްދަލުކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މަޑުއްވަރީ ކައުންސިލާއި، އ.ތ.މ ކޮމިޓީ އަދި މުއައްސަސާތަކުގެ އިސްވެރިންނާ ބައްދަލުކުރައްވައި ރަށުގެ ތަރައްޤީއަށްޓަކައި ކުރަން ބޭނުންވާ ކަންކަމާ ގުޅޭގޮތުން މަޝްވަރާކުރައްވައިފިއެވެ.

މި ބައްދަލުކުރެއްވުމުގައި މަޑުއްވަރީ ކައުންސިލުން ވަނީ ރަށުގެ ގިރާ ސަރަޙައްދުގެ މައްސަލައާއި، ބިމުގެ ޖާގައިގެ ދަތިކަން ހައްލުކޮށްދެއްވުމަށާއި، ބިން އިތުރުކުރެވެން އޮތް މިންވަރަކަށް ބިން އިތުރުކޮށްދެއްވުމަށް އެދިވަޑައިގެންފައެވެ. ހަމައެއާއެކު، މަގު ހެދުމުގެ މަޝްރޫޢު އަވަސް ކޮށްދެއްވުމަށާއި، ރަށުގައި އޮތް ބާ ބަނދަރު އަލުން މަރާމާތު ކޮށްދެއްވުމަށްވެސް ކައުންސިލުން ވަނީ އެދިވަޑައިގެންފައެވެ.

މީގެ އިތުރުން މަޑުއްވަރީގެ އިޙްތިޞާޞްގެ ތެރެއަށް ރ. އުފުލަންދޫ އިތުރުކޮށްދެއްވުމަށްވެސް ކައުންސިލުން ވަނީ އެދިޑައިގެންފައެވެ. މީގެއިތުރުން ޒުވާނުންގެ މަރުކަޒު ނިންމަވައި ކައުންސިލާ ހަވާލުކޮށްދެއްވުމަށާއި، ފުޓްބޯޅަދަނޑު ނިންމަވައި ދެއްވުމަށްވެސް ކައުންސިލުން ވަނީ އެދިވަޑައިގެންފައެވެ.

ރައީސުލްޖުމްހޫރިއްޔާ ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ ފަހުގެ މަޢުލޫމާތުތައް ޙިއްޞާކުރައްވާފައެވެ.