ވައިޑް-ބޮޑީގެ ދަތުރުތައް ޗައިނާއަށް ފަށައިފި

ޤައުމީ އެއަރލައިން، މޯލްޑިވިއަންގެ ވައިޑް-ބޮޑީ މަތިންދާބޯޓުގެ ދަތުރުތައް ޗައިނާއަށް ފަށައިފިއެވެ. އެންމެ ފުރަތަމަ ދަތުރު ފަށާފައިވަނީ ޗައިނާގެ ޗެންޑޫއަށެވެ.

މޯލްޑިވިއަންގެ ވައިޑް-ބޮޑީ މަތިންދާބޯޓު ރާއްޖެ ގެނެސްފައިވަނީ މިމަހުގެ 6 ވަނަ ދުވަހުއެވެ. އެ ބޯޓުގައި ޗައިނާގެ ޗެންޑޫއަށް ކުރި ފުރަތަމަ ދަތުރުގައި 52 ފަސިންޖަރުން ވަނީ ޗައިނާއަށް ދަތުރުކޮށްފައެވެ. އޭގެތެރެއިން 32 މީހުންނަކީ ފަތުރުވެރިންނެވެ.

މޯލްޑިވިއަންގެ ދަތުރުތައް ޗައިނާއަށް ފެށުމާއިއެކު އެއަރލައިނުން ވަނީ ޓިކެޓް އަގުހެޔޮ ފެއަރއެއްވެސް ފަށާފައެވެ. މޯލްޑިވިއަން ހޮލިޑޭސްގެ ޖެނެރަލް މެނޭޖަރ ރިޒަވޭޝަން އެންޑް ޓިކެޓިން އައިމިނަތު ސަމީހާ ވިދާޅުވީ، މިވަގުތު މޯލްޑިވިއަންގެ ޓިކެޓުން ކުރިއަށްގެންދާ ފެއަރއިން މާކެޓްގައި ޗައިނާގެ ޓިކެޓްހުރި އަގާއި އާޅަބަލާއިރު 30 އާއި 50 އިންސައްތައާއި ދެމެދު އަގު ހެޔޮވެގެންދާނެކަމަށެވެ. މިވަގުތު އޮންނާނީ ހަފްތާއަކު 3 ފްލައިޓެވެ. އެއީ ހޯމަ ބުދަ ހުކުރު ދުވަހުކަމަށް އޭނާ ފާހަގަކުރެއްވިއެވެ.

"ގާތްގަނޑަކަށް މާކެޓްގައި އުޅޭ ރޭޓްތަކަށް ބަލާއިރު %30 އާއި %50 ދަށްކޮށް އަޅުގަނޑުމެން މިހާރު މިފަށަނީ ދަތުރުތައް. ބޭނުންނަމަ އެއް މަންޒިލަށް ގޮއްސަ އަނެއް މަންޒިލުން ރިޓާންވެސް ކުރެވޭގޮތައް އޮންނާނީ" އައިމިނަތު ސަމީހާ ވިދާޅުވިއެވެ.

މޯލްޑިވިއަންގެ ކާގޯ ސަރވިސްގެ ސީނިއަރ މެނޭޖަރ ސިވާ ޙަލީމް ވިދާޅުވީ، މި ދަތުރުތަކާއިއެކު ޗައިނާއިން ރާއްޖެއަށް ކާގޯ ގެނައުމަށް ބޮޑު ފަސޭހައެއް ލިބިގެންދާނެކަމަށެވެ. މިއީ ސީދާ ދަތުރުތަކަށް ވުމާއިއެކު މޭވާއާއި ތަރުކާރީގެ ބާވަތްތައްވެސް ތާޒާކަމާއިއެކު ގެނައުމުގެ މަގު ފަހިވެގެންދާނެކަމަށް އޭނާ ވިދާޅުވިއެވެ.

"މި ދަތުރުތަކުގެ ސަބަބުން ހަމަ ގައިމުވެސް ރާއްޖޭގެ ވިޔަފާރިވެރިންނަށް ޗައިނާއިން ރާއްޖެއަށް ކާގޯ ގެނައުމަށް ވަރަށް ބޮޑެތި ފަސޭހަތަކެއް ލިބިގެންދާނެ. އެއީ ޑައިރެކްޓް ފްލައިޓްތަކެއް އަޅުގަނޑުމެން މި ފަށަނީ ޗައިނާގެ 3 ސިޓީއަކަށް" ސިވާ ވިދާޅުވިއެވެ.

މޯލްޑިވިއަންގެ ފުރަތަމަ ދަތުރުގައި ޗެންޑޫއަށް ދަތުރުކުރި އެ ޤައުމުގެ ރައްޔިތަކު ބުނީ މޯލްޑިވިއަންއިން މި ފެށި ސީދާ ދަތުރުތަކާއިއެކު 1 ދުވަހުގެ ދަތުރެއް 6 ގަޑިއިރަށް ކުޑަވެފައިވާކަމަށެވެ. މިއީ އެމީހުންނަށް ލިބިގެންދިޔަ ވަރަށް ބޮޑު ފަސޭހައެއްކަން އޭނާ ފާހަގަކުރެއްވިއެވެ.

މޯލްޑިވިއަންގެ ޚިދުމަތަށް ވައިޑް-ބޮޑީ މަތިންދާ ބޯޓު ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަންނަ އޮކްޓޯބަރ މަހުގެ ތެރޭގައި އިތުރު ވައިޑް-ބޮޑީ މަތިންދާބޯޓެއް ރާއްޖެ ގެނެސް ޔޫރަޕަށް ދަތުރު ފެށުމަށް ޤައުމީ އެއަރލައިނުން ދަނީ ތައްޔާރުވަމުންނެވެ.