ހަމަނުޖެހުން ފިޔަވައި އެހެން ކަމެއް ނުފެނި ފަލަޞްޠީނުގައި ކުޑަކުދިންގެ ޖީލެއް ބޮޑުވަމުން އެބަދާ ކަމަށާއި، ނާއިންސާފާއި، އަޅުވެތިކަމުގެ ސަބަބުން އެކުދިންގެ ހިތްތަކުގައި ނަފުރަތު އުފެދި، ހައްދު ފަހަނައަޅާ ދިއުމުގެ ވިސްނުމަށް އެނބުރުމުގެ ފުރުޞަތު އެބައޮތް ކަމަށް ޚާރިޖީ ވަޒީރު ދުންޔާ މައުމޫން ވިދާޅުވެއްޖެއެވެ.
އެކަމަނާ މިހެން ވިދާޅުވީ ފަލަޞްޠީނާއި އިސްރާއީލާ ދެމެދު ޞުލްޙަ ޤާއިމް ކުރުމަށް ބާރުއެޅުމުގެ ގޮތުން ބާއްވަމުންދާ އދ.ގެ ބައިނަލްއަޤްވާމީ ކޮންފަރެންސްގައި ރާއްޖޭގެ ފަރާތުން ތަޤުރީރު ކުރައްވަމުންނެވެ.
"ޕީސް އިސް ޕޮސިބަލް-ފްރޭމްވަރކްސް ފޯރ އަ ވޭ ފޯވަރޑް"ގެ ނަމުގައި ސްވިޓްޒަލޭންޑްގެ ޖެނީވާގައި ކުރިޔަށްދާ މި ކޮންފަރެންސްގައި ޚާރިޖީ ވަޒީރު ދެއްވި ތަޤުރީރުގައި ފަލަސްޠީނާއި އިސްރާއީލުގެ މައްސަލައިގައި ރާއްޖެއިން ގެންގުޅޭ ސިޔާސަތު ހާމަކުރެއްވިއެވެ.
1967 ގެ ސަރަހައްދީ ރޮނގަށް ބިނާކޮށް ފަލަސްޠީނާއި އިސްރާއީލު ދެ ދައުލަތެއްގެ ގޮތުގައި ޤާއިމްކޮށް، އިރުމަތީ ޤުދުސް ފަލަސްޠީނުގެ ވެރިރަށުގެ ގޮތުގައި ކަނޑައެޅުމަށް ރާއްޖެއިން ތާއީދުކުރާކަމަށް ދުންޔާ ވިދާޅުވިއެވެ. އަދި، އަމިއްލަވަންތަކަމާއި އެކު ދިރިއުޅުމުގެ ހައްޤު ހޯދުމަށް ފަލަސްޠީނުގެ ރައްޔިތުން ކުރަމުންދާ މަސައްކަތްތަކަށް ދިވެހި ދައުލަތުގެ ފުރިހަމަ ތާއީދާއި އެއްބާރުލުން ދެއްވާނެކަމުގެ ޔަޤީންކަން އެކަމަނާ ދެއްވިއެވެ.
ދުންޔާގެ ވާހަހަފުޅުގައި އިސްރާއީލުން ފަލަސްޠީނުގެ ބިންތަކަށް އަތްގަދަކޮށް، ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ލާއިންސާނީ އަމަލުތައް ކުށްވެރިކުރައްވާ، އެކަންތައް ހުއްޓުމަކަށް ގެނައުމަށް ޔަހޫދީ ދައުލަތަށް ގޮވާލެއްވިއެވެ.