އަޒަރްބައިޖާން އެއަރލައިންސްގެ މަތިންދާބޯޓަކަށް އޮޅިގެން ޙަމަލާދީ ވައްޓައިލި ހާދިސާގެ ޒިންމާ އުފުލުމަށް އަޒަރްބައިޖާންގެ ރައީސް އިލްހާމް އަލިޔެފް ރަޝިޔާއަށް ގޮވައިލައްވައިފިއެވެ. ޑިސެންބަރު 25ވަނަ ދުވަހު ހިނގި އެ ހާދިސާގައި މަތިންދާބޯޓުގައި ދަތުރު ކުރަމުން ދިޔަ ފަސިންޖަރުންނާއި ފަޅުވެރިންގެ ތެރެއިން 38 މީހުން މަރުވިއެވެ. އަދި، 29 މީހުން ޒަޚަމުވިއެވެ.
އަޒަރްބައިޖާން އެއަރލައިންސް ފްލައިޓް 8432 ވެއްޓިފައި ވަނީ ކަޒަޚްސްތާނުގެ ރަށެއް ކަމުގައިވާ އަކްތައުއަށެވެ. މި ހާދިސާ ހިނގާފައި ވަނީ ރަޝިޔާގެ ދެކުނުގައި އޮތް ޗިޗްނިިޔާގެ ވެރިރަށް ގްރޯޒްނީއަށް ދަތުރު ކުރި މަގުމަތީގައެވެ. "އަޅުގަނޑުމެންނަށް ވަރަށް ސާފުކޮށް ދެންނެވޭނެ މަތިންދާބޯޓު ވެއްޓިފައި ވަނީ ރަޝިޔާއިން ދިން ޙަމަލާއަކާ ގުޅިގެން ކަން،" އަލިޔެފް ވިދާޅުވިއެވެ. "އެއީ ގަސްދުގައި ދީފައިވާ ޙަމަލާއެކޭ ނުދަންނަވަން، ނަމަވެސް، އެ ކަން އެ އޮތީ ހިނގާފައި."
އަލިޔެފް ވިދާޅުވީ، މަތިންދާބޯޓަށް ޙަމަލާ ދީފައި ވަނީ ރަޝިޔާގެ ވައިގެ ސަރަޙައްދުން ދަތުރު ކުރަމުން ދަނިކޮށް ކަމުގައެވެ. އަދި، ޙަމަލާގައި ލިބުނު ގެއްލުންތަކާ އެކު، މަތިންދާބޯޓުގެ ކޮންޓުރޯލު ގެއްލި، އެ އުޅަނދު ވެއްޓިފައި ވަނީ ކުއްލި ހާލަތުގައި ބިމަށް ތިރިކުރަން މަސައްކަތް ކުރަމުން ދަނިކޮށް ކަމުގައި ވެސް އޭނާ ވިދާޅުވިއެވެ. ރަޝިޔާގެ ވެރިރަށް ކްރެމްލިނުން އެންމެ ފުރަތަމަ ބުނެފައި ވަނީ، މަތިންދާބޯޓު ވެއްޓިފައި ވަނީ އޭގައި އުދުހެމުން ދިޔަ ދޫނިތަކެއް ޖެހި، ލިބުނު ގެއްލުންތަކާ ގުޅިގެން ކަމުގައެވެ.
