ނޭޝަނަލް އެކްޝަން ޕްލޭން އޮން އެންޓިމައިކްރޭބިއަލް ރެސިސްޓެންސް އިފްތިތާޙްކޮށްފި

ބޭހަށް ނުގުޑާ ޖަރާސީމުގެ ސަބަބުން ކުރިމަތިވާ ނުރައްކަލުން އަރައިގަތުމަށްޓަކައި މަސައްކަތްކުރުމުގެ ޤައުމީ އެކްޝަން ޕްލޭން އިފްތިތާޙުކުރައްވައިފިއެވެ. މިއެކްޝަން ޕްލޭން އިފްތިތާޙްކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދެވެ.

ބޭހަށް ނުގުޑާ ޖަރާސީމުގެ ސަބަބުން ކުރިމަތިވާ ނުރައްކާތަކުން އަރިގަތުމަށް މަސައްކަތްކުރުމުގެ ޤައުމީ އެކްޝަން ޕްލޭން ނުވަތަ ނޭޝަނަލް އެކްޝަން ޕްލޭން އޮން އެންޓިމައިކްރޯބިއަލް ރިސިސްޓެންސްއަކީ 2024 އިން 2029ގެ ނިޔަލަށް ކުރިއަށް އޮތް 5 އަހަރު މިދާއިރާއިން މަސައްކަތްކުރާނެ ދާއިރާތައް ކަނޑައަޅާ އެކުލަވާލާފައިވާ ޕްލޭނެކެވެ. މިޕްލޭންގެ ދަށުން ބޭހަށް ނުގުޑާ ޖަރާސީމުގެ ސަބަބުން ކުރިމަތިވަމުންދާ އެކި މައްސަލަތަކާއި ގުޅޭގޮތުން ރާއްޖޭގެ ހުރިހާ ސަރަޙައްދެއްގައި މަސައްކަތްކުރުމަށްވަނީ ހަމަޖެހިފައެވެ. އަދި ޢާންމުން ހޭލުންތެރިކުރުމާއި، އުސޫލުތަކަށް ގެންނަންޖެހޭ ބަދަލުތަކާއި ގުޅުންހުރި އިދާރާތައް އެކުގައި މަސައްކަތްކުރާނެ ގޮތްތަކެއް ކަނޑައަޅާނެއެވެ.

މިއެކްޝަން ޕްލޭން އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ސިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވީ، ބޭހަށް ނުގުޑާ ޖަރާސީމުގެ ސަބަބުން ކުރިމަތިވަމުންދާ ނުރައްކާ ދުނިޔޭގެ ހުރިހާ ޤައުމަކަށްވެސް ކުރިމަތިވެފައިވާކަމަށެވެ. އެހެންކަމުން ދުނިޔޭގެ ސިއްޙަތު ޖަމުޢިއްޔާއިން އެންމެ ބޮޑަށް ބާރުއަޅުއްވަނީ ޤައުމުތަކުގެ އެންމެ މަތީ ލެވެލްގައިވެސް މިމައްސަލައާއި ދެކޮޅަށް އެދެވޭގޮތުގައި މަސައްކަތްކޮށްދެއްވުމަށްކަމަށް ވަޒީރު ވިދާޅުވިއެވެ. އަދި މިކަމުގައި ރާއްޖޭގެ ރައީސުލްޖުމްހޫރިއްޔާ ނަމޫނާ ދައްކަވަމުންގެންދަވާކަން ވަޒީރުވަނީ ފާހަގަކުރައްވާފައެވެ.

"އަޅުގަނޑު ވަރަށް އުފަލާއެކު ފާހަގަކުރަން، މިކަމާއި ގުޅުންހުރި ބައްދަލުވުމެއް އދ.ގެ ޖަމުޢިއްޔާއަކުން ބޭއްވުމާއި ގުޅިގެން ރާއްޖެ ތަމްސީލުކުރައްވާ، ދިވެހީންގެ ސިއްޙަތަށް ކުރިމަތިވަމުންދާ މައްސަލަތަކާއި މިކަމުގެ ސީރިއަސްކަން އެމަނިކުފާނު ހާމަކޮށްދެއްވާފައިވާ ދެއްވުން." ވަޒީރު ނާޒިމް ވިދާޅުވިއެވެ.

މިރަސްމިއްޔާތުގައި ވާހަކަފުޅުދައްކަވަމުން އދ.އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ.އަނުއްރުދެ ތުޝާރާ ވިދާޅުވީ، މިއީ މުޅި ދުނިޔެއިން ތަޙައްމަލުކުރަމުންދާ ހަމަހިމޭން ބޮޑު ކާރިސާއެއްކަމަށެވެ. އަދި ވަށައިގެންވާ މާޙައުލުން ކުރިމަތިވަމުންދާ އެކި ބާވަތުގެ ޖަރާސީމާއި ހަނގުރާމަކުރުމުގެ ބާރު ނެތުމަކީ އެކި ބާވަތުގެ ގެއްލުން އިންސާނުންނަށް ކުރިމަތިވާނެކަމެއްކަން އަނުއްރުދެ ފާހަގަކުރެއްވިއެވެ. އެހެންކަމުން މިކަމުގައި ހުރިހާ ޤައުމެއްގެ ހުރިހާ ފަންތިއެއްގެ މީހުން ގުޅިގެން މަސައްކަތްކުރުމުގެ މުހިއްމުކަންވެސްފާހަގަކުރެއްވިއެވެ. އަނުއްރުދެ ވަނީ މިދާއިރާއިން ރާއްޖެއިން ހޯދާފައިވާ ކާމިޔާބީއަށް ތަޢުރީފްކުރައްވާފައެވެ.

"ދެކުނު އޭޝިއާ ސަރަޙައްދަށް ބަލާއިރު މިމައްސަލަ ވަރަށް ބޮޑު، މައިގަނޑު ސަބަބަކީ ބޭސް ސިޓީއާއި ނުލާ އެންޓިބައޮޓިކްސް ވިއްކުމުގެ މައްސަލަ." ޑރ.އަނުއްރުދެ ވިދާޅުވިއެވެ.

ބޭހަށް ނުގުޑާ ޖަރާސީމުގެ ސަބަބުން އަހަރުން އަހަރަށް މަރުވާ މީހުންގެ ޢަދަދުދަނީ އިތުރުވަމުންނެވެ. މީގެ ސަބަބުން އިޖުތިމާޢީ އަދި އިޤްއިޞާދީއެތައް މައްސަލައެއް ކުރިމަތިވާއިރު، މިމައްސަލައިން އަރައިގަތުމަށް މިހާރުމިވަނީ އަނެއްކާވެސް އެކްޝަން ޕްލޭނެއް އެކުލަވާލާފައެވެ.

މިމައްސަލަ ބޮޑުވުމުގެ ސަބަބުން 2015 ވަނަ އަހަރު ދުނިޔޭގެ ސިއްޙަތު ޖަމްޢިއްޔާއިން ޤައުމުތަކަށް މިކަމުގައި މަސައްކަތް ކުރުމަށް ގޮވާލެއްވުމާއި ގުޅިގެން 2017 ވަނަ އަހަރުވަނީ ރާއްޖޭގެ ފުރަތަމަ ޤައުމީ އެކްޝަން ޕްލޭންވަނީ އެކުލަވާލާފައެވެ. މިފަހަރު އިފްތިތާޙްމިކުރީ ކުރިއަށް އޮތް 5 އަހަރަށް މަސައްކަތްކުރާނެ ޤައުމީ އެކްޝަން ޕްލޭނެވެ.