ސްޕެއިންގެ ފުޓްބޯޅަ ގަވާއިދަށް އޭނާ ނުބަލާ ކަމަށާއި، ނަމަވެސް އުފާވަނީ އެޓޭކިން މިޑްފީލްޑަރު ޑެނީ އޮލްމޯ ފުޓްބޯޅަ ކުޅޭތީ ކަމަށް ގައުމީ ޓީމުގެ ކޯޗު ލުއިސް ޑެ ލަ ފުއެންޓޭ ބުނެފިއެވެ.
ސްޕޭނުގެ މީޑިޔާތަކާ ވާހަކަ ދައްކަމުން ކޯޗު ބުނީ އޮލްމޯ ސްޕެނިޝް ލީގުގައި ރަޖިސްޓަރ ނުކުރެވިގެން ބާސެލޯނާއިން އުޅެން ޖެހުނު ގޮތުން ކުޅުންތެރިޔާގެ އާއިލާއިން ހިތްދަތިކަމާ ކުރިމަތިލާން ޖެހުނު ކަމަށެވެ.
"އަހަރެން އޭނާ ދަންނަން އޭނާގެ އުމުރުން 16 އަހަރުން ފެށިގެން. އޭނާ ވަނީ އަހަރެންނާއެކު ހުރިހާ އޭޖް ފުރައެއްގައި ކުޅެފައި. މިހެންވީމަ އަހަރެން އޭނާ ދެކެނީ ދަރިއެއް ފަދައިން. އޭނާ އާއި އޭނާގެ އާއިލާ މިދޭތެރެއިން ވަރަށް އުނދަގޫ ދުވަސްތަކެއް ހޭދަކުރި. މީގެ ސަބަބުން އޭނާގެ ކުޅުމަށް ނޭދެވޭ އަސަރުކޮށްފާނެތީވެ އަހަރެން ކަންބޮޑުވި،" ކޯޗު ބުންޏެވެ.
ޖަރުމަނުގެ ލައިފްޒިގުން ސްޕޭނުގެ ބާސެލޯނާ އަށް މި ސީޒަނުގައި ބަދަލުވި ކުޅުންތެރިޔާ އަށް ސީޒަނުގެ ފަހު ބައިގައި ނުކުޅެވޭނެ ކަމަށް ހީކުރެވުނެވެ. އެއީ ބާސެލޯނާގެ މާލީ މައްސަލަތަކާހުރެ ސްޕެނިޝް ލީގުގައި އެކުލަބަށް އޭނާ ރަޖިސްޓަރީ ކުރުމުގައި ދިމާވި ދަތިތަކުންނެވެ. އެންމެ ފަހުން އޭނާ ރަޖިސްޓަރީވީ ކޯޓު އަމުރެއްގެ ދަށުންނެވެ.
ގައުމީ ކޯޗު ޑެލަފުއެންޓޭ ބުނީ މިދިޔަ އަހަރުގެ ޔޫރޯ ސްޕޭނަށް ހޯދައިދޭން އެންމެ ގިނަ ލަނޑު ޖަހައި އެ މުބާރާތުގެ ރަންބޫޓު ހޯދި އޮލްމޯ އަކީ އަބަދުވެސް ގައުމީ ޓީމަށް މުހިންމު ކުޅުންތެރިއެއް ކަމަށެވެ.
ސްޕޭނުގެ ފުޓްބޯޅަ ފެޑަރޭޝަނުން މިހާރު ވަނީ ޑެލަފުއެންޓޭގެ ކޮންޓްރެކްޓް 2028 އަށް އިތުރުކުރަން ނިންމާފަ އެވެ. މިކަމާ ސުވާލު ކުރުމުން ކޯޗު ބުނީ ގައުމީ ޓީމު ރަނގަޅު ނަތީޖާތަކެއް ހޯދައިފި ކަމަށާއި އޭނާ ވިސްނަނީ އެ ނަތީޖާތައް އަދިވެސް ހޯދަން ކަމަށެވެ.