ސިއްޙީ ސަބަބުތަކަށްޓަކައި ޕީއެސްއެމްގެ އެމްޑީގެ މަޤާމުން ސަޢީދު އިސްތިއުފާދެއްވައިފި

ޕަބްލިކް ސަރވިސް މީޑިއާ، ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމުން މުޙައްމަދު ސަޢީދު އިސްތިއުފާދެއްވައިފިއެވެ. ސަޢީދު އިސްތިއުފާދެއްވީ އިއްޔެގެ ވަގުތެއްގައެވެ.

ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމުން އިސްތިއުފާދެއްވީ، ސިއްޙީ ސަބަބުތަކާއި ގުޅިގެން، ރާއްޖެއިން ބޭރުން ގިނަ ދުވަހު ފަރުވާ ހޯއްދަވަން ޖެހިވަޑައިގަންނަވާތީކަަމަށް ސަޢީދު ވަނީ ވިދާޅުވެފައެވެ. ސަޢީދު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމަނިކުފާނަށް އިތުބާރުކުރައްވައި ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް ޢައްޔަންކުރެއްވިކަމަށްޓަކައި ޝުކުރު އަދާކުރައްވާފައެވެ.

ޕީއެސްއެމްގެ މެނޭޖިންގ ޑިރެކްޓަރުކަމުގެ މަޤާމަށް ސަޢީދު އައްޔަންކުރައްވާފައިވަނީ މިއަހަރުގެ އޯގަސްޓުމަހުގެ 24 ވަނަ ދުވަހުއެވެ. ސަޢީދު ވަނީ ފާއިތުވި 4 މަހެއްހާ ދުވަހު ޕީއެސްއެމްގެ ކުރިއެރުމަށް ގިނަ މަސައްކަތްތަކެއް ކުރައްވާފައެވެ. އަދި ސަޢީދު ފާހަގަކުރެވިފައިވަނީ ހުރިހައި މުވައްޒަފުންނާވެސް ގުޅޭ ވެރިއެއްގެ ގޮތުގައެވެ.

ސަޢީދު ވަނީ 1989 ވަނަ އަހަރުން ފެށިގެން ސަރުކާރުގެ އެކި މަޤާމްތައް ފުރުއްވާފައެވެ. އެގޮތުން އެޑިއުކޭޝަން މިނިސްޓްރީގެ ޕަރމަނަންޓް ސެކްޓްރީކަމާއި ޑިރެކްޓަރ ޖެނެރަލްގެ މަޤާމުވެސް ފުރުއްވާފައިވެއެވެ. އަދި މީޑިއާ އޮފިސަރެއްގެ މަޤާމުން ފެށިގެން ތައުލީމީ ދާއިރާގެ އެކިއެކި މަޤާމުތައް ފުރުއްވާފައިވެއެވެ. މީގެއިތުރުން ސަރުކާރުގެ މުހިންމު އެކިއެކި ކޮމިޓީތަކާއި އާސަންދަ ކުންފުނީގެ ބޯޑު މެންބަރުކަންވެސް ކުރައްވާފައިވެއެވެ.