އަލިފާންގަނޑުގެ ބޮޑުބައި ނިއްވާލެވިއްޖެ، ޢިމާރާތްތައް ވަނީ ބޭނުންނުކުރެވޭ ވަރަށް އަނދާފައި
-
އަލިފާނުގެ މައުލޫމާތު ލިބުނީ ހެނދުނު 6:27 ހާއިރު
ހައުސިން މިނިސްޓްރީގައި ރޯވި އަލިފާންގަނޑުގެ ބޮޑުބައި ނިއްވާލެވިފައިވާކަމަށް އެމްއެންޑީއެފް ފަޔަރ އެންޑް ރެސްކިއުއިން ވިދާޅުވެއްޖެއެވެ.
ހައުސިން މިނިސްޓްރީގައި އަލިފާނުގެ ހާދިސާއެއް ހިނގައިގެން އުޅޭކަމުގެ މައުލޫމާތު އެމްއެންޑީއެފް ފަޔަރ އެންޑް ރެސްކިއުއަށް ލިބިފައިވަނީ މިއަދު ހެނދުނު 6:27 ހާއިރުއެވެ.
ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި އެމްއެންޑީއެފް ފަޔަރ އެންޑް ރެސްކިއުގެ އިންސިޑެންޓް ކޮމާންޑަރ ވިދާޅުވީ، މައުލޫމާތު ލިބުނު ހިސާބުން ފެށިގެން އެމްއެންޑީއެފްއިން އެ ސަރަހައްދުގައި މަސައްކަތްކުރަން ފަށާފައިވާކަމަށެވެ. މިހާރުވެސް އެ ސަރަހައްދުގައި ފަޔަރ އެންޑް ރެސްކިއުގެ ޓީމްތައް އިމާރާތުގެ އެތެރެއަށް ވަދެގެން މަސައްކަތް ކުރަމުންދާކަމަށާއި، ބޮޑުބައި މިހާރު ނިއްވާލެވިފައިވާކަމަށް އިންސިޑެންޓް ކޮމާންޑަރ ވިދާޅުވިއެވެ.
"މިހާރުވެސް ފަޔަރ ފައިޓް ކުރުމުގެ މަސައްކަތް ކުރަމުންދަނީ. އެއްކޮށް އަލިފާން ނިއްވާ ލެވުނީއެއް ނޫން. މިހާރުވެސް ޓީމްތައް އެތެރެއަށް ވަދެގެން މަސައްކަތްކުރަމުންދަނީ. މިހާރު ވިސްނުން މިހުރީ ރޯވެފައި ހުރި ދިމާތަކަށް އިތުރަށް ފެން ޖަހައިގެން އެތެރެއަށް ޓީމްތައް ވައްދައިގެން މަސައްކަތްކުރުމަށް. ބޮޑުބައި މިހާރު އަޅުގަނޑުމެންނަށް ނިއްވާލެވިފައި މިވަނީ". އިންސިޑެންޓް ކޮމާންޑަރ ވިދާޅުވިއެވެ.
އެމްއެންޑީއެފްއިން ވިދާޅުވީ، މި އިމާރާތަކީ ސްޓީލް ސްޓްރަކްޗަރއަކަށްވާނީ އިމާރާތް ވަރަށް ބަލިކަށިކަމަށެވެ. އަލިފާން ނިއްވުމުގެ މަސައްކަތުގައި އެމްއެންޑީއެފްގެ އިތުރުން އެމްއޭސީއެލްއާއި އެމްޕީއެލް އަދި އެކިއެކި ވުޒާރާގެ މުވައްޒަފުންނާއި، އެންޑީއެމްއޭ، އަދި ރެޑް ކްރެސެންޓްގެ އެހީތެރިކަން ލިބިފައިވާކަމަށް ވަނީ ވިދާޅުވެފައެވެ.