އަމާޒާ ގާތަށް، 17 ދުވަސްތެރޭ ލައްކައަކަށްވުރެ ގިނަ ފަތުރުވެރިން

ޑިސެންބަރުމަހުގެ މިހާތަނަށް ރާއްޖެއަށް ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އެންމެ ފަހުގެ ތަފާސްހިސާބުތައް ދައްކާގޮތުން ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފައެވެ. މި އަދަދަކީ މިދިޔަ އަހަރުގެ މި މުއްދަތާއި އަޅާ ބަލާއިރު %2.9 އިތުރު އަދަދެކެވެ. މިދިޔަ އަހަރުގެ ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް އައިސްފައިވަނީ 100،652 ފަތުރުވެރިންނެވެ.

ތަފާސްހިސާބުތައް ދައްކާގޮތުން އެވްރެޖްކޮށް ކޮންމެ ދުވަހަކު މިހާރު ރާއްޖެއަށް 6092 ފަތުރުވެރިން އާދެއެވެ. މިމަހުގެ ކުރީކޮޅު ރާއްޖެއަށް ކޮންމެ ދުވަހަކު އަންނަ ފަތުރުވެރިންގެ އަދަދުތައް ހުރީ 5000ގައެވެ.

ފަތުރުވެރިންގެ ޖުމްލަ އަދަދަށް ބަލާއިރު، އަހަރުގެ މިހާތަނަށް ވަނީ 1.9 މިލިޔަން ފަތުރުވެރިން ޒިޔާރަތްކޮށްފައެވެ. މިދިޔަ އަހަރުގެ މިހާތަނަށް ރާއްޖެއަށް އައިސްފައިވާ 1.7 މިލިޔަން ފަތުރުވެރިންނާއި އަޅާ ބަލާއިރު %8.8 އިތުރު އަދަދެކެވެ.

ފަތުރުވެރިން އެންމެ ގިނައިން އަންނަ 3 ޤައުމު:

• ޗައިނާ – 259،222 ފަތުރުވެރިން
• ރަޝިޔާ – 214،271 ފަތުރުވެރިން
• އިނގިރޭސިވިލާތް - 170،906 ފަތުރުވެރިން

ސަރުކާރުން މިއަހަރަށް 2 މިލިޔަން ފަތުރުވެރިން ގެނައުމަށެވެ. އަހަރުގެ ބާކީ 14 ވަރަކަށް ދުވަސް އޮތްއިރު، ސަރުކާރުން އަމާޒަކީ މިއަހަރު ރާއްޖެއަށް 2 މިލިޔަން ފަތުރުވެރިން ގެނައުމެވެ. އަދި އަހަރުގެ މިހާތަނަށް ރާއްޖެއަށް 1.9 މިލިޔަން ފަތުރުވެރިން އައިސްފައިވާއިރު މިއަހަރުގެ އަމާޒު ހާސިލްކުރަން ދެން ބޭނުންވަނީ 58،805 ފަތުރުވެރިންނެވެ.