ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ކ. މާފުށި އަތުން ހއ. ދިއްދޫ މޮޅުވުމާއެކު، ތިން ޓީމު ހިމެނޭ ގްރޫޕް އެފްގެ ފޯރިގަދަވެއްޖެއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު މެޗު ދިއްދޫން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. މި މެޗުން މާފުށި ބަލިވިއިރު، އެ ޓީމުން ވަނީ ދެވަނަ ބުރުގެ ފުރަތަމަ މެޗުގައި 2-0 ގެ ނަތީޖާއަކުން ބ. އޭދަފުށި ބަލިކޮށްފައެވެ. އެއާއެކު ތާވަލުގެ ކުރީގައި އޮތް ދިއްދޫ އާއި މާފުއްޓަށް ތިން ޕޮއިންޓް ލިބިފައިވާއިރު، ފުލުގައި އޮތް އޭދަފުއްޓަށް ޕޮއިންޓެއް ލިބިފައެއް ނުވެއެވެ. އެހެންކަމުން މި ގްރޫޕުން ކުއާޓާ ފައިނަލަށް ދާނެ ޓީމުތައް ކަށަވަރުވެގެންދާނީ ދިއްދޫ އާއި އޭދަފުށި ކުޅޭ މެޗުންނެވެ.
މިރޭ ކުޅުނު މެޗުގައި ދިއްދޫން ކާމިޔާބުކުރި ދެ ލަނޑުވެސް ފެނިގެންގޮސްފައިވަނީ މެޗުގެ ފުރަތަމަ ހާފުގައެވެ. އެގޮތުން މެޗު ފަށައިގެން ފަސްވަނަ މިނެޓުގައި ދިއްދޫން ލީޑު ނެގިއިރު، މި ލަނޑު ޖަހައިދިނީ އަހުޒަމް ރަޝީދެވެ. އަދި މެޗުގެ 35 ވަނަ މިނެޓުގައި އާދަމް އާޒިމް ވަނީ ލަނޑެއް ޖަހައި، ދިއްދޫގެ ލީޑު ފުޅާކޮށްދީފައެވެ. މި ލަނޑު އޭނާ ކާމިޔާބުކޮށްފައިވަނީ ދަނޑުގެ މެދު ރޮނގާ ހިސާބުން ފޮނުވާލި ހަމަލާއަކުންނެވެ.
މި މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.