އަލިޔެފް ވަނީ މި ކަމާ މެދު ކަންބޮޑުވުން ފާޅުކުރައްވައި، ރަޝިޔާއިން ކަމުގެ ޙަޤީޤަތް ފޮރުވަން މަސައްކަތް ކުރަމުންދާ ކަމަށް ތުހުމަތު ކުރައްވާފައެވެ. ނަމަވެސް، ޑިސެންބަރު 29ވަނަ ދުވަހު ރަޝިޔާގެ ރައީސް ވްލަޑިމިޔަރ ޕުޓިން ވަނީ އަލިޔެފަށް ފޯނުން ގުޅުއްވައި، ރަޝިޔާގެ ވައިގެ ސަރަޙައްދުގައި ހިނގި އެ ހާދިސާއާ ގުޅިގެން މަޢާފަށް އެދިވަޑައިގަންނަވާފައެވެ. އަދި، އެ ހާދިސާ ހިނގާފައި ވަނީ އެ މަތިންދާބޯޓު ދަތުރު ކުރަމުން ދިޔަ ސަރަޙައްދަށް ޔޫކްރެއިނުން ފޮނުވާފައިވާ އަސްކަރީ ޑްރޯންތަކެއް ދިފާޢު ކުރުމަށް ރަޝިޔާގެ އަސްކަރިއްޔާއިން މަސައްކަތް ކުރަމުން ދިޔަ ދަނޑިވަޅެއްގައި ކަން ހާމަ ކުރައްވާފައެވެ.
މި ކަމާ ގުޅޭ ގޮތުން ކްރެމްލިނުން ބަޔާނެއް ނެރެފައިވީ ނަމަވެސް، މަތިންދާބޯޓު ވެއްޓުނީ ރަޝިޔާގެ ޙަމަލާއެއްގެ ސަބަބުން ކަމަށް އެއްބަސްވެފައެއް ނުވެއެވެ. އަދި، އެ ހާދިސާއާ ގުޅޭ ޖިނާޢީ ތަޙުޤީޤެއް ފަށާފައިވާ ކަން ވެސް ކްރެމްލިނުން ހާމަކުރިއެވެ. އަލިޔެފް ވިދާޅުވީ، އެ ހާދިސާއާ ގުޅިގެން ރަޝިޔާއިން ޢާންމުކޮށް ފާޅުގައި މަޢާފަށް އެދެންޖެހޭނެ ކަމަށް ޤަބޫލު ކުރައްވާ ކަމުގައެވެ. އަދި، އެ ކަމަށް އެދި މީގެ ދެ ދުވަސްކުރިން ރަޝިޔާއަށް ލިޔެފައިވާނެ ކަމުގައި ވެސް އޭނާ ވިދާޅުވިއެވެ.
"ފުރަތަމަ ކަމަކީ، ރަޝިޔާއިން އަޒަރްބައިޖާނުގެ ކިބައިން މަޢާފަށް އެދެން ޖެހޭނެ. ދެވަނަ ކަމަކަށް، އެ ކަމުގެ ޒިންމާ އުފުލަން ޖެހޭނެ. ތިންވަނަ ކަމަކީ، އެ ކަމުގައި ޒިންމާވާ މީހުން ހޯދައި އެ މީހުންނަށް ޙައްޤު އަދަބު ދިނުން، އަދި އަޒަރްބައިޖާނާއި މަރުވި މީހުންގެ ޢާއިލާތަކާއި ޒަޚަމުވި މީހުންނަށް ބަދަލު ދިނުން. އަޅުގަނޑުމެންގެ ޝަރުޠުތަކަކީ އެއީ،" އަލިޔެފް ވިދާޅުވިއެވެ. އޭނާއަށް ފޯނުން ގުޅުއްވައި ޕުޓިން މަޢާފަށް އެދިވަޑައިގަންނަވާފައިވާ ކަން ވެސް އަލިޔެފް ފާހަގަ ކުރެއްވިއެވެ.
އަޒަރުބައިޖާނުގެ މަތިންދާބޯޓު ވެއްޓުމުގެ ހާދިސާއިން ރަޝިޔާ-ޔޫކްރެއިން ހަނގުރާމަ ހިނގަމުންދާ ސަރަޙައްދުތަކުން ދަތުރު ކުރާ މަދަނީ އުދުހުންތަކަށް އޮތް ނުރައްކާ ހާމަވެގެން ދެއެވެ. 2014ވަނަ އަހަރު މެލާޝިޔާ އެއަރލައިންސްގެ އެމްއެޗް-17 އަދި 2020ވަނަ އަހަރު ޔޫކްރޭނުގެ މަތިންދާބޯޓެއް ވެސް ވަނީ މި ފަދަ ހާދިސާތަކުގައި ވެއްޓިފައެވެ.