މިދައުރުގެ %73 މަސައްކަތް ނިންމައި، މަޖިލިސް ޗުއްޓީއަށް!

ރައްޔިތުންގެ މަޖިލީހުގެ ހިންގަމުންމިދާ ދައުރު ނިންމާލައި މެންބަރުން ޗުއްޓީއަށް ގޮސްފިއެވެ. މިއީ މަޖިލީހުގެ މިއަހަރުގެ ފަހު ދައުރެވެ.

ރައްޔިތުންގެ މަޖިލީހުގެ މި ދައުރު ނިންމަވާލައްވަމުން މަޖިލީހުގެ ރައީސް ޢަބްދުއްރަޙީމް އަބްދުﷲ ވަނީ ދައުރުގައި ކުރެވުނު މަސައްކަތްތަކުގެ ތަފާސްހިސާބުތައް ހިއްސާކުރައްވާފައެވެ. އެގޮތުން، މި ދައުރު ނިންމަވާލައްވަނީ 73.3 އިންސައްތަ މަސައްކަތް ނިންމާލުމަށްފަހު ކަމަށް އެމަނިކުފާނު ވިދާޅުވިއެވެ. 20ވަނަ މަޖިލީހުގެ ފުރަތަމަ ދައުރު އަދި މިއަހަރުގެ ތިންވަނަ ދައުރު ނިންމާލީ 82.9 އިންސައްތަ މަސައްކަތް ނިންމާލުމަށްފަހުއެވެ.

ޢަބްދުއްރަޙީމް ވިދާޅުވި ގޮތުގައި މި ދައުރުގެ ތެރޭގައި 27 ޖަލްސާއެއް ވަނީ ބާއްވާފައެވެ. އެއީ ޖުމްލަ 67 ގަޑިއިރެވެ. އަދި ކޮމިޓީތަކުގެ 165 ބައްދަލުވުން ބާއްވާފައިވާއިރު އެއީ 118 ގަޑިއިރުގެ މަސައްކަތް ކަމަށް މަޖިލީހުގެ ރައީސް ވިދާޅުވިއެވެ.

މި ދައުރުގެ ތެރޭގައި މަޖިލީހުގައި ވަނީ 20 ބިލެއްގެ މައްސައްކަތް އެއްކޮށް ނިންމާލާފައެވެ. މީގެ ތެރޭގައި ޤައުމުގެ އިގްތިޞާދާއި އިޖުތިމާޢީ ކަންކަމާ ގުޅުންހުރި މުހިންމު ބިލުތައް ހިމެނެއެވެ.

މަޖިލީހުން ފާސްކޮށްފައިވާ މުހިންމު ބައެއް ބިލުތައް

• ބޭރު ފައިސާއާ ބެހޭ ބިލު
• ކޮޕީރައިޓާއި އެއާގުޅޭ އެހެނިހެން ޙައްޤުތަކުގެ ޤާނޫނަށް އިސްލާހު ގެނައުމުގެ ބިލު
• ދައުލަތުގެ ދަރަންޏާބެހޭ ބިލު
• ދައުލަތުގެ ފިސްކަލް ޒިންމާގެ ބިލު
• އަރބަން ޑިވެލޮޕްމަންޓް ބިލު
• ޤާނޫނުއަސާސީއަށް އިސްލާޙު ގެނައުމުގެ ބިލު
• ސިޔާސީ ޕާޓީތަކުގެ ޤާނޫނަށް އިސްލާހު ގެނައުމުގެ ބިލު
• ދުންފަތް ކޮންޓްރޯލް ކުރުމާބެހޭ ޤާނޫނަށް އިސްލާހު ގެނައުމުގެ ބިލު
• ދިވެހިރާއްޖޭގެ އެކްސްޕޯޓް އިމްޕޯޓުގެ ޤާނޫނަށް އިސްލާހު ގެނައުމުގެ ބިލު
• މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް އިސްލާހު ގެނައުމުގެ ބިލު
• ދިވެހިރާއްޖޭގެ ޓޫރިޒަމާ ބެހޭ ޤާނޫނަށް އިސްލާހު ގެނައުމުގެ ބިލު
• ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ޤާނޫނަށް އިސްލާހު ގެނައުމުގެ ބިލު

މީގެ އިތުރުން އަންނަ އަހަރަށް ލަފާ ކުރާ ބަޖެޓުވެސް ފާސްކޮށްފައިވަނީ މަޖިލީހުގެ މި ދައުރުގައެވެ. އެގޮތުން ޖުމްލަ 56.6 ބިލިޔަން ރުފިޔާގެ ބަޖެޓެއް ވަނީ ފާާސްކޮށްފައެވެ.

މި ދައުރުގެ ތެރޭގައި އެއް ގަރާރުގެ މަސައްކަތާއި ސަރުކާރުގެ ފަރާތުން ހުށަހެޅުއްވި 13 މައްސަލައާއި ރިޔާސަތުން ހުށަހެޅުއްވި 5 މައްސަލަ އަދި 4 ކުއްލި މައްސަލައިގެ މަސައްކަތްވެސް ނިމިފައިވާ ކަމަށް މަޖިލީހުގެ ރައީސް ވިދާޅުވިއެވެ. އަދި ވަޒީރުންނާ ކުރެވުނު 13 ސުވާލެއްގެ މަސައްކަތްވެސް ނިމިފައިވާ ކަމަށް ވިދާޅުވިއެވެ.

މީގެ އިތުރުން އެހެނިހެން މައްސަލަތަކާ ގުޅޭ 7 ރިޕޯޓެއްގެ މަސައްކަތްވެސް 20ވަނަ މަޖިލީހުގެ މިއަހަރުގެ ފަހު ދައުރުގައި އެއްކޮށް ނިމިފައިވާ ކަމަށް މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވިއެވެ.