އިމާރާތްކުރުމާއި ބެހޭ ވުޒާރާގައި ރޯވި އަލިފާނުގެ %90 މިހާރު ކޮންޓްރޯލް ކުރެވިއްޖެ: އެމްއެންޑީއެފް
-
ހާދިސާގެ މައުލޫމާތު ލިބުނީ މިއަދު ހެނދުނު 6:27 ހާއިރު
އިމާރާތްކުރުމާއި ބިނާރާ ބެހޭ ވުޒާރާގެ އިމާރާތުގައި ރޯވި އަލިފާނުގެ %90 މިހާރު ކޮންޓްރޯލް ކުރެވިފައިވާކަމަށް އެމްއެންޑީއެފުން ވިދާޅުވެއްޖެއެވެ.
ހައުސިން މިނިސްޓްރީގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު އެމްއެންޑީއެފް ފަޔަރ އެންޑް ރެސްކިއު ސަރވިސްއަށް ލިބިފައިވަނީ މިއަދު ހެނދުނު 6:27 ހާއިރުއެވެ.
އެމްއެންޑީއެފުން ވިދާޅުވީ، މައުލޫމާތު ލިބުނު ހިސާބުން ފެށިގެން އެމްއެންޑީއެފްއިން އެ ސަރަހައްދުގައި މަސައްކަތްކުރަން ފަށާފައިވާކަމަށެވެ. އެގޮތުން މިހާރު އަލިފާންގަނޑުގެ ބޮޑުބައި ނިއްވާލެވިފައިވާކަމަށް އެމްއެންޑީއެފްއިން ވިދާޅުވިއެވެ.
އެމްއެންޑީއެފްއިން ވިދާޅުވީ، މި އިމާރާތަކީ ސްޓީލް ސްޓްރަކްޗަރއަކަށްވާތީ އިމާރާތް ވަރަށް ބަލިކަށިކަމަށެވެ. އަލިފާން ނިއްވުމުގެ މަސައްކަތުގައި އެމްއެންޑީއެފްގެ އިތުރުން އެމްއޭސީއެލްއާއި އެމްޕީއެލް އަދި އެކިއެކި ވުޒާރާގެ މުވައްޒަފުންނާއި، އެންޑީއެމްއޭ، އަދި ރެޑް ކްރެސެންޓްގެ އެހީތެރިކަން ލިބިފައިވާކަމަށް ވަނީ ވިދާޅުވެފައެވެ.