ކަރަންޓު ބިލުގައި ހިމަނައިގެން ރަށްރަށުގެ ގޭބިސީތަކަށް ވެމްކޯއިންދޭ ޚިދުމަތުން ފީ ނަގަން ފަށަނީ

ވެމްކޯއިން ޚިދުމަތްދެމުންއަންނަ ރަށްރަށުގެ ގޭބިސީތަކުގެ ކުނި ބިލް، އަންނަމަހުން ފެށިގެން ކަރަންޓު ބިލުގައި ހިމަނައިގެން އަގުނެގުމަށް އެކުންފުނިން ނިންމައިފިއެވެ.

ކުނި ބިލު ކަރަންޓު ބިލާ އެއްކޮށްލައިގެން ފޮނުވަން ފުރަތަމަ ފަށާފައިވަނީ މިދިޔަ އަހަރު މާލެ ސަރަޙައްދުގައެވެ.

ވެމްކޯއިން މިހާރު އަންނަނީ މާލެ ސަރަޙައްދުގެ އިތުރުން ސިޓީތަކާއި ލ. ފޮނަދޫއާއި ކ. މާފުށީގައި މި ޚިދުމަތް ވަނީ ފަށާފައެވެ. އެ ހުރިހާ ރަށެއްގައިވެސް މިހާތަނަށް ޚިދުމަތް ދެމުންއައީ އެއްވެސް އަގެއް ނުނަގައެވެ. ނަމަވެސް އަންނަ މަހުން ފެށިގެން ވެމްކޯއިން ޚިދުމަތް ދެމުން އަންނަ ސަރަޙައްދުތަކުގައި އަގު ނަގަން ވަނީ ނިންމާފައެވެ. ދާދިފަހުން ހިންމަފުށީގައިވެސް ވެމްކޯގެ ޚިދުމަތް ވަނީ އިފްތިތާހްކޮށްފައެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވެމްކޯގެ އެސިސްޓެންޓް މެނޭޖަރ، ސޭލްސް އެންޑް ޕްރޮޖެކްޓް މުޙައްމަދު އަކްރަމް ވިދާޅުވީ ކުނި ބިލު ކަރަންޓު ބިލާ އެއްކޮށްލުމުން ބިލްދައްކާ މީހުންނަށް ފަސޭހަ ވާނެކަމަށެވެ. އަދި ކުނި ބިލު ކަރަންޓު ބިލުގައި ހިމަނާފައި ފޮނުވާނީ މީޓަރަށް 34 ޔުނިޓް އެރާ ގޭބިސީތަަކަށްކަމަށް އޭނާ ވިދާޅުވިއެވެ.

" ޖެނުއަރީ 1 ގައި ބިލް ޓައިކުރެވިގެން މިދަނީ ޚިދުމަތް ދޭ ރަށްތަކަށް، ފެނަކަ ނުވަތަ ސްޓެލްކޯގެ ބިލަށް. ޚިދުމަތް ޖެނުއަރީގައި ފެށިނަމަވެސް ބިލް ކުރެވިގެންދާނީ ޖެނުއަރީ މަހު ޚިދުމަތް ދިނުމަށްފަހު ފެބްރުއަރީ މަހު" ވެމްކޯގެ އެސިސްޓެންޓް މެނޭޖަރ، ސޭލްސް އެންޑް ޕްރޮޖެކްޓް މުޙައްމަދު އަކްރަމް ވިދާޅުވިއެވެ.

ވެމްކޯގެ ޖެނެރަލް މެނޭޖަރ، ސަދަން އޮޕަރޭޝަންސް އަޙްމަދު ޝާފިޢު ވިދާޅުވީ ބިލު އެއްކޮށްލުމަށް ނިންމާފައިވަނީ ކަމާ ބެހޭ ފަރާތްތަކާއެކު މަޝްވަރާ ކުރުމަށްފަހުގައިކަމަށެވެ. މީގެ ކުރިން ކޮންމެ ދުވަހަކު ކުނި ނެގުމުގެ ޚިދުމަތް ނުދިންނަމަވެސް އަންނަމަހުން ފެށިގެން ކޮންމެ ދުވަހަކުވެސް ވެމްކޯގެ ޚިދުމަތް ދޭ ރަށްތަކުގައި އެޚިދުމަތް ދެމުންގެންދާނެކަން ޝާފިއު ވިދާޅުވިއެވެ. އަދި އެކި ރަށްރަށުގައި ވެމްކޯގެ އޮޕަރޭޝަންތައް ކުރިއަށްގެންދާނީ ކަނޑައެޅިފައިވާ ވަކި އުސޫލުތަކެއްގެ ތެރެއިންކަމަށެވެ.

"ޖެނުއަރީ 1 ގައި މިވަގުތު ޚިދުމަތް ދެމުންދާ ހުރިހާ ފަރާތްތަކަށްވެސް ސިސްޓަމްގެ ތެރެއިން ބިލް މާޖްވެގެންދާނެ. ރަޖިސްޓަރ ނުވެ ތިބި މީހުންނަށް ޓައި ޕްރޮސެސްގެ ތެރެއިން ރަޖިސްޓަރ ވެގެންދާނެ. ޚިދުމަތް ނުހޯދާ ފަރާތްތަކަށް ގޭޓް ސެންޓަރުގެ ޚިދުމަތް މި އޮންނަނީ" ވެމްކޯގެ ޖެނެރަލް މެނޭޖަރ، ސަދަން އޮޕަރޭޝަންސް އަޙްމަދު ޝާފިޢު ވިދާޅުވިއެވެ.

ވެމްކޯއިން ކުނީގެ ޚިދުމަތްދޭ އަގުތަކަށް ބަލާއިރު ކޮންމެ ގޭބިސީއަކަށް އަގު ކުރަނީ 150 ރުފިޔާއެވެ. އަދި ވިޔަފާރީތަކަށް ނަގަނީ ކޮންމެ ދުވަހަކަށް ލިޓަރަކަށް 20 ލާރިއެވެ. އަދި ގޭޓް ފީގެ ގޮތުގައި ޓަނަކަށް 212 ރުފިޔާ ނެގުމަށް ވަނީ ކަނޑައަޅާފައެވެ.