ނައިންޓީ ޕްލަސް ގޯލްޑް ކަޕް 2024 ގެ ފަހުރުވެރި ޗެމްޕިއަންކަން ބ. އޭދަފުށި ހޯދައިފިއެވެ.
މިރޭ ގަލޮޅު ދަނޑުގައި ކުޅުނު ފައިނަލް މެޗުގައި އައްޑޫ ސިޓީ ބަލިކޮށް މުބާރާތުގެ ޗެމްޕިއަންކަން އޭދަފުށިން ހޯދީ 2-0 ން ކުރި ހޯދައިގެންނެވެ.
ފައިނަލް މެޗު ޝަރަފްވެރިކޮށްދެއްވީ ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އަދި ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުﷲ ރާފިއު އާއި މިނިސްޓްރީގެ ބައެއް އިސް ވެރިންގެ އިތުރުން ދައުލަތުގެ ބައެއް ވަޒީރުންވެސް މިރޭގެ މެޗު ބައްލަވާލެއްވުމަށް ދަނޑަށް ވަޑައިގެންނެވިއެވެ.
ފައިނަލް މެޗުގައި ފުރަތަމަ ލަންޑު ޖަހާ މެޗުގެ ލީޑް ނެގީ އޭދަފުށިންނެވެ. އެއީ މެޗުގެ 39 ވަނަ މިނިޓްގައި ޖޯޒީ ނަމްބަރު 10 ހަމްޒާ މުހައްމަދު (ހަމްޕު) ނަގައިދިން ކޯނަރަކުން ޖޯޒީ ނަމްބަރު 12 މުހައްމަދު ފާސިރު ބޮލުން ޖަހާ ގޯލުގެ ކަނަށް ފޮނުވާލި ހިތްގައިމު ގޯލަކުންނެވެ.
ފުރަތަމަ ހާފުގައި ބޮޑަށް ގޭމް ކޮންޓްރޯލްކޮށްގެން ކުޅުނީ އޭދަފުށިންނެވެ. އަދި އައްޑޫ ގޯލަށް އޭދަފުށިން ނުރައްކާތެރި ހަމަލާތަކެއް އަމާޒު ކުރިނަމަވެސް ކީފަރު ވަނީ ގިނަ ހަމަލާތައް ދިފާއު ކޮށްފައެވެ.
އޭދަފުށިން ދެ ވަނަ ލަނޑު ޖަހާފައިވަނީ މެޗުގެ 90 ވަނަ މިނިޓްގައި ޖާޒީ ނަމްބަރު 50 އަލީ ފާސިރް (ސެންޓޭ) ވަރަށް ހުސްކޮށް ގޮސް އޭރިއާތެރެއަށް ވަދެ ފޮނުވާލި ހިތްގައިމު ގޯލަކުންނެވެ. ދެޓީމުގެ ކުޅުންތެރިންވެސް މޮޅު ކުޅުމެއް ދެއްކި މި މެޗުގެ ދެވަނަ ހާފުގައި އައްޑޫ ސިޓީއަށް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެގެންދިޔައީއެވެ.
މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމު ލިބުނީ އޭދަފުށީ ޓީމުގެ މުހައްމަދު ފާސިރަށެވެ. އަދި މުބާރާތުގެ އެންމެ މޮޅު ގޯލްކީޕަރުގެ މަގާމުވެސް ލިބުނީ އޭދަފުށީ ކީޕަރު އަބުދުﷲ ޒިޔަޒަންއަށެވެ.
މުބާރާތުގައި އެންމެ ގިނަ ލަނޑު ޖެހި ކުޅުންތެރިޔާއަށްދޭ ރަން ބޫޓް ލިބުނީ މުބާރާތުގައި އެންމެ ގިނަ ލަނޑު ޖެހި ދެ ކުޅުންތެރިކަމަށްވާ، ދ. މީދު ޓީމުގެ އިބްރާހިމް އިމްރާންއެވެ. އަދި ފުވައްމުލަކު ސީޓީގެ ޓީމަށް ކުޅުނު ބިދޭސީ ކުޅުންތެރިޔާ ކޯފީއަށެވެ.
މިއީ ފަހުގެ ތާރީހެއްގައި ގަލޮޅު ދަނޑޫ ފުރާލި ފުރަތަމަ މެޗެވެ. އޭދަފުއްޓާއި އައްޑޫ ސިޓީގެ 1200 އަށްވުރެ ގިނަ ސަޕޯޓަރުން މި މެޗު ބެލުމަށް ދަނޑަށް ވަނެވެ.